Abanyarwanda bagera kuri miliyoni enye barwaye malariya mu myaka ine ishize

Yanditswe na Ishimwe Israel
Kuya 16 Ugushyingo 2016 saa 11:10
Yasuwe :
0 0

Minisiteri y’Ubuzima yatangaje ko mu myaka ine gusa, Abanyarwanda bangana na miliyoni eshatu n’ibihumbi 900 barwaye Malariya, naho mu mibare yagiye ifatwa mu kwezi kwa Nzeri kw’imyaka itatu itandukanye yagaragaje ko abagera kuri 79 bahitanywe na yo.

Imibare yatanzwe na Minisiteri igaragaza ko muri 2012 abantu bari barwaye iyi ndwara bageraga ku bihumbi 800, ariko muri raporo y’umwaka wa 2015-2016, yagaragaje ko imibare yazamutse cyane bakagera kuri miliyoni eshatu n’ibihumbi 900.

Byatangajwe ubwo Minisitiri w’Ubuzima, Dr Diane Gashumba yatangizaga ku mugaragaro igikorwa cyo kuvura Malariya abaturage bo mu cyiciro cya mbere n’icya kabiri cy’ubudehe ku buntu, kuri uyu wa Gatatu, tariki ya 16 Ugushyingo 2016.

Minisitiri Gashumba avuga ko ukwiyongera gukabije kw’indwara ya Malariya ariko kwatumye bafata ingamba zo kubavurira ubuntu ndetse bakanaberegereza serivisi z’ubuvuzi aho batuye kugira ngo harebwe uko ubwandu bwagabanuka.

Yagize ati “Twafashe ingamba zo korohereza abarwaye malariya ariko babarizwa mu cyiciro cya mbere n’icya kabiri cy’ubudehe kwivuza mu rwego rwo kugabanya ubwandu bwa malariya ndetse n’impfu ziterwa na yo.”

Ubwiyongere bwa Malariya bwatewe ahanini n’imihindagurikire y’ikirere ndetse n’imiyaga myinshi ituma ubushyuhe bwiyongera ndetse n’imibu itera iyi ndwara ikarushaho kororoka.

Umuyobozi w’Ishami rishinzwe kurwanya Malaria mu Kigo cy’Igihugu gishinzwe Ubuzima, RBC, Dr.Aimable Mbituyumuremyi, yasabye Abanyarwanda kwitwararika gahunda z’ubuvuzi bw’iyi ndwara Minisiteri yabashyiriyeho.

Ati “ Turasaba abantu kujya bipimisha Malaria itaraba iy’igikatu, bakitwararika buri gahunda zishyirwaho kuko zose zifite umumaro.”

Dr. Mbituyumuremyi yongeyeho ko Malaria irushaho kugenda yiyongera.

Ati “ Nko muri 2012 twari dufite ibihumbi 800 by’abantu baza barwaye Malaria ku mwaka, ariko ubona ko igenda yiyongera kuko mu mpera z’umwaka ushize, 2015-2016, abantu baje barwaye Malaria bageraga kuri miliyoni 3 n’ibihumbi 900, murumva ko igenda yiyongera ari na yo mpamvu Guverinoma y’u Rwanda yafashe ingamba zihariye mu rwego rwo guhangana na yo.”

Uku kwiyongera kwa Malaria bihuzwa n’imihindagurikire y’ikirere, akaba aribyo Umunyamabanga wa Leta muri Minisiteri y’Ubuzima Dr. Patrick Ndimubanzi yahereyeho avuga ko byatumye n’abo ihitana biyongera.

Ati “ Iyo imibare y’abantu barwaye yiyongereye n’abantu bapfa bariyongera, mu kugereranya rero dufashe nk’ukwezi kwa cyenda umwaka ushize malariya yahitanye abantu 27, mu mwaka wari wabanje mu kwezi kwa cyenda hapfuye 30, uyu mwaka mu kwezi kwa cyenda hapfuye 22. Ibi byatumye dutangiza uru rugamba rwo kugabanya impfu zituruka kuri iyi ndwara.”

Minisiteri y’Ubuzima itangaza ko igiye gukoresha uburyo bukomatanyije muri gahunda yo kuvura Abanyarwanda, burimo gutanga inzitiramibu, gutera imiti mu ngo, gupima no kuvura Malaria ku buntu mu mavuriro no ku bigo nderabuzima ndetse no ku midugudu aho bizakorwa by’umwihariko n’abajyanama b’ubuzima.

Minisitiri w'Ubuzima, Dr Diane Gashumba
Umunyamabanga wa Leta muri Minisiteri y'Ubuzima, Dr Patrick Ndimubanzi
Umuyobozi w'Ishami ryo kurwanya malariya muri RBC, Dr Aimable Mbituyumuremyi

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza