U Rwanda rurateganya gutangira gupima ubwoko bushya bwa COVID-19 “mu gihe cya vuba”

Yanditswe na IGIHE
Kuya 25 Mutarama 2021 saa 09:24
Yasuwe :
0 0

Minisiteri y’Ubuzima yatangaje ko iri hafi kubona ubushobozi bwo gutangira gupima ubwoko bushya bwa Covid-19 bumaze iminsi buvugwa hirya no hino ku Isi, aho bwandura kandi bukica mu gihe cya vuba.

Ubu bwoko bushya bwa Covid-19 buherutse kuvugwa muri Kenya no mu bindi bihugu bitandukanye bya Afurika, gusa Kenya niyo ya hafi y’u Rwanda bwagaragayemo. Buvugwaho kuba bwandura vuba ku kigero cya 70% ndetse bukica n’umuntu buva ugeranyije n’ubwari busanzwe bumaze umwaka urenga buyogoza Isi.

Minisitiri w’Ubuzima, Dr. Daniel Ngamije, mu kiganiro yakoreye kuri Televiziyo y’u Rwanda ku cyumweru tariki ya 24 Mutarama ari kumwe n’abandi bayobozi batandukanye, yavuze ko ubu bwoko butaratangira gupimirwa mu gihugu ariko ko hitezwe ubushobozi bwo kubikora mu gihe cya vuba.

Ati “Ntabwo turayisuzuma ngo tuvuge ngo ng’iyi, ngo ufate virus dusanganywe n’iyo yindi kuko hari virus yo muri Afurika y’Epfo cyangwa u Bwongereza cyangwa ahandi ariko ni ubushobozi buri kubakwa kandi mu minsi ya vuba turaba tubufite abantu baturuka hanze cyane cyane mu bagenzi baturuka hanze nihagira abo tubona bafite ubwandu bwa Covid-19 by’umwihariko tuzashaka gukurikirana ngo ese bafite ubuhe bwoko bwa virus?”.

Abahanga mu by’ubuzima basobanura ko virus zihinduranya ziba zifite umutima witwa RNA ushinzwe kubika amakuru ya virus ndetse ukayifasha kwihinduranya. Covid-19 nayo ni imwe muri izo virus, ku buryo n’abashakashatsi bari biteze ko ishobora kwihinduranya.

RNA, Ribonucleic Acid, umuntu yayisobanura nk’intima nto zihuza kugira ngo zikore igikorwa runaka. Urugero, ihuriro rya RNA ni zo zihura kugira ngo zikore ibyubaka umubiri (protéine) bifasha ingingo zawo gukura.

RNA ni yo yifashishijwe n’abahanga mu gukora inkingo bakora urwa Pfizer / BionTech ndetse n’urwa Moderna.

Kwihinduranya kwa virus bizwi nka ‘mutation’ mu ndimi z’amahanga, kubaho mu buryo bubiri. Ubwa mbere iba yihinduranyije ku buryo bukabije cyane mu gihe ubwa kabiri bwitwa ‘minor mutation’ iba yihinduranyije ku buryo bworoheje ndetse bikunda kugaragara kuri virus nyinshi cyane zirimo na Covid-19 ubu.

Ubusanzwe Virus iba ifite “code” iyiranga, iba igizwe n’inyuguti nyinshi, iyo rero ibipimo bigaragaje ko izo nyuguti za virus ziri kwihinduranya cyane kuva aho zitangirira kugeza aho zirangirira byitwa “major mutation” kandi biba biteye inkeke kuko imiti n’inkingo bitayibasha.

Kugeza ubu kwihinduranya kwa Covid-19 ntabwo kuragera ku rugero rwo hejuru ku buryo imiti cyangwa inkingo bitakora, gusa igiteye impungenge ni uko yihinduranyije ku buryo yandura ku rugero rwo hejuru cyane, nubwo hataragaragara niba yatuma umuntu aremba cyane cyangwa abura ubuzima byihuse.

Ubu bwoko bushya bwa Coronavirus buracyari gukorwaho iperereza, bwahawe izina rya VUI-202012/01.

Mu Cyumweru cya tariki ya 9 Ukuboza 2020, mu Mujyi wa Londres 62% by’ubwandu bwa COVID-19 bwari buturutse kuri ubu bwoko bushya bw’iyi virus. Ni umubare munini ugereranyije na 28% ry’ubwandu bwagaragaye mu cyumweru cyari cyabanje.

Ntabwo abashakashatsi baremeza niba inkingo nk’urwakozwe na Pfizer/BioNtech cyangwa izindi zishobora kurinda ikwirakwira ry’ubu bwoko bushya bwa Covid-19.

Minisitiri w’Ubuzima, Dr. Daniel Ngamije, yatangaje ko u Rwanda ruri kubaka ubushobozi ku buryo mu minsi mike ruzatangira gupima ubwoko bushya bwa Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .