00:00:00 IGIHE NETWORK KN KINYARWANDA EN ENGLISH FR FRANCAIS

USA: Ntibikiri ngombwa kwambara agapfukamunwa ku bakingiwe Covid-19

Yanditswe na Muhonzire Sylvine
Kuya 14 Gicurasi 2021 saa 08:49
Yasuwe :
0 0

Ikigo cyo muri Leta Zunze Ubumwe za Amerika gishinzwe kurinda no kurwanya indwara z’ibyorezo (CDC) cyatangaje ko bitakiri ngombwa ko uwakingiwe Coronavirus yambara agapfukamunwa cyangwa ngo ahane intera na mugenzi we, kabone n’iyo yaba ari kumwe n’uwanduye Coronavirus.

Iki kigo kivuga ko mu gihe umuntu amaze ibyumweru bibiri akingiwe inkingo ebyiri za Pfizer-BioNTech cyangwa Moderna, cyangwa se yarakingiwe urukingo rumwe rwa Johnson & Johnson, aba afite ubudahangarwa buhagije ku buryo adashobora kwandura ndetse ko abishatse yatangira gukora n’imirimo yakoraga mbere y’uko Covid-19 ikwirakwira isi.

Nubwo ariko bishoboka ko uwakingiwe Covid-19 atakongera kuyandura, ntiyemerewe gukuramo agapfukamunwa cyangwa kwegerana n’abandi mu gihe amategeko y’igihugu abamo atabimwemerera.

Mu gihe umuntu amaze ibyumweru bibiri ahawe urukingo rwa kabiri rwa Coronavirus [ku nkingo zitangwa ari ebyiri] akumva afite ibimenyetso nk’ibya Covid-19, CDC imugira inama yo kugana mu muganga ndetse agakomeza gukurikiza ingamba zose zo kwirindwa Covid-19.

Gusa kubera icyizere inkingo za Covid-19 zimaze gutanga, biragoye ko wapfa kubona uwayanduye kandi yarakingiwe neza nkuko biteganywa.

Muri Amerika ho umunyagihugu wakingiwe Coronavirus yemerewe kwinjira cyangwa gusohoka mu gihugu bitabaye ngombwa ko yipimisha Covid-19 cyangwa ngo amare iminsi runaka ari mu kato mu gihe aturutse mu kindi gihugu.

Bitandukanye n’umunyamahanga winjira muri Amerika, kuko we agomba kwerekana ibipimo bya Covid-19 bitarengeje iminsi itatu, cyangwa icyemezo cyerekana ko yakize Coronavirus mu mezi atatu ashize.

CDC igira inama abantu bose, abakingiwe n’abatarakingiwe gukomeza kwambara agapfukamuwa no gusiga intera hagati yabo na abagenzi babo cyane igihe bari muri bus, mu ndege cyangwa muri gari ya moshi, kuko ari ahantu hahurira abantu baturutse imihanda yose kandi inkingo za Covid-19 zikaba zitaragaragaza ko zishobora kurinda Coronavirus yihinduranyije iri kugaragara mu bihugu bimwe na bimwe.

Uretse n’ibyo, ntiharamenyekana ubushobozi urukingo rwa Covid-19 rufite ku muntu ufite umubiri w’intege nke, ndetse n’igihe rushobora kumara mu mubiri w’uwarutewe.

Uwakingiwe Coronavirus si ngombwa ko yambara agapfukamunwa cyangwa ngo asige intera hagati ye na mugenzi we, uretse igihe amategeko y'igihugu abamo abimusaba /Ifoto: Siphiwe Sibeko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .