OMS yaburiye Isi ko imibonano yo mu kanwa irimo gukwirakwiza imitezi idakira

Yanditswe na Tombola Felicie
Kuya 12 Nyakanga 2017 saa 11:47
Yasuwe :
0 0

Ishami ry’Umuryango w’Abibumbye ryita ku buzima Oms ryaburiye abatuye Isi ko imibonano yo mu kanwa irimo gukwirakwiza imitezi idakira, nubwo bifwatwa nko gushakisha ibyishimo hagati y’igitsina gore n’igitsina gabo.

Imitezi ni indwara iterwa n’agakoko gato kataboneshwa amaso kitwa Neisseria Gonorrhea mu ndimi z’amahanga, kibasira ingingo zikunze kuba zibobereye nko mu myanya myibarukiro, mu kanwa ndetse no mu bice bimwe na bimwe bigize urwungano ngongozi.

Iyi ndwara ikwirakwizwa binyuze mu mibonano y’ubwoko bwose; yaba imibonano mpuzabitsina isanzwe, iyo mu kibuno ndetse no kanwa.

OMS yatangaje ko ubusanzwe imitezi ikira ariko hadutse indi mitezi yiswe ‘Super gonorrhoea’ itumva imiti iyo ariyo yose ikaba itabasha gukira.

Abahanga barimo kuburira abantu bose kwirinda imibonano yo mu kanwa kuko irimo gukwirakwiza iyo mitezi idakira. Ngo iyo ndwara isa nk’aho ari icyorezo kuko irimo gushyira mu kaga ubuzima bw’abantu benshi hirya no hino ku Isi.

Inzobere ya Loni i Geneve, Teodora Wi yagize ati “ Agakoko k’imitezi gafite ubwirinzi cyane. Igihe cyose ugerageje gushaka imiti yahangana nako, nako kaba kamaze gushaka ubwirinzi butuma ntacyo iyo miti igatwara.”

Yongeyeho ko ugukwirakwira kw’ako gakoko guterwa n’imibonano yo mu kanwa ndetse ngo uko umuntu afata imiti ikanyura aho kibereye mu muhogo bikongerera ubudahangarwa bwo kutagira icyo gatwarwa n’imiti.

Dr Wi yavuze ko abantu batatu umwe wo mu Buyapani ,u Bufaransa no muri Espagne bamaze kugaragarwaho n’imitezi idashobora kugira umuti uyivura, bityo hakaba hari impungenge ko abo ngabo bashobora kwanduza abandi mu gihe hari n’abandi bayifite bataramenyekana.

Uyu muhanga yanavuze ko ukudohoka mu gukoresha udukingirizo nabyo biri mu gukomeza gukwirakwiza izi ndwara zandurira mu mibonano mpuzabitsina.

OMS ikomeje kuburira abantu kwirinda imibonano yo mu kanwa ndetse no gushakisha uko haboneka imiti ihangana n’ako gakoko kadakangwa n’imiti.

Agakoko gatera indwara y'imitezi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza