Gasabo: Inzobere zo muri Amerika zatanze ubufasha ku baturage barwaye amenyo

Yanditswe na Bukuru JC
Kuya 1 Kanama 2017 saa 06:11
Yasuwe :
0 0

Abaturage babarirwa muri 600 bo mu murenge wa Rusororo, Akarere ka Gasabo n’abandi baturutse mu bindi bice bitandukanye bahawe ubuvuzi bw’amenyo ku buntu n’inzobere z’abaganga zaturutse muri Leta Zunze Ubumwe za Amerika.

Iki gikorwa cyo kuvura amenyo cyiswe “Bring a Smile Global Outreach”, cyo kugarurira Abanyarwanda kumwenyura kiri gukorwa n’abaganga b’inzobere baturutse muri Leta Zunze Ubumwe za Amerika (USA) bafatanyije n’inzobere za hano mu Rwanda.

Iki gikorwa cyateguwe n’umuryango Faith Victory Association (FVA) ku bufatanye n’Ivuriro Beatrice Polyclinic hamwe n’Urugaga Nyarwanda rw’Abavuzi b’Amenyo (RDA).

Abateguye iki gikorwa cyo kuvura amenyo bavuga ko abantu bagera ku 1000 biyandikishije ngo bahabwe ubuvuzi bw’amenyo, mu minsi itatu ishize ubu buvuzi butangwa bwageze ku barenga 600.

Umuyobozi Nshingwabikorwa w’umuryango utari uwa leta FVA bagize uruhare mu gutegura iki gikorwa, Mwanafunzi Willy, yavuze ko batanze ubuvuzi bw’amenyo hashingiwe ku byo ku bufasha abaturage bagaragazaga ko bagikeneye.

Yagize ati “Dutegura iki gikorwa twarebye mu bibazo byakundaga kubazwa n’abatuye muri aka gace dukoreramo, hari abagaragazaga ibibazo by’amenyo ndetse n’amaso, nuko tubasha kubona ku buryo bworoshye itsinda ry’abaganga b’abahanga bashobora kudufasha kuvura amenyo. Duhereye ku menyo ariko dukomeza gushakisha abaterankunga ku buryo n’abandi bashobora kuza, kandi n’amenyo abantu benshi barayataka kandi ubuvuzi bwayo burahenda.”

Uyu muyobozi yongeraho ko igikorwa nk’iki giteganyijwe byibura buri mwaka.

Abajijwe niba bajya no mu zindi ntara, avuga ko amatangazo akangurira abantu kwivuza amenyo atigeze arangira, akanavuga ko hari abaturutse mu ntara baje kwivuza amenyo kandi bose barakiriwe.

Mukeshimana Beatrice, umubyeyi waturutse mu Murenge wa Masoro mu Karere ka Rulindo yavuze ko yishimiye iki gikorwa kuko babonye ubuvuzi nta kiguzi.

Yagize ati “Hari ubwo nigeze njya kwivuza bakambwira ngo iryinyo rimwe ni ibihumbi bitanu, bigatuma rero utivuza, bankuriyemo iryinyo ryari ryaranzengereje bambwiye ko gukuramo arenze rimwe bitemewe ariko ngo asigaye bazayoza banayahome. Aba baganga rwose Imana ibongerere umugisha kubwo kwitanga no kwita ku badafite ubushobozi.”

Abaganga bavura amenyo bagaragaje ko indwara nyinshi z’amenyo basanganye abamaze iminsi baza kwivuza, inyinshi zishingiye ku isuku nkeya y’amenyo no kutivuriza igihe.

Muganga Gafirita Godfrey yagize ati “Mu Rwanda hakozwe ubushakashatsi ku ndwara zo mu kanwa, nubwo raporo yuzuye itarajya hanze, bimwe mu by’ubwo bushakashatsi bigaragaza ko ibibazo byinshi by’amenyo bishingira ku isuku nkeya kandi indwara nyinshi z’amenyo zigaragara mu Rwanda ni ugucukuka kw’amenyo n’indwara zibasira ishinya; kandi muri iyi minsi itatu tumaze tuvura, izi ndwara ziri mu zagaragaye cyane mu barwayi twakiriye.”

Dr Viven Abante ukuriye abaganga batatu baturutse muri Amerika avuga ko bashimishijwe no gufasha Abanyarwanda mu bikorwa byo guhoma no gukura amenyo yangiritse ariko no kubagira inama.

Yagize ati “Bimwe turi kubakorera harimo kubigisha isuku y’amenyo, kugana abagaganga b’amenyo kenshi, kubigisha uburyo bwo koza amenyo ndetse no kubabwira indyo ikwiriye kandi ibereye amenyo.”

Usibye kuvura amenyo, aba baganga batanze n’ubufasha bw’imiti yoza amenyo n’ibikoresho bitandukanye byoza amenyo ku babonanye n’abaganga kugira ngo barusheho kubungabunga isuku y’amenyo.

Ubu bufasha bwo kuvura amenyo ku buntu bwatangiye tariki ya 29 Nyakanga 2017 kugera tariki ya 2 Kanama 2017. FVA n’ Ivuriro Beatrice Polyclinic bakaba barafatanyije na San Diego Filipino Dental Association (SDFDA) n’Uruganga Nyarwanda rw’Abavura amenyo.

Abaturage benshi bitabiriye guhabwa ubuvuzi bwa menyo ku buntu
Dr Viven Abante ukuriye abaganga batatu baturutse muri Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza