Minisitiri w’Ubuzima yasabye ko urubyiruko rwakwigishwa kujya rugendana udukingirizo

Yanditswe na Emma-Marie Umurerwa
Kuya 9 Kamena 2018 saa 04:32
Yasuwe :
0 0

Minisitiri w’Ubuzima, Dr Diane Gashumba, yagaragaje ko urubyiruko rukwiye kwigishwa kugendana udukingirizo no kudukoresha mu kwirinda inda zitateguwe.

Mu biganiro byahuje inzego z’ubuzima ku wa 8 Kamena 2018, hagamijwe kurebera hamwe ibijyanye n’uburyo gahunda zo kuboneza urubyaro zarushaho kwitabirwa zikava kuri 48 %, hanagarutswe ku cyifuzo cy’urubyiruko rwifuza ko rwakwemererwa guhabwa imiti yo kuboneza urubyaro nk’uko ihabwa abagore.

Umwe mu rubyiruko witwa Uwamariya Josée, yagize ati “Urubyiruko ruhawe amahirwe yo gukoresha imiti yo kuboneza urubyaro inda zitateguwe zagabanuka ariko yenda kuba badatanga uburenganzira busesuye ni uko babona ko hari ingaruka bishobora kugira.”

Uwitwa Nduwayezu Richard we yatanze igitekerezo cy’uko hakwiye gukoreshwa ubundi buryo kuko kwifata no gukangurira urubyiruko gukoresha agakingirizo asanga bisa n’ibitaratanze umusaruro ufatika.

Yagize ati “Kwifata biragaragara ko byananiranye, urubyiruko rukwiye no guhabwa amahirwe rukabona uburyo bwo kuringaniza urubyaro kandi bukaboneka hose no mu byaro atari mu mujyi gusa.”

Minisitiri w’Ubuzima, Dr Diane Gashumba, yavuze ko kwifata ari cyo cya mbere mu muco nyarwanda,

Yagize ati “Ntabwo imiti yo kuboneza urubyaro aricyo cyonyine gikingira umuntu gusama, reka duhere ku gakingirizo kuko n’iyo bawufata ya SIDA ntabwo uzayikingira ntabwo umwijima uzawukingira tubanze tubigishe agakingirizo, bakamenye bakagendane nk’uko ahandi bikorwa kuko niko kamukingira inda kakamukingiria n’indwara zandurira mu mibonano mpuzabitsina.”

Yakomeje avuga ko hakwiye guterwa indi ntabwe mu kwigisha urubyiruko kudakora imibonano mpuzabitsina idakingiye.

Ati “Ntabwo tugomba gukomeza kwipfuka igitambaro mu maso […] Tugomba rero gutera intambwe tukavuga ngo n’uwabikoze abona afite ikibazo cyo kuba yasama hari imiti dushyira ku mavuriro ihabwa ba bantu bafashwe ku ngufu kugira ngo badasama. Mu bihugu byateye imbere kuba badafite umubare w’izi nda z’indaro ntabwo ari uko abana babo badakora imibonano mpuzabitsina kare, ubu ngubu isi yateye imbere imico iragenda ihinduka ni ukwicara rero abantu bakaganira bakumvikana igikwiye gukorwa kugira ngo ikibazo kirangire.”

Minisitiri w’Ubuzima, Dr Diane Gashumba
Urubyiruko rwifuza ko rwahabwa amahirwe yo kujya ruhabwa imiti ibuza gusama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza