Kwamamaza

Abana 500 bivurije kanseri ku bitaro bya Butaro kuva mu 2012

Yanditswe kuya 28-08-2016 saa 08:24' na Ezechiel Mbananabo


Umukozi w’Ikigo cy’Igihugu cy’Ubuzima (RBC) ushinzwe kurwanya indwara za kanseri, Hagenimana Marc, yatangaje ko kuva mu 2012, abana bagera kuri 500 ari bo bamaze kwivuriza indwara za kanseri ku bitaro bya Butaro bifite umwihariko wo kuzivura.

Yabitangaje kuri uyu wa Gatandatu mu gikorwa cyo gusobanurira abaturage bo mu Murenge wa Nyarugunga mu Karere ka Kicukiro ibijyanye na kanseri zifata abana cyabanjirije ukwezi kwahariwe kuzirwanya kwa Nzeli.

Yagaragaje kugeza ubu nta mibare ifatika bafite igaragaza uko kanseri z’abana zihagaze mu Rwanda bitewe n’uko Abanyarwanda batarazisobanukirwa dore ko ngo hari n’abazitiranya n’amarozi bajya kuzivuriza mu bapfumu n’abavuzi ba gakondo.

Ariko ngo ababashije kugera ku bitaro bya Butaro bifite ubushobozi bwo kuzivura, kuva mu 2012 kugeza ubu babarirwa muri 500, nubwo hashobora kuba hari n’abandi benshi batabigannye cyangwa abo zahitanye batamenyekanye.

Yagize ati “Indwara za kanseri ni indwara zitazwi cyane mu bihugu bikiri mu nzira y’amajyambere harimo n’u Rwanda, kuzirwanya byatangiriye mu bihugu byateye imbere nka Leta Zunze Ubumwe za Amerika n’ibindi, aho usanga izi ndwara zizwi kuva cyera.”

Hagenimana yavuze ko kugeza hataramenyekana impamvu ifatika itera kanseri z’abana, gusa ngo ubushakashatsi butandukanye bwerekana ko hari ibintu bishobora kuzitera.

Birimo ibikomoka ku ruhererekane rwo mu miryango (hérédité),gukoresha itabi n’ibiyobyabwenge no kunyura mu byuma nka scanner (ibi bikoreshwa n’inzego z’umutekano) kenshi ku mugore utwite

Kanseri z’abana zikunze kuboneka mu Rwanda n’ibimenyetso byazo

RBC igaragaza ko kanseri z’abana zikunze kugaragara mu Rwanda zirimo kanseri y’impyiko (Wilm’s Tumor), aho ibimenyetso byayo birimo kubyimba inda uruhande rumwe cyangwa zombi mu gihe impyiko zose zafashwe, kunyara amaraso, kunanirawa cyane no kunanuka cyane.

Kanseri zo mu maraso (Leukemia), zigaragazwa n’ibimenyetso birimo kubyimba inturugunyu ahantu henshi nko mu maha, mu mayasha no mu ijosi, kubura amaraso, kugira umuriro cyane udakangwa n’imiti isanzwe yo kwa muganga, kuva imyuna cyane cyangwa kuvira mu ruhu, gucika intege no kunanuka cyane .

Izindi ni kanseri ifata ijosi (Burkitt’s lymphoma), igira ibimenyetso birimo kubyimba amajigo, kugira umuriro,kunanirwa cyane no kugira isesemi, ndetse na kanseri ifata inturugunyu ( Hodgkins’Lymphoma), igaragazwa n’ibimenyetso birimo kubyimba inturugunyu ahantu henshi cyane harimo mu maha no mu ijosi, kugira umuriro no kuva imyuna cyane, kugira ibyuya bidasanzwe n’isesemi.

Kwirinda izi kanseri biragoye kuko inyinshi zizana, gusa ngo kwirinda inzoga, itabi cyangwa indi miti itanditswe na muganga mu gihe umubyeyi atwite bishobora kugabanya zimwe muri zo.

Hagenimana yakanguriye abantu bose kwihutira kwa muganga mu gihe babonye ibyo bimenyetso kuko kanseri izo kanseri zivurwa zigakira. Uko umunti atinda kujyanwa kwa muganga niko kanseri ikomeza gukura ikaba yanamuhitana.

Mu bukangurambaga bwahariwe kurwanya indwara za kanseri zifata abana mu Rwanda, hateganyijwe ibikorwa bitandukanye bigamije kuzamura ubumenyi bw’abantu ku kibazo cya kanseri.
I&M Bank yiyemeje gutera inkunga ubu bukangurambaga itanga ibikoresho bitandukanye hamwe n’amafaranga.

Umukozi wayo Petero Kigame, yabwiye itangazamakuru ko nka I&M Bank bafashe icyo cyemezo kubera ko nubwo bacuruza amafaranga ishingiro ryayo ari abantu bazima.

Ati “Abana bato ni bo twibandaho cyane kugira ngo bazakure neza bavamo n’abakozi bacu. Ni yo mpamvu dufatanya n’ibigo bitandukanye tukaba abaterankunga."

Umukozi w’Ikigo cy’Igihugu cy’Ubuzima (RBC) ushinzwe kurwanya indwara za kanseri, Hagenimana Marc
Petero Kigame, Umukozi wa I&M Bank

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved