00:00:00 IGIHE NETWORK KN KINYARWANDA EN ENGLISH FR FRANCAIS

Ni ibibazo byo mu mutwe! Inzobere zavuze ku bajya kugaragaza agahinda kuri YouTube

Yanditswe na Mukahirwa Diane
Kuya 3 Ugushyingo 2021 saa 10:38
Yasuwe :
0 0

Abakurikiranira hafi imbuga nkoranyambaga cyane YouTube, bamaze iminsi babona ibiganiro bigaruka ku buzima bwite bw’abantu haba ku byiza n’ibibi banyuzemo.

Ni ibisanzwe kuba umuntu runaka yajya mu itangazamakuru cyangwa ahandi hantu hahurira abantu benshi agatanga ubuhamya bw’ibyo yanyuzemo, kugira ngo bibe isomo ku bandi no kuruhura umutima we.

Muri iyi minsi hari abajya kuvuga ku buzima bwabo, batagamije gutanga isomo ahubwo bashaka ko abantu babumva bakabafasha mu buryo butandakunye.

Harimo abashakanye bagaragaza uburyo babihiwe n’urushako, abana bagowe n’ababyeyi, abafashwe ku ngufu n’abandi bakomerewe n’ubuzima banyuzemo.

Iyo urebye benshi mu batanga ubuhamya ubona ko bafite ibikomere ku mutima kuko hari aho bagera bagasuka amarira bigaragaza ko imitima yabo ikomeretse ku buryo byabaviramo no kugira ibibazo ku buzima bwo mu mutwe nko kurwara agahinda gakabije n’izindi ndwara.

Iki ni kimwe mu bimenyetso byerekana ko Abanyarwanda benshi bagendana indwara zo mu mutwe batabizi nk’uko byagaragajwe n’Ikigo cy’Igihugu gishinzwe Ubuzima (RBC), giheruka gutangaza ko 20,5% by’Abanyarwanda bangana na miliyoni 2.6 bagendana indwara zo mu mutwe.

Kugendana izi ndwara ni byo bibyara bimwe mu bibazo sosiyete ihura na byo nko kuba abarwaye bagera aho bumva barambiwe ubuzima bakaba bakwiyahura, igikorwa kimaze iminsi kigaragara mu Rwanda.

Muri Kanama 2021, Urwego rw’Igihugu rw’Ubugenzacyaha (RIB), rwatangaje ko mu mwaka wa 2019/2020, umubare w’abantu biyahuye mu Rwanda wari 291 mu gihe mu 2020/2021 bari 285.

Iyi mibare ni yo igaragaza ko hari benshi bafite ibibazo byo mu mutwe ariko bititabwaho byamara kubarenga akaba ari bwo bajya nko ku mbuga nkoranyambaga cyangwa mu itangazamakuru kugaragaraza agahinda kabo.

Mu kiganiro IGIHE yagiranye n’Umuhanga mu by’imitekerereze n’imyitwarire, Dr Kazungu Denis, yavuze ko umuntu agera igihe cyo kujya kuvuga ibibazo ku mugaragaro kuko biba bimaze kumurenga.

Yagize ati “Umuntu ajya ku karubanda kubivuga kuko biba byamurenze, biza gahoro gahoro. Ubwonko bumeze nk’icupa ry’amazi iyo ryuzuye ugasukamo andi hameneka menshi cyane.”

“Ubwonko bugira ibintu bwakira ariko haba igihe bunanirwa, nibaza ko kujya ku karubanda kandi n’umuco wacu udateye gutya, nk’iyo umuntu yafashwe ku ngufu akajya kubivuga, biba byamurenze.”

Yakomeje avuga ko iyo ibibazo byamaze kumurenga we ashaka aho ajya kuruhukira akaba yajya nko kuri YouTube ariko hari ubwo bitagenda neza bikamuviramo ibindi bikomere.

Ati “Kubivuga biramuruhura kuko we aba asaba ubufasha nubwo ataba abizi. Araruhuka kuko abivuze ariko hari abatamwumva bakamucira urubanza bakamuseka kuko yabivuze. Uwabivuze asubira inyuma akajya kureba ibyo abantu babivuzeho, iyo abonye hari abamututse birushaho kumukomeretsa, bikamutera no kwicuza icyatumye ajyaho.”

Dr Kazungu avuga ko abantu bajya kubivuga mu itangazamakuru kuko batazi ko ubu ari uburwayi buvurwa nk’izindi ndwara bagahitamo kujya gushaka aho bakura ubufasha.

Yakomeje agira ati “Ibi ni ibibazo biza buhoro buhoro ariko usanga benshi badasobanukiwe ko bashobora kwivuza nk’uko bagusangamo diabète ukivuza. Abantu ntibatekereza kwivuza ahubwo usanga avuga ngo ndahura n’uwo tuganira antege amatwi amfashe. Simvuze ko bidafasha birafasha ariko ntabwo bigukiza.”

Yaboneyeho kugira abantu inama bumva baremerewe n’ibibazo n’abari hafi y’ababifite ko bakwiye kujya kwa muganga bagahabwa ubufasha bukwiye.

Ati “Nk’uko ujya kwa muganga bakagufata amaraso ni na ko no mu buzima bwo mu mutwe bagira ibizamini bagukorera bakamenya uko bagufasha. Abantu bari hafi y’uwo muntu bakwiye kumushishikariza kwivuza.”

Mu bitaro bya Leta uhasanga ishami rishinzwe ubuzima bwo mu mutwe ndetse no mu mavuriro yigenga haba hari abajyana kuri izi ndwara.

Umuntu ashobora gutanga ubuhamya kuri Youtube yasubira inyuma kureba icyo abandi bavuze kubyo yatangaje akababara kurushaho bitewe n'uko hari ababyumvise ukundi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .