00:00:00 IGIHE NETWORK KN KINYARWANDA EN ENGLISH FR FRANCAIS

Umwaka urashize umuntu wa mbere ahitanywe na Covid-19 mu Rwanda

Yanditswe na Zigiranyirazo Bajecteur
Kuya 30 Gicurasi 2021 saa 09:58
Yasuwe :
0 0

Ku mugoroba wo ku wa 30 Gicurasi 2020 ni bwo Minisiteri y’Ubuzima yatangaje ko umurwayi wa mbere mu Rwanda yahitanywe n’icyorezo cya Covid-19.

Icyo gihe Minisiteri y’Ubuzima yatangaje ko uwahitanywe n’iki cyorezo giterwa n’agakoko ka Coronavirus ari umushoferi w’imyaka 65 wari usanzwe utuye mu gihugu cy’abaturanyi ariko agahitamo kuza mu Rwanda nyuma yo kumva arembye. Yaraje yitabwaho n’abaganga ariko nyuma aza gupfa azize kwangirika kw’imyanya ye y’ubuhumekero.

Icyorezo cya Coronavirus cyagaragaye bwa mbere mu mpera za 2019 i Wuhan mu Bushinwa maze Ishami ry’Umuryango w’Abibumbye ryita ku Buzima, OMS ryemeza iby’iki cyorezo nk’icyugarije Isi ku wa 30 Mutarama 2020.

Iki cyorezo cyakomezaga kugenda kirushaho gukaza umurego mu bice bitandukanye by’Isi cyahawe izina rya Covid-19 na OMS ku wa 11 Gashyantare 2020.

Coronavirus twasomaga mu bitangazamakuru mpuzamahanga, tuyibona nk’iri kure y’Abanyarwanda yakomeje gukwirakwira mu mfuruka zose z’Isi.

Inkuru mbi yamenyekanye ku wa Gatandatu wo ku wa 14 Werurwe 2020 ubwo byemezwaga ko Umuhinde ukorera rimwe mu mashami ya Loni yasanganywe iki cyorezo nyuma y’urugendo yari avuyemo i Mumbai.

Guverinoma y’u Rwanda yahise ifata ingamba zitandukanye zigamije gukumira ikwirakwira ry’iki cyorezo, ahanini zijyanye no guhagarika ibikorwa bihuza abantu benshi.

Iki cyorezo cyari kitarabonwaho amakuru menshi akerekeye, ku wa 30 Gicurasi umwaka ushize ni bwo byatangajwe ko cyahitanye umuntu wa mbere ku butaka bw’Urwa Gasabo.

Iyi nkuru na yo yaciye igikuba mu Banyarwanda ahanini kubera n’imyumvire y’abakerensaga iki cyorezo bagifata nk’indwara isanzwe idashobora kwica umuntu byoroshye.

Kuva icyo gihe, abantu 352 bamaze guhitanwa na Coronavirus mu barwayi bayo 26.892 bakuwe mu bipimo 1.435.523 byafashwe kuva iki cyorezo cyagera mu Rwanda.

Mu basanzwemo iki cyorezo, abakize ni 25.602 mu gihe abakiri kwitabwaho mu bitaro ari 938.

Kuva aho hatangiriye ibikorwa bitandukanye byo gutanga urukingo rwa Covid-19, mu Rwanda hamaze gukingirwa abagera ku 350.400 ndetse n’abandi baracyaruhabwa mu bice bitandukanye by’igihugu.

Kugeza ubu Akarere ka Nyarugenge ni ko kamaze kugira imibare myinshi y’abamaze kwandura no guhitanwa n’iki cyorezo aho hamaze kwandura abagera ku 4168 na ho abagera kuri 74 bakaba bamaze guhitanwa na cyo. Abantu bari hagati y’imyaka 60 na 69 ni bo bamaze guhitanwa na Coronavirus ari benshi aho hamaze gupfa 85.

Ikigo cy’Igihugu gishinzwe Ubuzima, RBC, gitangaza ko abagabo ari bo benshi bamaze guhitanwa n’iki cyorezo aho kimaze guhitana 227 bangana na 64.69% na ho abagore ni 125 bangana na 35.51%.

Indi nkuru wasoma: Umwaka urashize Coronavirus igeze mu Rwanda: Incamake y’ibyaranze ibihe bidasanzwe ku gihugu

Ku wa 3 Werurwe 2021 ni bwo u Rwanda rwatangiye kwakira inkingo za Coronavirus, icyiciro cya mbere hakiriwe 240.000 za AstraZeneca mu gihe icya kabiri cyakiriwe ari iza Pfizer zingana na 102.960

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .