Ubushakashatsi bwagaragaje ko kwicara umwanya munini bigira ingaruka nk’izo kunywa itabi

Yanditswe na Tombola Felicie
Kuya 7 Nyakanga 2017 saa 11:25
Yasuwe :
0 0

Abashakashatsi bo mu ivuriro rya Mayo ryo muri Leta Florida muri Leta Zunze Ubumwe za Amerika bagaragaje ko ingaruka zo kumara umwanya munini umuntu yicaye zingana n’iz’abanywa itabi ku buzima bwa muntu.

Iterambere rituma abantu benshi bamara igihe kinini bicaye badahaguruka bari mu ngendo zo mu modoka bamaramo amasaha menshi, mu ishuri, imbere ya mudasobwa cyangwa ibindi bikoresho by’ikoranabuhanga mu kazi muri iki kinyejana cya 21.

Ubushakashatsi bwakorewe ku bantu 800,000 bareba uburyo bicara mu gihe gisaga imyaka 15, bwagaragaje ko abantu bicara imbere ya mudasobwa mu gihe cy’amasaha arenga ane badahagurutse bibakururira ibyago byo kwicwa n’indwara iyo ariyo yose ku kigero cya 50%, gufatwa n’indwara z’umutima, kuribwa mu gituza cyangwa se gufatwa n’izindi ndwara ku kigero kiri hejuru ya 125% nk’uko Elcrema ibitangaza.

Umuganga mu ivuriro rya Mayo Clinic, Dr. James Levine, yagize ati “Kwicara igihe kirekire ni nko kunywa itabi.”

Dr. James atanga inama ko kwicara igihe kirekire bidakurura gusa kwiyongera ibiro n’umubyibuho ukabije gusa ahubwo bizana ingaruka zikomeye nko kurwara kanseri, indwara z’umutima nk’uko abanywi b’itabi bibagendekera.

Uyu muganga anavuga ko gukora siporo n’imyitozo ngorangingo bitavanaho ingaruka ingingo ziba zatewe no kumara umwanya munini umuntu yicaye.

Ati “Icy’ingenzi ni ukugerageza uburyo umuntu yagabanya ayo masaha, agacishamo agakora ingendo zituma ananura imitsi.”

Aba bashakashatsi batanga inama ko umuntu aba akwiye gukora uko ashoboye akamara umwanya muto yicaye agacishamo agahaguruka akagendagenda, akongera akicara ariko ntamare amasaha menshi yicaye.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza