Abarengeje imyaka mirongo 50 bashobora guhuma byoroshye kubera indwara y’ishaza

Yanditswe na Hakizimana Jean Paul
Kuya 18 Ukwakira 2018 saa 10:05
Yasuwe :
0 0

Abantu barengeje imyaka mirongo 50, barakangurirwa kwipimisha amaso kuko bafite ibyago byinshi byo guhuma kubera indwara y’ishaza.

Izi nama bazigiriwe kuri uyu wa Kane, ubwo u Rwanda rwifatanyaga n’Isi mu munsi mpuzamahanga wahariwe kurwanya ubuhumyi, mu nsanganyamatsiko igira iti ‘Ubuvuzi bw’amaso kuri bose’.

Ku rwego rw’akarere ka Rwamagana wizihirijwe mu Murenge wa Karenge, aho abarenga 300 bapimwe uburwayi bw’amaso ku buntu.

Gisagara Egide umuganga w’amaso mu bitaro bya CHUK yabwiye IGIHE ko mu bituma abenshi bahuma harimo gukoresha imiti gakondo mu kwivura, aho abanyarwanda benshi barwara ijisho bakihutira gushyiramo amashereka, ubwoya bw’urukwavu n’ibindi byatsi bibongerera guhuma aho gukira.

Yakomeje avuga ko indwara y’ishaza ku bantu bakuru barengeje imyaka 50 ari bwo burwayi buhangayikishije Isi mu kongera ubuhumyi.

Ati “Kugira ishaza mu jisho si ikibazo yewe si n’uburwayi kuko ni imihindagurikire y’umubiri kubera gukura, ishaza ni kimwe no kuzana imvi cyangwa kuzana uruhara. Ikidasanzwe ni uko iyo udakurikiranye cyane iryo shaza riza mu jisho ngo ukurikiranwe n’muganga bishobora gutera ubuhumyi”.

Gisagara arasaba abanyarwanda kubaha amaso yabo bakirinda kuyashyiramo imiti ya Kinyarwanda n’indi yose batandikiwe na muganga, bakamenya ko imiti bivurisha mu buryo bwa magendu ibongerera ubuhumyi mu buryo bwa vuba. Yabasabye ko mu gihe bagize ikibazo bakegera abaganga.

Ntakiyimana Elasto uri mu kigero cy’imyaka 60 yatanze ubuhamya bw’ukuntu gukoresha imiti ya Kinyarwanda byatumye ijisho rye rihuma.

Ati" Narindi mu rugo mbona hajemo aka kantu karimo k’ishaza ritangira kundya nuko nshaka ibyatsi bita inyabarasanyi ndabivuguta mbitonyangirizamo ngira ngo uburibwe numvaga bukire, ariko nyuma ryahise ripfa ritangira kugenda rihunyeza ritabona neza."

Ntakiyimana agira inama abanyarwanda yo kudakoresha imiti ya Kinyarwanda mu kwivura amaso ahubwo bakajya bagana ibigo nderabuzima mu gihe ijisho rigize ikibazo.

Ubushakashatsi bwakozwe na Minisiteri y’ubuzima mu 2015, bwagaragaje ko mu bantu batanu bari kumwe barengeje imyaka 50 umwe aba atabona neza.

Umwaka ushize mu Karere ka Rwamagana, abantu barenga ibihumbi 56 basanganwe ikibazo cy’amaso muri gahunda ibitaro byakoze yo gusuzuma abaturage bahereye kuri buri mudugudu.

Gisagara Egide umuganga muri CHUK asaba abanyarwanda barengeje imyaka mirongo 50 kurinda amaso yabo imiti gakondo
Ntakiyimana Elasto avuga ko yahumye ijisho rye kubera gushyiramo inyabarasanyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza