U Burundi na Tanzania ntibizahabwa inkingo za COVID-19 zagenewe ibihugu bikennye

Yanditswe na Uwimana Abraham
Kuya 6 Gashyantare 2021 saa 05:45
Yasuwe :
0 0

U Burundi na Tanzania ntibiri ku rutonde rw’ibihugu biteganyijwe kuzakira inkingo za COVID-19, nyuma y’uko Ishami ry’Umuryango w’Abibumbye ryita ku Buzima (OMS) ritangarije gahunda yo gutangira gukwirakwiza inkingo binyuze muri gahunda ya COVAX.

OMS ku wa Kane yatangaje ko binyuze muri gahunda ya COVAX (igamije korohereza ibihugu by’umwihariko ibikennye, kugerwaho n’inkingo za COVID-19), izatangira kugeza dose miliyoni 90 z’inkingo za COVID-19 mu bihugu bitandukanye bya Afurika guhera muri uku kwezi kwa Gashyantare.

Kugeza ubu dose zigera ku 320.000 z’urukingo rwa Pfizer-BioNTech zagenewe ibihugu birimo u Rwanda, Capt Vert, Afurika y’Epfo na Tuniziya nk’uko byatangajwe na OMS.

Ni mu gihe mu ntangiriro z’iki Cyumweru Tanzania yahamije ko nta gahunda yo kwakira inkingo za COVID-19 ifite, nyuma yaho Perezida John Magufuli atangaje ko COVID-19 yatsinzwe muri Tanzania babikesha amasengesho.

Mu Burundi naho kandi Minisitiri w’Ubuzima, Ndikumana Thadée, aherutse gutangaza ko igihugu cye kirajwe ishinga no gushyiraho ingamba zo gukumira iki cyorezo, ko batarakenera urukingo.

Ati “Bitewe n’uko 95% by’abarwayi bose bari gukora, dutekereza ko inkingo atari ngombwa.” Ibi ni ibyatangajwe n’ibinyamakuru byo muri icyo gihugu bivuga ko ari amagambo ya Ndikumana ubwe.

Kugeza ubu imipaka yo ku butaka n’iyo mu mazi yerekeza muri icyo gihugu iracyafunze mu rwego rwo kwirida COVID-19, mu gihe imibare y’abanduye kugeza ubu bivugwa ko bamaze kugera ku 1.600

Ikigo gishinzwe Kugenzura no Gukumira Ibyorezo muri Afurika cyatangaje ko hakenewe ko nibura hakingirwa 60% by’abaturage bagize ibihugu 54 bya Afurika kugira ngo byibuze abantu babe barinzwe.

Kugeza ubu abamaze kwandura COVID-19 muri Afurika bagera kuri miliyoni 3,6 mu gihe abo yahitanye babarirwa mu 93.647.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .