Bugesera: Abarenga 600 bivuje malariya ku ivuriro rimwe mu cyumweru

Yanditswe na Evariste Nsengimana
Kuya 4 Ukwakira 2017 saa 11:48
Yasuwe :
0 0

Ikigo nderabuzima cya Ruhuha giherereye mu Karere ka Bugesera, cyatangaje ko mu cyumweru kimwe gusa cyakiriye abarwayi ba malariya 608, hatabariwemo abavurirwa mu rugo n’abajyanama b’ubuzima.

Iki kigonderabuzima n’abaturage bakivurizaho baturuka mu mirenge ya Ruhuha, Ngeruka, Mareba n’ahandi, bahamirije TV1 ko malariya ibasumbirije.

Umukozi ushinzwe ibarurishamibare mu Kigo nderabuzima cya Ruhuha, Mukamana Florence, yavuze ko iyi ndwara yafashe intera yo hejuru muri iki gihe.

Yagize ati “Muri iyi minsi biragaragaro ko malariya yiyongeyere ugereranyije n’ibihe bishize. Muri iki gihe tugezemo birasanzwe, ni ukuvuga ngo iyo tugeze muri aya mezi yo mu mpera z’umwaka usanga yiyongera cyane. Buri mwaka bigenda bibaho. Mu cyumweru gishize cyarangiye ku cyumweru (Kuwa 1 Ukwakira 2017) twakiriye abarwayi ba malariya 608 bageze ku kigo nderabuzima cya Ruhuha, hakaba n’abandi baba bavurwa n’abajyanama b’ubuzima mu giturage batari muri abo 608. Bigaragara ko yiyongerere.”

Abaturage batanga ubuhamya ko hari ababo iyo ndwara imaze guhitana.

Umwe yagize ati “Wagira ngo ni icyorezo, aho ugeze hose usanga bayirwaye. Hari n’abo yica. Hari uwo baherutse gukura hano mu byatsi aharyamye bamugejeje kwa muganga ahita apfa.”

Mugenzi we ahamya ko hafi ya buri rugo harimo urwaye malariya, ati “Umva, nta rugo wasanga rutarwaje malariya. Ni ukuvuga ngo hano mu Murenge wa Mareba, ubu hashije icyumweru duhambye umwana bavuga ko yazize malariya.”

Undi wemeje ko mu muryango we barwaye ari benshi, yagize ati “Ahantu hose usanga abantu baryamye, nanjye ubwanjye mu rugo twari tuyirwaye turi batanu. Abana bane nanjye wa gatanu. Niba ari iri zuba, niba ari icyorezo, natwe ntituzi ikibitera. Mu kagari kacu bamaze gushyingura abantu babiri bazize malariya muri uku kwezi kwa cyenda.”

Umukozi ushinzwe ibarurishamibare mu Kigo nderabuzima cya Ruhuha yasobanuye ko nubwo iyo ndwara yakajije umurengo ngo ubuyobozi ntibwigeze butezuka ku ngamba zo kuyihashya zirimo gufatanya n’abajyanama b’ubuzima, inzego z’ibanze mu gushishikariza abaturage kuyirinda nko kurara mu nzitiramubu, gusiba ibyobo birekamo amazi, gutema ibihugu bikikije ingo n’ibindi.

Minisiteri y’Ubuzima yari yifuje kurandura burundu indwara ya malariya mu mwaka wa 2015 ariko ntibyakunze. Zimwe mu mpamvu zivugwa nk’inzitizi zatumye idacika harimo imihindagurikire y’ibihe, kwirara kw’abaturage ku ngamba zo kuyirwanya malariya n’ibindi.

Leta y’u Rwanda yagiye ishyiraho ingamba zitandukanye zo kuyikumira harimo nko gutanga inzitiramubu ku buntu, gutera imiti mu nzu z’abaturage, guha imiti yayo abaturage bo mu cyiciro cya mbere cyangwa icya kabiri by’ubudehe ku buntu kandi bigakorwa n’abajyanama b’ubuzima. mituweli.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza