IGIHE.com > Ubuzima > Inama
Ikibazo cy’imirire mibi kiracyagaragara no mu ngo zikungahaye

Ikibazo cy’imirire mibi kiracyagaragara no mu ngo zikungahaye


Yanditswe kuya 5-07-2012 - Saa 09:20' na Marie Chantal Nyirabera

Ikibazo cy’imirire mibi ntikigaragara mu bafite amikoro make gusa, no mu bafite ubushobozi usanga imirire mibi iharangwa bitewe no gutunganya amafunguro nabi.

Mu ntangiriro z’uyu mwaka wa 2012, Minisiteri y’ubuzima yatangaje ko imirire mibi mu bana yari ku kigereranyo cya 51%, mu mwaka wa 2011 byari ku kigereranyo cya 41%.

Gahunda zo kurwanya imirire mibi yashyizwemo ubukangurambaga, ari ko si ko bose babikurikiza.

Mu miryango ifite amikoro mu mijyi ndetse no mu mpande zose z’ igihugu, ikibazo cy’imirire mibi kirahaboneka kubera kudategura amafunguro uko bikwiye, ugasanga Muri aya mafunguro hari ayo batekesha amavuta menshi, andi bakayategura adafite intungamubiri zimwe cyangwa arengeje urugero(kuba menshi).

Ibi biterwa n’ikibazo cy’imyumvire ikiri hasi kuri bamwe kuko hari ababa bazi ko ari ubusirimu. Abaganiriye na IGIHE babivuze muri aya magambo bati :”Ikibazo cy’imirire mibi kigaragara no mu ngo z’abantu dufite ubushobozi, hari abikundira guteka amafiriti igihe cyose ,mayonnaise ntibure mu mafunguro ya buri munsi, abandi bikundira kurya inyama nyinshi ntibamenye ko bene aya mafunguro iyo akabije atera indwara z’imirire mibi zirimo diyabeti, umubyibuho ukabaije, umutima n’ ibindi”.

Ikibazo cy’ imirire mibi abantu bemeza ko giterwa n’ ibintu byinshi : Muri byo harimo ubukene, inzara, imyumvire ikiri hasi kuri bamwe, ndetse no kutagira icyo witaho.

Ndagijimana aragira ati :”Hari abantu bafite imirire mibi kubera amikoro make kandi bitakagombye kuba ho, n’ubwo yaba afite ibijumba, n’ibishyimbo yagerageza akabona imboga bityo mu mafunguro ye hakagaragara mo ibyubaka umubiri, ibitera imbaraga n’ ibirinda indwara”.

Si we gusa ugaruka ku kibazo cy’imitegurire y’amafunguro, Benshi mubaganiriye na IGIHE bemeza ko no mu mikoro make ya buri munyarwanda 80% bakabaye bazi gutegura indyo yuzuye mu mikoro bafite.

Nyiramana ni umutegarugori w’abana 2 we n’ umufasha we baragira bati: :”Hari aho usanga ababyeyi barwaza bwaki kubera kutabura ibyo bagaburira abana babo, ahubwo byatewe no kutamenya uko babategurira amafunguro, abandi usanga imirimo yose bayiharira bakozi ku bafite imirimo itandukanye, ntababashe no kubagenzura, ibi biri mu bituma amafunguro ategurwa nabi”.

Abaganiriye na IGIHE bavuze ko ikibabaje ari uko bamwe mu batuye mu cyaro usanga bagurisha imboga, amagi inkoko, inkwavu, imbuto n’ ibindi ntibibuke ko mu ngo zabo baba bagomba kurya amafunguro meza. Abenshi ngo usanga banajyana ibyiza ku isoko bakisigira ibibi no mu bihingwa bisanzwe rimwe na rimwe bakanasiga ibyangirtse.

Mu kwezi kwa Mata 2011, Minisitiri w’Intebe Pierre Damien Habumuremyi yasuye ikigo cy’ubushakashatsi mu buhinzi n’ubworozi gikorera mu Karere ka Huye, Intara y’Amajyepfo aho yafunguye ku mugaragaro ikigo cy’amahugurwa ku iyamamazabuhinzi cyubatswe ku bufatanye bwa Leta y’u Rwanda n’Ubushinwa, Yavuze ko iki kigo kije ari igisubizo ku bibazo by’ubuhinzi n’imirire, yibutsa ko bitarenze impera z’uyu mwaka wa 2012, ikibazo cy’indwara ziterwa n’Imirire mibi kigomba kuba cyabaye amateka mu Gihugu cyacu.

Ikibazo cy’imirire mibi cyanagarutsweho mu ntangiriro z’ umwaka mu kiganiro ngarukakwezi gihuza kigamije kumurika ibyagezweho na guverinoma. Muri icyo kiganiro Minisitiri w’intebe yavuze ko ntawukwiye guca igikuba ko mu Rwanda hari inzara, ko ahubwo bishoboka ko ari imirire mibi, bityo asaba Minisitiri w’ubuzima n’umunyamabanga wa Leta ushinzwe imibereho myiza y’abaturage gukurikirana iki kibazo bakamenya ukuri kwacyo.

Kurwanya imirire mibi ni inshingano za buri wese, abaganiriye na IGIHE bavuze ko abashaka amafaranga bagurisha ibyabafasha kugira ubuzima bwiza mu ngo zabo, bagombye kubanza kumenya guharanira ubuzima buzira umuze bahereye mu miryango yabo.

Abakungahaye bifite nabo bakwiye kumenya uburyo bwo gutegura amafunguro birinda guteka amavuta menshi, birinda ibinyamavuta, inyama zirengeje urugero kuko byagaragaye ko biri mu bitera indwara z’ imirire mibi.

Ifunguro buri munyarwanda asabwa ni irifite intungamubiri zubaka umubiri, izitera imbaraga n’izirinda indwara birimo ibyujuje vitamini A,B, C na D.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO