Ubuhamya buburira bwa Usanase wakize kanseri y’inkondo y’umura

Yanditswe na Habimana James
Kuya 3 Ukuboza 2019 saa 08:47
Yasuwe :
0 0

Usanase Angéline utuye mu Mujyi wa Kigali avuga ko yatunguwe no kubona akenda ke k’imbere kanduye, mu bitekerezo bye akibwira ko ari ibihe bye byageze ariko akaza gusanga ari kanseri y’inkondo y’umura.

Usanase mu 2017 nibwo yamenye ko yafashwe na kanseri y’inkondo y’umura, indwara ihangayikishije Isi n’u Rwanda by’umwihariko.

Ikigo gishinzwe Ubuzima mu Rwanda (RBC) kigaragaza ko umwaka ushize habonetse abarwayi 362 bafite kanseri y’inkondo y’umura.

Iyi kanseri iri ku mwanya wa mbere mu Rwanda mu zihitana abantu benshi, ariko iyo umugore ayibonye kare arivuza kandi agakira. Ibi bifite urufatiro no mu buhamya bwa Usanase.

Usanase yasangije abitabiriye inama yahuje abafatanyabikorwa batandukanye harebwa ingamba n’ubufatanye byashyirwaho kugira ngo harandurwe iyi kanseri y’inkondo y’umura, yabereye muri Marriott Hotel kuri uyu wa Kabiri, tariki ya 3 Ukuboza 2019.

Ni inama yitabiriwe na Madamu Jeannette Kagame, abafasha b’abakuru b’ibihugu barimo uwa Botswana, Niger, Tchad n’abandi bafatanyabikorwa. Iri muri gahunda z’Inama mpuzamahanga yiga kuri SIDA n’izindi ndwara zandurira mu mibonano mpuzabitsina (ICASA) iri kubera i Kigali.

Usanase yagarutse ku rugendo rwe rwo kumenya ko arwaye kanseri y’inkondo y’umura n’uko yakurikiye amabwiriza ya muganga.

Yagize ati “Nafashwe mu Ugushyingo 2017, mu gufatwa ni uko nta mihango nari nkijyamo kuko murabona ko nkuze. Nabonye akenda k’imbere karanduye biranyobera, nahise nihitura kujya ku kigo nderabuzima banyohereza mu Bitaro bya CHUK.”

Yakomeje ati “Ngezeyo baransuzumye bambwira ko ndwaye kanseri, nakubiswe n’inkuba mbabaza ukuntu nje ndi muzima bakaba bambwiye ko ndwaye kanseri.”

Usanase avuga ko icyamutabaye ni uko hari umwana wari wamuherekeje, abaganga bahamagaye baba ariwe babwira ikibazo afite.

Avuga ko CHUK nayo yamwohereje ku bitaro bivura indwara za kanseri biherereye i Butaro.

Ati “Nyuma y’ibyumweru bibiri bampaye igisubizo ko ndwaye kanseri ariko itaragera kure, bambwiye ko ndi muri kabiri bityo ko nshobora gukira, ubwo nibwo ubwenge bwagarutse.”

Usanase avuga ko buri kwezi yajyaga i Butaro agafata imiti ndetse agaterwa inshinge, bigeza aho kanseri ishiririzwa arakira.

-  Inama ku babyeyi zo kwisuzumisha

Usanase yavuze ko ababyeyi bakwiye kujya bipimisha kare, ntibavuge ngo ni amafumbi barwaye cyangwa ngo bararozwe.

Yagize ati “Ibyo by’amafumbi ni ibiki? Abaganga barabyize kandi bafite ibyuma. Mu gihe tubonye akantu kadasanzwe tujye tujya kwa muganga tureke kuvuga ngo baraturoze, kanseri ntigomba kudutera ubwoba kuko irakira.”

Imibare igaragaza ko mu Rwanda hamaze kubarurwa abarwaye kanseri y’inkondo y’umura 1304, n’abagore 921 yahitanye.

Kugeza ubu kandi abakobwa 93% uhereye ku myaka 12 bamaze guhabwa urukingo rwa kanseri y’inkondo y’umura.

Kanseri y’inkondo y’umura ishyirwa ku mwanya wa kabiri muri Afurika mu zikunze kwibasira abagore kandi zikica benshi, mu Rwanda ho iza ku mwanya wa mbere. Agakoko ka Human Papillomavirus (HPV) kihariye 99.7% mu gutera kanseri y’inkondo y’umura.

Usanase Angéline yatanze ubuhamya bw'uko yakize Kanseri y'inkondo y'umura, anaburira ababyeyi kwisuzumisha kare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza