00:00:00 IGIHE NETWORK KN KINYARWANDA EN ENGLISH FR FRANCAIS

Utaranigwa agaramye: Ubuhamya bw’abasuzuguye Covid-19 ikabazonga

Yanditswe na Mukahirwa Diane
Kuya 14 Ugushyingo 2021 saa 12:39
Yasuwe :
0 0

N’ubu hari abakibifata nk’ibihuha, birengagije ingaruka zose Isi iri kunyuramo guhera mu mpera za 2019 ubwo u Bushinwa bwatangazaga ko bwibasiwe na virusi nshya, ikabatizwa Covid-19.

Umunyarwanda yaciye umugani ko ‘utaranigwa agaramye agira ngo ijuru riri hafi’. Ni umugani ugaruka cyane iyo uganiriye na bamwe mu bahoze bakerensa Covid-19 bayifata nk’indwara isanzwe ariko bayirwara ikaza kubazonga.

Muri Werurwe 2020 ubwo iki cyorezo cyageraga mu Rwanda abantu bakivuzeho amagambo atandukanye. Hari abemera ko kiriho kandi cyica ariko hari n’ikindi gice kigaragaza ko iyi ari politiki utamenya aho ishingiye nka bimwe bya Perezida Donald Trump wigeze kuvuga ko ari ‘inkorora’ izagera aho ikagenda.

Benshi batangiye kwemera ko ibaho ubwo yari itangiye kurembya bamwe no guhitana abandi, cyangwa se ikagira inshuti n’abavandimwe izahaza.

Mukeshimana Athanasie yabwiye IGIHE ko yumvaga Covid-19 ari indwara idapfa gufata buri muntu wese, n’uwo ifata ari umwe uhora mu ngendo mu bihugu byinshi uhura n’abantu batandukanye.

Yagize ati “Narwaye Covid-19 muri Kamena ariko kuva igihe yaziye nari ntaremera ko njye yamfata, numvaga uko bayivuga hajyamo ibikabyo no gukomeza ibintu. Natekerezaga ko ari indwara y’abakire bahora mu ndege njye ntaho twahurira.”

Ntaganda Jean Claude we ngo iyo yumvaga bavuga Covid-19 atarabona umuntu azi uyirwaye, yabifataga nk’ibihuha ahubwo akibaza impamvu bashyira imbaraga mu kubeshya abantu.

Ati “Nziranye n’abantu benshi cyane kandi turavugana, nibazaga ukuntu muri abo bantu bose nta n’umwe barayisangana nzi ahubwo nkibaza icyihishe inyuma y’icyinyoma turi kubeshywa.”

Iminsi iba myinshi igahimwa n’umwe gusa aba n’abandi batizeraga ko iki cyorezo cyabageraho baje kucyandura ndetse kibagiraho ingaruka zitandukanye ku buzima no mu bukungu.

Mukeshimana avuga ko yaje kurwara akamara igihe mu kato adakora ndetse bigahurirana n’ubundi burwayi akabura uko afashwa ubuzima bukagenda nabi.

Yagize ati “Nararwaye njya kwa muganga numva ari Malaria babura indwara kandi ndembye, niko kumfata ikizamini cya Covid-19 basanga ndayirwaye. Icyo gihe nagiye mu kato kugira ngo ntanduza abandi mara iminsi 14 ndwaye.”

“Ariko mu kuyirwara nahuye n’ikibazo cyo kurwara iryinyo mbajije kwa muganga bambwira ko batarikura kuko nkirwaye, bandangira imiti igabanya uburibwe ariko ryandiye kugeza nkize. Nahise mbona ko iki cyorezo gikomeye.”

Ababanje gukerensa Covid-19 bakayirwara bagira inama Abanyarwanda gukaza ubwirinzi

Ntaganda we avuga ko kurwara iki cyorezo abifata nk’igihano cy’Imana kuko yabanje gusuzugura iyo ndwara cyane.

Ati “Njye navuga ko Imana yampannye pe! Kuko nabonaga umuntu wubahirije amabwiriza nkamubwira ko ari gukabya ku busa, naje kurwara njya kwa muganga mbura umwuka kandi nsanzwe ngira imbaraga ariko nararembye ndavuga nti uru nirwo rupfu rwanjye, biza kurangira nitaweho ndakira.”

Abanennye urukingo babonye amasomo

Ku wa 5 Werurwe uyu mwaka u Rwanda rwatangiye ibikorwa byo gukingira iki cyorezo ariko hari abantu bagiye banga kwikingiza bavuga ko hari ingaruka bishobora kugira ku buzima bwabo.

Gasana ni umwe mu bantu bumvaga ko gufata urukingo bitihutirwa ndetse atekereza ko uwarwaye COVID-19 adashobora kongera kuyandura ariko ubwo yamufataga yabonye ko yibeshyaga.

Yagize ati “Umwaka ushize umuntu tubana yarwaye Covid-19 njye ngiye kwipimisha basanga ntayo mfite mpita numva ko ubwo nayirwaye igakira si mbimenye nta shobora kongera kuyirwara, maze kuyandura numvise ko nta kabuza umuntu wese ashobora kuyandura.”

“Habayeho ibikorwa byo kwikingiza njye sinajyayo ku kazi baraduhamagara ngo mujyeyo, sinajyayo kuko mfite ubundi burwayi mu mubiri nti reka mbanze ndebe uko urukingo rukora. Nkimara gukira bukeye nahise njya kwikingiza kuko naravuze ngo reka wenda urukingo arirwo ruzakora.”

Mukeshimana na we avuga ko yari yaranze kwikingiza ndetse n’amabwiriza ya Covid-19 atayubahiriza uko bikwiye, yibutse ububabare yagize yahise ahindura ibitekerezo.

Yagize ati “Nkora ahantu mpura n’abantu benshi ariko wasangaga ntambara neza agapfukamunwa ndetse naranze no kwikingiza. Nyuma yo kurwara nahise mbona isomo ndikingiza; ubu amabwiriza yo kwirinda ndayubahiriza bikomeye.”

Usibye abakuyemo isomo ryo kutikingiza, Ntaganda we avuga ko yamaze ibyumweru bibiri birenga mu bitaro kandi asanzwe ari umucuruzi avamo asanga hari ibyo yahombye.

Yagize ati “Buri kintu cyose gisiga amasomo ariko Covid-19 yampaye akomeye. Nararwaye mara igihe kwa muganga usibye gusimbuka urupfu ubusanzwe ndi umucuruzi, icyo gihe namaze nasanze abakozi baridagaduye nsigaye mu gihombo ubukungu bujya hasi cyane.”

Aba bose icyo bahurizaho ni ukugira inama buri wese kwirinda Covid-19 akayirinda n’abe haba uwikingije n’utararufata n’ubwo abakingiwe bataremba ariko igihe umara ntubura ibyangirika.

Nubwo ibikorwa bitandukanye bikomeje gukomorerwa mu Rwanda, inzego zibishinzwe zikomeje kugira abantu inama yo gukomeza kubahiriza amabwiriza arimo kwambara agapfukamunwa, gukaraba intoki kenshi, guhana intera no kwikingiza.

Kugeza ubu abasaga miliyoni enye mu Rwanda bamaze guhabwa urukingo rwa Covid-19 nka bumwe mu buryo rukumbi bwo guhashya burundu icyo cyorezo.

Umubare w'abarwaye Covid-19 ugenda ugabanuka kubera imbaraga zishyirwa mu kwirinda (Ifoto: RBA)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .