Kwamamaza

Gitega: Meya Nzaramba yasabye abaturage kugira isuku umuco

Yanditswe kuya 13-08-2016 saa 17:27' na Elias Hakizimana


Umuyobozi w’akarere ka Nyarugenge, Kayisime Nzaramba yasabye abaturage bo mu murenge wa Gitega kwita ku isuku yabo haba mu ngo n’aho banyura mu rwego rwo kurushaho kubungabunga ubuzima.

Ibi yabitangaje mu gikorwa cy’umuganda wihariye ugamije gukangurira abaturage kurandura umuco wo kubika imyanda mu ngo wahuje abatuye mu murenge wa Gitega, ubuyobozi bw’akarere ka Nyarugenge na Polisi y’ igihugu kuri uyu wa Gatandatu tariki 13 Kanama 2016.

Ni umuganda wateguwe mu rwego rwo gushyigikira gahunda y’ubukangurambaga bwo gushimangira isuku bwatangijwe n’umujyi wa Kigali na Polisi y’igihugu muri Nyakanga uyu mwaka.

Yagize ati ”Twaje kugira ngo tubakangurire kugira isuku kuko twiyemeje kurwanya umwanda umujyi wa Kigali cyane cyane mu karere ka Nyarugenge, umwanzi witwa isuku nke tugomba kumurwanya dufatanyije.”

Yakomeje agira ati ” Abaturage bacu bagomba kwitabira ibikorwa by’isuku nk’uko amaraso atembera mu mubiri w’umuntu, niko na bo bagomba kugira isuku umuco. Iyo amaraso atagitembera umuntu aba yapfuye ahagaze, isuku rero na yo ni uko, tutayigize umuco wacu ubuzima bwahagarara.”

Nzaramba yasobanuye ko isuku nke ishobora guteza umutekano muke ari nayo mpamvu bafatanyije na Polisi y’igihugu muri uru rugamba.

Umuyobozi mukuru wa Polisi wungirije, DIGP Malizamunda Juvénal wari witabiriye uyu muganda yakanguriye abaturage kurangwa n’isuku muri byose.

Ati ”Ntabwo twajya tubwira abantu ko umujyi wa Kigali ufite isuku gusa kubera mu mihanda myiza ya kaburimbo hameze neza hanyuma twarangiza tukaza kwihisha ahari umwanda. Ntabwo ari byo, isuku ubona mu mujyi ikwiriye no kumanuka igasakara aho uryama, aho utekera, ibintu byawe byose aho bikorera noneho wava no mu rugo usohoka inzira ugendamo ujya muri wa muhanda ukagenda ahantu hacyeye hatunganye.”

Yakomeje agira ati ”Iyo isuku ihari, abantu bafite ubuzima bwiza tuba twumva umutekano wubahirijwe. Isuku n’umutekano biragendana kuko abaturage bafite ubuzima bwiza bagira n’umutekano usesuye kuko umwanda ubateza indwara zishobora kubahungabanya.”

Abaturage bemeye kwikubita agashyi

Bamwe mu baganiriye na IGIHE bagaragaza ko hari intambwe bamaze gutera ugereranije n’isuku nke yakomeje kugaragara muri aka gace gaturiye ruhurura ya Mpazi igabanya umurenge wa Gitega na Kimisagara.

Umwe yagize ati ” Tugomba gukorana n’ikigo gikusanya imyanda, tukanafata amazi aturuka mu ngo ajyana imyanda muri ruhurura ya Mpazi.”

Byukusenge Françoise, umukecuru utuye mu kagari k’ Akabahizi iyi ruhurura iherereyemo yagize ati ” Urebye aho twavuye n’aho tugeze isuku tumaze kuyigira iyacu kandi turifuza ko ikindi gihe muzagaruka muje kudushima kuko dufite ingamba zo kurwanya isuku nke aho iva ikagera.”

Umunyamabanga Nshingwabikorwa w’Umurenge wa Gitega, Monique Huss yashimangiye ko bafashe ingamba zo guharanira kugira isuku.

Yagize ati ” Ingamba ya mbere dufite ni ugukomeza ubukangurambaga mu baturage dukurikije imiturire yabo icucitse, aho badafite ibyobo bifata amazi bakoresha mu ngo zabo turabashishikariza kubicukura. Abaturage bagomba kandi gukorana neza na Koperative ikusanya imyanda iva mu ngo ikagezwa aho igomba kujya kugira ngo isuku igirwe umuco.”

Yakomeje agira ati ” Uyu munsi biragaragara ko hari aho turi kuva n’aho turi kugana kuko abaturage batangiye kubigira ibyabo bafatanije n’ubuyobozi, tukaba twizera neza kuzagaragaza ubudasa.”

Umurenge wa Gitega waje ku mwanya wa gatatu mu mirenge icumi igize akarere ka Nyarugenge mu isuzuma ry’isuku riherutse gukorwa muri Kamena.

Meya w'akarere ka Nyarugenge, Kayisime Nzaramba yasabye abaturage kugira isuku umuco wabo
DIGP Malizamunda Juvénal yakanguriye abaturage kurangwa n'isuku ahantu hose bahereye mu ngo zabo
Polisi y'igihugu n'abaturage bo mu murenge wa Gitega mu muganda
Umuyobozi w'umurenge wa Gitega, Monique Huss yemeje ko bakomeje ubukangurambaga bwo kurwanya isuku nke
Umuganda witabiriwe n'abayobozi batandukanye barimo abapolisi, abasirikare
ACP Celestin Twahirwa(uwa kabiri uhereye iburyo) na we yitabiriye uyu muganda udasanzwe wabereye mu murenge wa Gitega
Abaturage bafatanyije n'abayobozi mu muganda udasanzwe
Abaturage bemeje ko bagiye kongera ingufu mu gukora isuku

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 29 Nzeri 2016
Copyright © 2009 -2014 - IGIHE Ltd - All Rights Reserved