Abinangira kuboneza urubyaro baburiwe ko biyongerera ibyago byo gupfa

Yanditswe na Evariste Nsengimana
Kuya 12 Ukwakira 2018 saa 04:58
Yasuwe :
0 0

Abanyarwanda badakozwa ibyo kuboneza urubyaro bagatsimbarara ku kubyara abana benshi, baburiwe ko biyongera ibyago byo gupfa, byibasira cyane ababyaye bakuze.

Izi nama zatangiwe mu Karere ka Burera na Minisitiri w’ubuzima, Dr. Diane Gashumba, kuri uyu wa 12 Ukwakira mu gikorwa cyo gusoza icyumweru cyahariwe ubuzima bw’umwana n’umubyeyi.

Minisitiri Gashumba yababwiye ko ’Iyo umubyeyi abyaye abana ashoboye kurera, ntabyare indahekana, akiha umwanya wo kuruhuka bituma aramba, yirinda impfu za hato na hato.’

Igenzura ryakozwe mu 2015 ku mibereho y’abaturage mu Rwanda (DHS) riba rimwe mu myaka itanu, ryerekanye ko ababyeyi bapfa mu gihe cyo kubyara bageze kuri 210 ku bihumbi 100 mu 2015. Bivuze ko u Rwanda rusabwa kugabanya 10 ku bihumbi 100.

Dr Gashumba yakomeje agira ati “Wa mugore ubyara buri mezi icyenda cyangwa buri mwaka, aba yongera n’ibyago byo gupfa kuko ababyeyi benshi dupfusha, tubapfusha bava igihe babyara”.

Yababwiye ko abenshi bapfa urwo rupfu baba bagiye kubyara inda guhera ku mbyaro ya kane kuzamura.

Uretse urupfu, kubyara kenshi Minisante ivuga ko ari n’umutwaro ukomeye ku muryango no ku gihugu, kuko bigorana mu kubateganyiriza ndetse no mu igenamigambi.

Binatuma abana baba inzererezi, bikabagiraho ingaruka zirimo guterwa inda zitateguwe, guta ishuri n’izindi.

Guverineri w’Intara y’Amajyaruguru, Gatabazi Jean Marry Vianney, yabwiye abaturage ati “Tugomba kuboneza urubyaro dushaka ubuzima bwiza, ariko ntibigomba guhera mu magambo, bigomba gushyirwa mu bikorwa.”

Abaturage bakanguriwe kuboneza urubyaro, gusama inda bateguye, kubyara abana bahuje n’ubutunzi bwabo kandi bakanabyarira kwa muganga.

Minisante ivuga ko abanyarwanda bakoresha uburyo bugezweho bwo kuboneza urubyaro biyongereyeho 4% mu 2000, na 45% mu 2010 naho mu 2015 biyongerera 48%. Abakoresha ubwo aribwo bwose mu 2015 bari 53%., Mu Karere ka Burera ababoneje urubyaro ni 34%.

Minisitiri Dr Gashumba yavuze ko iyo umubyeyi ataboneje urubyaro aba yiyongerera ibyago byo gupfa
Guverineri Gatabazi yabwiye abaturage ko kuboneza urubyaro ari inkingi y'ubuzima bwiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza