Kwamamaza

Abana 1000 buri mwaka bavukana ibibazo byo kuremara ibirenge

Yanditswe kuya 13-10-2016 saa 07:53' na Tombola Felicie


Nubwo hari intambwe igenda iterwa kugira ngo abana bavukana ubumuga bwo kuremara ibirenge buzwi nka clubfoot bavuzwe, urugendo ruracyahari kuko usanga nko mu bana 1000 bavukanye icyo kibazo abasaga gato kimwe cya kabiri aribo babona ubuvuzi.

Mu nama y’umunsi umwe yateguwe n’Umuryango utegamiye kuri Leta Cure International Ishami ry’u Rwanda ugamije kurandura ubumuga bw’ibirenge abantu bavukana, yahuje abakozi mu by’ubuzima bafite aho bahurira no kugorora ingingo, abayobozi b’ibitaro, abashinzwe ubuzima mu muturere n’abayobozi mu nzego zibanze; hagaragajwe ko buri rwego rwakora ubukangurambaga kugira ngo abana bavukana ubumuga bw’ibirenge babone ubuvuzi.

Dr Dushime Theophile, ushinzwe ibikorwa by’ubuvuzi muri Minisiteri y’Ubuzima yatangaje ko ishishikajwe n’ubuzima bwiza ku bato n’abakuze bityo ababyeyi bakwiye kuba maso ntihagire umwana bavutsa ubuzima bwiza dore ko mituweli ivuza ubu bumuga bwo kuremara ibirenge.

Yagize ati “Uburwayi bwo kuvuka umwana aremaye ikirenge ntawabuhagarika ariko iyo buvuwe burakira. Kuva uyu muryango Cure International watangira abana basaga 4500 batangiye kuvurwa . Ni byiza ko ababyeyi, abajyanama b’ubuzima n’abandi bose bashishikariza ubyaye umwana kureba niba nta bene iki kibazo afite agakurikiranwa hakiri kare kuko umwana umwe kugeza kuri batatu mu bana 1000 avuka aremaye ikirenge.”

Dr Dushime avuga ko ubu burwayi bwo kuremara ikirenge umuntu wese ashobora kubureba ku mwana ukivuka akabubona kuko ibirenge biba bitareshya , kimwe cyangwa byose byigoronzoye .

Umuyobozi w’Umuryango Cure International Ishami ryo mu Rwanda, Uwizeye Esperance, yatangaje ko iyi nama ari nk’impuruza kugira ngo buri wese yumve ko nubwo mu Rwanda abana 1000 bavuka baremaye ariko abagezwa kwa muganga ari bake.

Yagize ati “ Iyi nama igamije guhamagarira buri wese kugeza ubu butumwa ku muryango nyarwanda kugira ngo bumve ko igihe umugore akimara kubyara agomba kureba ko umwana we nta kibazo icyo aricyo cyose afite n’icyo kuremara kugira ngo avurwe hakiri kare.”

Yakomeje agaragaza ko kuva muri 2009 uyu muryango watangira, muri 2015 aribwo ibitaro 22 bya Leta bikorana n’uyu muryango byakiriye abana bagera kuri 650 mu bana 1000 baba bavutse mu gihugu hose.

Yagize ati “ Niba mu mwaka wa 2015 aribwo hakiriwe abana 650 gusa mu bana igihumbi bavukana ubumuga bwo kuremara ibirenge , ni uko hari abandi baba bavukijwe ayo mahirwe yo kuvuzwa kubera ubute bw’ababyeyi cyangwa kubera kumva ko ntacyo bitwaye.”

Cure International Rwanda ni umuryango ufasha abana baba bavukanye ibirenge biremaye kubona ubuvuzi harimo guhabwa isima (platre) ishyirwa ku mwana inshuro umunani ,kumukatira umutsi wo kugatsitsino uba utagororotse ari nawo utuma ikirenge kiremara , kumuha inkweto zambarwa zikamugorora amaguru kugeza ku myaka itanu ndetse no gusubizwa amafaranga umubyeyi aba yishyuye ku bikorwa bikorerwa umwana kuri mituweli.

Ubuyobozi bwa Cure buvuga ko imbogamizi bugihura nazo ariko usanga ababyeyi bacika intege umwana adakize kuko rimwe mu cyumweru umubyeyi aba agomba kujya kwa muganga kureba aho umwana we ageze n’izindi mpamvu zabo bwite.

Uwineza Judith wo mu Murenge wa Gisozi mu Karere ka Gasabo yabwiye IGIHE ko yabonye ko umwana we yavukanye ubumuga bwo kuremara ikirenge amaze iminsi ine abyaye .

Ati “ Nahereye uwo munsi muvuza kugeza ubu afite umwaka n’amezi arindwi , ubu ageze ku rwego rwo kwambara udukweto dutuma amaguru ye agororoka.

Ikibazo abantu bagira ni uko bigora kubana n’umwana ufite isima ku kaguru, hari ubwo abikuraho ugasubirayo, hari ubwo aba ari kure ukabura itike , buri cyumweru kujya kwa muganga biba bigoye ariko iyo ubonye umwana agenda akira urihangana, ugashyiramo umwete.”

Iyo umwana atavuwe akiri muto bisaba ko abagwa kandi birahenda ndetse agatinda gukira.

Cure International yatangiye gukorera mu Rwanda mu mwaka wa 2009 imaze kuvura abana basaga 4500, abaganga 279 ndetse n’abajyanama 37 barahuguwe kugira ngo bakomeze kwita ku bana bavukana bene ibyo bibazo.

Ibirenge bigoramye biravurwa bigakira
Ibirenge by'umwana biragororwa kugeza bikize neza
Umubyeyi avuga ko umwana we arimo kugenda akira
Uwizeye Esperance, Umuyobozi wa Cure International Rwanda
Dr Dushime Theophile, ushinzwe ubuvuzi rusange muri Minisiteri y'Ubuzima

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved