00:00:00 IGIHE NETWORK KN KINYARWANDA EN ENGLISH FR FRANCAIS

St Valentin bayizihirije mu bitaro Covid-19 ibarembeje: Ubuhamya bwa Irakiza n’umugore we wari utwite imvutsi

Yanditswe na Muhonzire Sylvine
Kuya 17 Nyakanga 2021 saa 08:47
Yasuwe :
0 0

Irakiza Gilbert w’imyaka 34 na Sandrine Uwase w’imyaka 25 ni umuryango ushakanye vuba wahuye n’insanganya ryo kurwara Covid-19 mu minsi yawo ya mbere, ugakubitika bikomeye mu minsi bishimiraga intambwe bateye mu buzima yo kubana nk’umugabo n’umugore.

Aba bombi bavuga ko Covid-19 bayifataga nk’igihuha ndetse batayihaga agaciro cyane kuko nta n’umwe wari wakayirwaye ariko nyuma y’uko bayikize biyemeje gutanga ubuhamya kugira ngo bahindure abandi bayifata nk’uko nabo bayitekerezaga.

Mu kiganiro bagiranye na Rwanda Today bavuze ko Covid-19 yageze mu rugo rushya rwabo muri Gashyantare 2021, Uwase atwite inda y’amezi arindwi ndetse bari batangiye kubarira iminsi ku ntoki ngo bibaruke imfura yabo.

Ku bw’amahirwe make Uwase niwe wafashwe mbere ayanduza umugabo we gusa umukozi ubafasha imirimo yo mu rugo we ntiyafatwa.

Uwase yagize ati “Nanduye inkorora nkeka ko ari bya bindi bisanzwe, ngura ubuki nivura bya kinyarwanda numva ndi bukire. Twakundaga kubiteraho urwenya banserereza ngo nanduye Covid-19 nanjye nkabiseka, gusa inkorora yaje gukomera nkababara cyane, ndese nkumva nshitse intege igihe cyose namaraga gukorora.”

Hashize igihe gito Irakiza nawe yanduye inkorora, ariko bakabona nta bindi bimenyetso bya Covid-19 bafite birimo umuriro cyanga ibicurane, gusa Uwase atangira gutakaza impumuro, icyanga, ndetse atangira no kuruka.

Babonye ko amazi atakiri ya yandi, bafata icyemezo cyo kujya kwa muganga, bagezeyo basanga banduye Covid-19 bahabwa imiti basubira mu rugo. Hashize iminsi ibiri Uwase araremba kurushaho basubira kwa muganga, bamushyira mu bitaro atwite umugabo we asigara mu rugo.

Uwase yagize ati “Natangiye kugira ubwoba mpangayikira umwana wanjye kuko inkorora nari ndwaye yari ikomeye cyane.”

Irakiza we ati “Natangiye kugira ubwoba kuko bari badutandukanyije nsigaye njye nyine. Kandi hari hageze igihe dukeneranye.”

Nyuma Irakiza yaje kujyanwa mu bitaro asanga umugore we mu bitaro bivurirwamo abarwayi ba Covid-19 biherereye mu Karere ka Kicukiro mu Gatenga, ndetse umunsi w’Abakundanye wa ‘Valentine’s Day’ ubasanga mu bitaro.

Irakiza yagize ati “Nari nkomeye numva ibintu byose bizatugendekera neza.”

Uwase we ati “Nta kindi natekerezaga, ibitekerezo byanjye byose byari byarigiriye ku mwana wanjye ntwite, kuko igihe cyose nabazaga abaganga ngo bandebere ko ntakibazo afite. Bakanyizeza ko nta kibazo afite ariko bangira inama yo gufata inda yanjye igihe cyose nabaga ngiye gukorora.”

Nyuma y’iminsi itatu Irakiza yasezerewe mu bitaro, mu gihe Uwase we yamazemo iminsi 11. Ubu bose barakize nta kibazo bafite barahumurirwa, bafite icyanga ndetse bibarutse imfura yabo y’umuhungu ubu ifite ukwezi kumwe.

Bavuga ko babazwa no kubona abantu batagihangayikishijwe na Covid-19. Bagira inama Guverinoma y’u Rwanda ko ibikorwa byo kwirinda yabirekera abaturage kugira ngo babihe agaciro kurushaho.

Irakiza ati “Bareke abantu bigishe abandi kuko benshi babona bahatirwa gukurikiza amabwiriza na polisi n’abashinzwe ubuzima ntibabihe agaciro kabone n’iyo baba banduye.”

Akomeza avuga ko abantu bose bagiye batanga ubuhamya bw’uko barwaye icyorezo cya Covid-19 hagerwaho byinshi ndetse abantu bakitabira kuyirinda ku buryo yazageraho igatsindwa.

Irakiza na Uwase bavuze ko abantu bose barwaye Covid-19 batanze ubuhamya bw'ibyabayeho abantu bakwitabira kuyirinda ndetse bakayihashya burundu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .