Abanyarwanda barenga ibihumbi 780 bivuje indwara z’amaso mu 2016

Yanditswe na Evariste Nsengimana
Kuya 12 Ukwakira 2017 saa 09:14
Yasuwe :
1 0

Abahanga mu buvuzi by’umwihariko ubw’indwara z’amaso bavuga ko ari zimwe mu zishobora kwibasira benshi, cyane cyane ko umuntu atamenya neza niba ayarwaye cyangwa atayarwaye mu gihe atisuzumushije.

Imibare itangazwa n’Ikigo cy’Igihugu cyita ku buzima, RBC, igaragaza ko mu bigo nderabuzima byo mu Rwanda bisaga 500, hakiriwe abantu 780 428 bivuza indwara z’amaso mu 2016.

Minisiteri y’Ubuzima itangaza ko yagerageje kugeza ubuvuzi bw’amaso ku bigo nderabuzima, ibitaro by’uturere, iby’intara kugera ku bitaro by’icyitegererezo.

Kuri uyu wa 12 Ukwakira 2017, ubwo u Rwanda rwifatanyaga n’isi kwizihiza umunsi mpuzamahanga wo kwita ku buzima bw’amaso, RBC yatangaje ko mu cyumweru cyawubanjirije abanyarwanda 2520, bisuzumishije indwara z’amaso, muri abo 468 babasanzemo ishaza, bahita batangira kubagwa.

Umuganga w’indwara z’amaso mu bitaro bya Rwamagana, Dr. Gisagara Egide, asobanura ko indwara z’amaso zikunze kwakirwa ari iziyafata zigatuma umuntu atabasha kureba kure cyangwa hafi, iziterwa no kugiramo ishaza n’ibindi.

Dr. Gisagara avuga ko indwara z’amaso zishobora kwirindwa, agaheraho asaba buri wese kwisuzumisha hakiri kare.

Yagize ati “85% by’indwara z’amaso ziririndwa. Amakuru duha abarwayi, mbere na mbere ni ukugana ibitaro kuko akenshi indwara z’amaso ntizibabaza, ntizinica. Bivuze ko umuntu ashobora kubana na zo atazi ko azifite.”

Yakomeje asobanura ko bimwe mu bibazo bikomeye biri kugaragara muri iki gihe ari abayarwara bakivuza ku bavuzi batabizobereye kimwe n’ababyeyi bakamira amashereka mu maso y’abana, avuga ko ari bibi cyane.

Dr. Gisagara avuga ko by’umwihariko ku bantu bakuru, mu Rwanda usanga byibuze umuntu 1% mu bantu bari hejuru y’imyaka 50 afite ubumuga bwo kutabona, cyane cyane babiterwa no kugira inshaza mu maso zirimo izo baterwa no gukomeraka, gukoresha imiti batandikiwe na muganga, isukari nyinshi n’ibindi.

Umuyobozi w’ishami rishinzwe kurwanya SIDA no gukumira izindi ndwara mu Kigo cy’Igihugu cy’Ubuzima, Dr. Innocent Turate, avuga ko mu byo umuntu yakora yirinda indwara z’amaso harimo gukora siporo, kurya indyo yuzuye n’ibindi.

Abantu bagera kuri miliyoni 285 bafite indwara z’amaso ku isi hose. Muri bo miliyoni 39 bafite ubumuga bwo kutabona.

Bamwe mu baturage bari bamaze kwisuzumisha amaso
Dr Muhimpundu Marie Aime, ushinzwe kurwanya indwara zitandura muri RBC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza