Kwamamaza

CHUB: Abarwaye amaso ntibazongera kujya kugura indorerwamo hanze

Yanditswe kuya 17-08-2016 saa 11:40' na Prudence Kwizera


Ubuyobozi bw’Ibitaro bya Kaminuza bya Butare (CHUB), buvuga ko kuri ubu nta murwayi w’amaso ubigana uzongera kujya kugura hanze indorerwamo, kuko ubu serivisi zose azajya azihababwa ku buryo bwuzuye.

Ni nyuma y’aho umushinga witwa “One Sight” uzobereye mu bijyanye n’indwara z’amaso kuri uyu wa kabiri taliki ya 16 Knama 2016, wamurikaga ibikoresho bifasha muri serivisi z’ubuvuzi bw’amaso abagana CHUB bahabwa.

Ubusanzwe abivuriza indwara z’amaso kuri CHUB bajyaga basuzumwa, ariko byaba ngombwa ko bakenera indorerwamo z’amaso bagasabwa kujya kuzigurira hanze kuko mu bitaro ntazihaboneka.

Umukozi ushinzwe serivisi z’ubuzima muri CHUB, Dr Jules Ndoli Minega, avuga ko kuba ibi bitaro bibonye ibikoresho bihendutse, bisobanuye serivise nziza ku barwayi baza babagana.

Dr. Ndoli Minega ati “Ibikoresho Umushinga One Sight wazanye ni ibidufasha guha serivisi nziza abaza kwivuza amaso, kuko ubundi bazaga tukabasuzuma noneho abakeneye indorerwamo tukabandikira bakajya kuzigura hanze”.

Umuyobozi w’umushinga One Sight mu Rwanda, Vincent Tuzinde, yasobanuye ko bazanye ibikoresho muri CHUB mu rwego rwo gufasha abarwayi b’amaso guhabwa serivisi biboroheye ndetse no kubona indorerwamo ku giciro gito.

Tuzinde ati “Twazanye indorerwamo ziri mu bwoko butatu, hari izivura amaso ku muntu utabasha kureba kure cyangwa utabasha kureba hafi, hari n’izifasha kwirinda indwara ziterwa n’imirasire y’izuba, kandi guhera ku mafaranga ibihumbi bitanu umuntu abasha kubona indorerwamo”.

Nyuma yo kumurikirwa aho serivisi z’ubuvuzi bw’amaso zigiye kujya zitangirwa muri CHUB, bamwe mubahivuriza bavuze bishimiye ko bagabanyirijwe urugendo, kandi n’ibiciro byagabanyijwe.

Epiphanie Mutumwinka ati “Amaso yanjye arimo ubuhumyi ubu sinshobora kureba ikintu kitanyegereye, narivuje banyandikira kujya kugura indorerwamo ariko banciye ibihumbi 70 ndabibura, ubu rero ndishimye kuko batubwiye ko hano bayazanye kandi ufite ibihumbi bitanu nawe yayahabwa”.

Ubwo hamurikwaga ibi bikoresho, abaturage bahawe ubutumwa ko kwirinda biruta kwivuza, bityo basabwa kwisuzumisha amaso hakiri kare kuko iyo bigaragaye hakiri kare ko arwaye avurwa agakira.

Mu mwaka wa 2014, nibwo uyu mushinga One sight watangiye gukorera mu Rwanda, icyo gihe ugeragerezwa mu bitaro bikuru bya Ruhengeri, aho ababigana basuzumwaga abandi bagahabwa indorerwamo z’amaso kubufatanye na Minisiteri y’Ubuzima.

Izi serivisi zimaze kugeza mu bitaro bine birimo ibya Rwamagana, CHUK, Ruhengeri na CHUB, bikaba biteganyijwe mu myaka ine zizaba zimaze kugezwa mu bitaro byose ba Leta.

One sight ni umushinga umaze imyaka 28 ubayeho ku isi ukaba waratangiye gukorera muri Leta Zunze Ubumwe za Amerika, naho muri Afurika uhamaze imyaka itandatu.

Bimwe mu bikresho by'ubuvuzi bw'amaso byamuritswe
Abakozi b'Umushinga One Sight n'aba CHUB mu ifoto rusange

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved