Kwamamaza

Bugesera: Baravumira ku gahera indwara ya shirikoshi imaze gupfakaza benshi

Yanditswe kuya 2-08-2016 saa 15:33' na Emma-Marie Umurerwa


Abagore barabogoza, nyuma yaho abagabo babo bacukuraga amabuye y’agaciro mu kirombe cya Nemba, bahitanywe n’indwara ya shirikoshi (silicose) abandi bakaba bakiyirwaye.

Hafi y’umupaka uhuza u Rwanda n’ u Burundi mu Murenge wa Rweru, abahatuye baravumira ku gahera indwara bise ‘shirikoshi’ ikomeje guhekura ababyeyi, agapfakaza abagore, ikagira abana impfubyi.

Mu mvugo ya benshi bagira bati “Mu mwaka wa 2012, nibwo inaha hataye icyorezo cya ‘shirikoshi’ ubu abagore benshi bo muri uyu murenge turi abapfakazi, abana ni impfubyi kubera yo. Abagabo bacu bacukuraga mu kirombe cy’amabuye y’agaciro cya Nemba niho banduriye shirikoshi bagenda bapfa urusorongo.”

Nyirabagenzi Leonia, atuye mu Mudugudu wa Kimvubu mu Kagari ka Nemba, afite abana batatu yasigiwe n’umugabo we wishwe na shirikoshi.

Yagize ati “Umugabo wanjye yakoreraga rwiyemezamirimo wacukuraga amabuye y’agaciro inaha, akoresha imashini yatoboraga amabuye. Igihe cyaje kugera ibihaha biratobagurika, yapfuye asigaranye amagupfwa gusa. Yahakoze imyaka itanu kandi yari afite amasezerano y’akazi, numva Leta ikwiye kudufasha abazungu bahakoreraga bakaduha impozamarira.”

Nsekanabo Alexis, nawe atuye mu Kagari ka Nemba, avuga ko amaze gupfusha abavandimwe babiri bazize ‘shirikoshi’ ati “Ubu ngiye gusigara ndi nyakamwe kubera iyo ndwara. Inaha hazasigara abagabo mbarwa kuko n’abatarapfa barwaye.”

‘Shirikoshi’ imaze guhitana bangahe?

Nta mibare ifatika itangwa n’abatuye mu Murenge wa Rweru, dore ko iyo bavuga abapfuye bacishiriza.

Umwe yagize ati “Guhera mu mwaka wa 2012, ntihabuze abagabo 100 bamaze kwicwa na ‘shirikoshi’ undi ati “Abo njye nzi barenga 50, hakozwe ibarura mushobora gusanga barenga 100.”

Umugenzuzi w’umurimo mu Karere ka Bugesera, Kananga Jean Damascene, yatangarije IGIHE ko iki kibazo kizwi.

Yagize ati “Icyo kibazo turakizi, ndibuka ko mu mwaka wa 2013 abantu bagera muri batandatu bari bamaze kwicwa na ‘shirikoshi’ abandi 13 bari barwaye, ubu nta mibare mfite neza y’abapfuye bose hamwe, ariko iyo mibare ishobora kuba yariyongereye kuko wasangaga mu kirombe hajyamo abantu nka 300, kandi nta masezerano y’akazi bari bafite.”

Kananga yakomeje avuga ko nyuma yo kubona ko abaturage bakomeje kwibasirwa niyo ndwara, Akarere ka Bugesera kasabye ikigo cya Natural Resources Development (NRD) cyari gifite isoko ryo gucukura amabuye y’agaciro mu kirombe cya Nemba, gupimisha abacukuzi bose.

Bapimishije abakozi bagera nko ku 100 gusa barekera aho kubera n’ubundi hari byinshi batubahirizaga ikigo cyaje gufungwa na Minisiteri y’umutungo kamere.”

Icyo Minirena ibivugaho

Umunyamabanga wa Leta muri Minisiteri y’ Umutungo Kamere ushinzwe Ubucukuzi bw’ Amabuye y’ agaciro, Imena Evode , yatangarije IGIHE ko ik i kibazo batangiye kugikurikirana.

Yagize ati “Icyo kibazo cy’iyo ndwara iterwa n’utuvumbi dutoya dutumuka iyo umucukuzi arimo gushwanyuza urutare cyangwa amasarabwayi turakizi. Ubu rero hashyizweho itsinda kugirango tumenye abapfuye ari bangahe, abanduye ni bangahe kugirango bavurwe. Sinakubwira ngo hamaze gupfa bangahe cyangwa handuye bangahe kuko hagikorwa igenzura.”

Imena akomeza avuga ko iyi ndwara itandura umunsi umwe. Yagize ati “Ikindi nakubwira nuko abarwaye iyo ndwara cyangwa se abo yishe batayanduye umunsi umwe, ahubwo ni indwara igaragara nyuma y’igihe kirekire.”

Avuga kandi ko nyuma yo gusanga ikigo cya ‘NRD’ kitarubahirije amategeko agenga ubucukuzi bw’amabuye y’agaciro mu Rwanda, cyaharitswe kuri ubu ikirombe cya Nemba kikaba cyaratsindiwe n’undi rwiyemezamirimo wasabwe kubahiriza amategeko ndetse akazaha amasezerano y’akazi abacukuzi hamwe n’imyambaro yabugenewe.

Indwara ya silicose nta muti irabona uyivura, icyakora igishoboka ni ugusimbuza igihaha kirwaye, hagashyirwamo igishya.

Nyirabagenzi yapfushije umugabo we azize shirikoshi
Uyu musaza ngo shirikoshi yamusize ari nyakamwe
Ibiro by'Umurenge wa Rweru

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved