Abahanga bavumbuye ubwoko 36 bwa kanseri zifitanye isano n’umubyibuho ukabije

Yanditswe na Tombola Felicie
Kuya 7 Werurwe 2017 saa 12:27
Yasuwe :
0 0

Uko umubyibuho ukabije ugenda ufata indi ntera ni ko indwara za kanseri zikomeza guhitana abantu benshi dore ko umubare w’abafite umubyibuho wikubye inshuro ebyiri mu myaka 40 ishize.

Ishami ry’Umuryango w’Abibumbye ryita ku buzima (OMS) rigaragaza ko buri mwaka indwara zitandura zitwara abasaga miliyoni 36 ku Isi, aho muri bo miliyoni 14 baba bari munsi y’imyaka irindwi.

Inyigo y’abashakashatsi mu bya siyansi yagaragaje isano iri hagati y’umubyibuho ukabije hamwe n’indwara za kanseri cyane iz’amabere ndetse n’izifata mu nzira z’ubuhumekero.

Topsanté dukesha iyi nkuru itangaza ko umubare w’abafite ibibazo by’umubyibuho ukabije wikubye inshuro ebyiri mu myaka 40 ije ibyo bikaba bigaragazwa nuko muri iyi minsi indwara za kanseri arizo zikomeje gutwara abantu benshi ku Isi.

Abashakashatsi bo muri Kaminuza ya Imperial mu Bwongereza bakoze isesengura ku bushakashatsi 204 butandukanye bwasohotse, basanga hari kanseri 36 zirimo kugenda zigaragara zifitanye isano n’umubyibuho ukabije.

Muri izo kanseri harimo iy’amabere, izifata mu nzira z’ubuhumekero, iy’inkondo y’umura , iy’ubugabo bw’epfo (prostate), iyo mu maraso n’izindi nyinshi.

Ubwo bushakashatsi bwerekanye ko uko umugore wageze mu gihe cyo gucura yiyongereyeho ibiro bitanu ari nako aba yiyongereyeho 11% by’ibyago byo kurwara kanseri y’amabere

Gukomeza kwiyongera ibiro biteza kanseri yo mu mara, kanseri y’uruhago rw’inkari, kanseri yo mu muhogo, kanseri y’intangangore n’izindi.

Maria Kyrgiou na Kostas Tsilidis bamwe mu bakoze ubwo bushakashatsi bo muri kaminuza ya Imperial mu Bwongereza batanze inama z’uko abaganga bakwiye kugira uruhare mu kurwanya ukwiyongera k’umubyibuho ukabije nk’uko barwanya izindi ndwara.

Bati” Ikibazo cy’umubyibuho ukabije kigomba guhabwa umwanya n’abaganga mu gushishikariza abantu kwirinda umubyibuho ukabije kubera kanseri ziwushamikiyeho ndetse n’indwara zidakira.”

Mu Rwanda se byifashe bite?

Nubwo mu Rwanda hatazwi umubare w’abahitanwa n’indwara za kanseri zikomoka ku mubyibuho ukabije, imibare igaragaza ko abagera kuri 21% by’abajya kwisuzumisha kwa muganga bafite umubyibuho ukabije, 15% bafite umuvuduko ukabije w’amaraso naho abagera kuri 3% bafite diyabete.

Mu gushakira umuti icyo kibazo kigenda gifata indi ntera, Leta y’u Rwanda yashyizeho siporo rusange aho abakozi bashyirirwaho siporo buri wa gatanu nyuma ya saa sita ndetse n’icyumweru cya mbere cya buri kwezi hakabaho siporo rusange by’umwihariko ku batuye mu Mujyi wa Kigali.

Umubyibuho ukabije ushobora gutera kanseri zitandukanye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza