Uburyo bwo konsa umwana ukamurinda kugwingira n’izindi nkurikizi zo kutonka neza

Yanditswe na David Eugène Marshall
Kuya 24 Nyakanga 2018 saa 01:18
Yasuwe :
1 0

Muri iki gihe konsa neza umwana bimeze nk’ibyibagiranye kuri bamwe mu babyeyi usanga baratwawe cyane no guhihibikana bashaka imibereho, abadafite ubumenyi ndetse n’abadashaka konsa ngo amabere yabo atagwa, bigatuma imfu z’abana bari munsi y’imyaka itanu, indwara zituruka ku mirire mibi no kugwingira byiyongera.

Abahanga mu by’ubuzima bashimangira ko konka kw’umwana ari umusingi ukomeye w’imibereho myiza mu buzima bwe bwose, ari yo mpamvu ababyeyi bagomba gusobanukirwa neza uburyo bwo konsa neza umwana, by’umwihariko utarengeje amezi atandatu agatungwa n’amashereka ya nyina gusa nta kindi avangiwe.

Konka kw’umwana bitangira agisamwa aho avoma intungamubiri mu byo nyina yariye cyangwa yanyoye. Iyo avutse, ni ingenzi kumwonsa amashereka kugeza ku mezi atandatu nta kindi avangiwe kandi yanahabwa imfashabere ntizifatwe nk’insimburabere.

Ishami ry’Umuryango w’Abibumbye ryita ku buzima (OMS), rigaragaza ko ku Isi yose abana 38% ari bo bonswa amezi atandatu ya mbere. Nko muri Leta Zunze Ubumwe za Amerika abagore 75% batangira konsa ariko abageza ku mezi atandatu ni 13% gusa. Konsa neza bishobora kurinda imfu 820 000 z’abana bari munsi y’imyaka itanu buri mwaka.

Hari uburyo bwihariye n’inyigisho zitangwa n’inzobere, abaganga n’abandi bakurikiranira hafi ubuzima bw’umwana, ku birebana n’ibyo umubyeyi wonsa agomba gukurikiza kugira ngo icyo gikorwa cy’ingirakamaro kibe cyubahirije amabwiriza kandi kigirire umumaro umwana.

Mu kiganiro IGIHE yagiranye n’Umuforomokazi ushinzwe serivisi yo kuvura abana bari munsi y’imyaka itanu mu Kigo Nderabuzima cya Remera mu Karere ka Gasabo, Ufitinema Victoire, yagarutse ku myitwarire n’inama z’ingenzi buri mubyeyi wonsa akwiye gukurikiza kugira ngo yubake neza umusingi w’ubuzima bw’umwana.

Ibyo umubyeyi wonsa agomba kwitaho:

Gukaraba intoki no gusukura ibere mbere yo konsa

Umubyeyi wonsa wese agomba kugira isuku, mbere yo konsa akabanza gukaraba intoki neza n’amazi meza.

Akimara gukaraba, akurikizaho gusukura imoko n’amabere muri rusange akoresheje amazi meza hirindwa ko umwana yakwandura indwara zikomoka ku mwanda mu gihe ari konka.

Kwicara yemye kandi amwenyurira umwana

Ufitinema asobanura ko umubyeyi wonsa agomba kuba yicaye atuje, yegamye, akirinda kunama kandi agafata umwana neza amwegereje ibere amuseguje ikizigira n’ukuboko gusa ukundi kumuzengurutse.

Ikiganza cy’umubyeyi gifata ku kibuno cy’umwana, ikigeretse kuri ibyo kandi ngo isura y’umubyeyi igacya mu maso, akonsa adakambije agahanga, mbega akamwenyurira umwana.

Iyo bigenze gutyo umubyeyi akonsa asa n’uganira n’umwana amuhanze amaso, barebana, amwereka ko amwitayeho, bigira uruhare rukomeye rw’uko umwana akura yiyumvamo igikundiro cy’ababyeyi, ishyerezo bikanagira akamaro ku mibanire ye n’abandi amaze kuba mukuru.

Uko umwana wonka agomba guterurwa

Mu gihe cyo konsa icyo umubyeyi yitondera kandi akurikiza ni ukureba ko umunwa w’umwana ufunguye wose mbere yo kumutamika ibere kandi agatamira imoko yose uko yakabaye, akananwa k’umwana konyine niko gakora ku mubiri w’ibere rya nyina.

Ababyeyi kandi ntibagomba kureka ngo abana babe nk’abakururura ibere baryisangisha, ahubwo uko umubyeyi yicaye yemye yiyegereza umwana mu gituza.
Ibi ngo birinda ko umwana ashobora kuruma no gukomeretsa imoko, bikaviramo umubyeyi gukomereka cyangwa kubabara, agatonganya umwana bikamubabaza, cyane ko umwana we aba adasobanukiwe n’ikosa ryabayeho muri icyo gihe.

Si byiza gusimburanya ibere buri kanya

Abahanga bavuga ko mu gihe cyo konsa gusimburanya ibere n’irindi kandi irya mbere ridahumuje atari byiza kuko umwana aba agomba konka ibere rimwe, ryahumuza akabona gufata irindi.

Ibi bifasha umwana kuvoma mu ibere intungamubiri zose ziba zamaze gukorwa. Ibi bisobanuye ko mu gihe umwana ari konka mu mabere harushaho kwisukiranya iby’ingenzi bigize amashereka, bityo akaba agomba konka izo ntungamubiri ku bwishi bishoboka.

Nibura umwana agomba konka ibere rimwe iminota hagati ya 10 na 15, akabona guhabwa irindi kugira ngo intungamubiri zose abe azonse. Iyo bidakozwe, hari ubwo usanga umwana yonse amazi agakurwa ku ibere atarageza igihe cyo konka amashereka y’ingirakamaro. Ibi bishobora gutuma umwana agwingira kuko yonka nabi.

Umwana agomba konka nibura inshuro umunani ku munsi

Ubusanzwe umwana agomba konka inshuro hagati y’umunani na cumi n’ebyiri nubwo kurenzaho nta kibazo, ni ukuvuga konka nibura buri masaha abiri yaba menshi akaba atatu.

Mu gihe umwana asinziriye ntibyabuza umubyeyi kumukangura ngo yonke, uretse ko abana nabo bakunze kwirwanaho bakarira iyo bashaka konka.

Ufitinema avuga ko abana barengeje amezi atandatu bagomba gutegurirwa imfashabere, ni ukuvuga indyo yihariye yiganjemo ibyubaka umubiri, ibirinda indwara, n’ibitera imbaraga nk’amata, imboga, umuhondo w’igi ariko amashereka agakomeza kugira ubudahangarwa n’akamaro katagereranywa mu buzima bw’umwana.

Gukurikiza gahunda n’amabwiriza yo konsa neza biri mu bigomba kwitabwaho mu guhashya ikibazo cy’imirire n’imikurire mibi mu bana,cyane ko hari abana bahura n’ibizazane by’indwara amashereka yakabaye arinda.

Iyo umwana yonka atamira imoko yose yitegereza mu maso ya nyina
Umuforomokazi Ufitinema Victoire asaba ababyeyi konsa abana bamwenyura

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza