00:00:00 IGIHE NETWORK KN KINYARWANDA EN ENGLISH FR FRANCAIS

Moderna igiye gutangira gukorera inkingo muri Afurika, u Rwanda mu bihugu byatekerejweho

Yanditswe na Ishimwe Israel
Kuya 14 Ukwakira 2021 saa 08:34
Yasuwe :
0 0

Ikigo cy’Abanyamerika kizobereye mu bijyanye no gukora Imiti, Moderna, Inc, cyatangaje umugambi wacyo wo gutangira gukorera inkingo ku Mugabane wa Afurika.

Umunyamerika Noubar Afeyan washinze Moderna akaba anayiyobora yavuze ko bari gushaka ahazashyirwa uruganda rw’iki kigo muri Afurika ndetse ibihugu byashyizweho ku rutonde rw’ibihabwa amahirwe birimo Sénégal, Afurika y’Epfo n’u Rwanda.

Umushinga wa Moderna wo kubaka uruganda muri Afurika uri mu cyerekezo cyayo cyo gukora inkingo dose miliyoni 500 mu mwaka zirimo n’iza COVID-19.

Watekerejweho mu gihe igitutu gisaba ibigo bikora imiti kugana isoko ryo mu bihugu biri mu nzira y’amajyambere gikomeje kwiyongera.

Noubar Afeyan uri mu bashinze Moderna mu 2010, yabwiye Reuters ko gahunda yo kwinjira ku isoko rya Afurika igenda iba impamo.

Afurika yihaye intego y’uko mu myaka 20 izaba yikorera 60% by’inkingo ikenera zose; ivuye kuri 1% by’izo uyu mugabane ukora uyu munsi.

Moderna ishaka kwinjira kuri iri soko mu gihe abahanga mu by’ubuzima baha amahirwe u Rwanda, Sénégal na Afurika y’Epfo nk’ibihugu bihabwa amahirwe yo kwinjiriramo kuko bisanganywe ubunararibonye mu gukora inkingo cyangwa bikaba byarerekanye ubushake bwo guteza imbere uru rwego.

Nka Afurika y’Epfo ifite ubushobozi bwo gukora ubushakashatsi mu by’ubuvuzi ndetse n’uruganda rukora imiti; Sénégal yo ifite ikigo cyitwa Institut Pasteur de Dakar (IPD) gikora inkingo za Fièvre Jaune mu gihe u Rwanda rwagaragaje umuhate mu gukora imiti n’inkingo. Usibye ibi bihugu, hari n’ibyo mu Majyaruguru ya Afurika nka Tunisia na Misiri bifite inganda zikora imiti.

Afeyan uyobora Moderna abajijwe niba ibi bihugu biri ku rutonde rw’ibyo batekereza gutangizamo uruganda, yagize ati “Ibyo nabyemeza, ni byo.’’

Uyu mushoramari w’imyaka 59 yirinze kugira byinshi atangaza ku bijyanye n’igihugu Moderna yavugaga ubwo hakomozwaga ku rugendo rwo kugihitamo.

Ati “Ikidushishikaje cyane ni uburyo dushobora gukoramo. Ibyo ni ubuvuzi muri rusange, abaganga bahuguwe bashobora kudufasha mu gufata ibizamini byo kwa muganga bikeneye gukorwa.’’

Afeyan yavuze ko hari ibihugu byinshi bifite ubuvuzi bwiza ndetse bashishikajwe cyane no kuba bakorana na Moderna. Ati “Tuzabona abafatanyabikorwa.’’

-  U Rwanda rwamaze kwinjira mu mikoranire na BioNTech

Ibihugu bitatu birimo u Rwanda, Afurika y’Epfo na Sénégal byamaze gutoranywa nk’ibizubakwamo inganda zikora inkingo za COVID-19 z’Ikigo cy’Abadage kizobereye mu bijyanye no gukora Imiti, BioNTech.

Tariki ya 27 Kanama 2021, ni bwo u Rwanda rwasinyanye na BioNTech nk’igihugu kiri mu bizahabwa ikoranabuhanga n’amahugurwa ajyanye n’ikorwa ry’inkingo. Ku ikubitiro, iki kigo kizakorera mu Rwanda no muri Sénégal inkingo za Malaria n’Igituntu.

Amakuru y’iyubakwa ry’Uruganda rwa Moderna muri Afurika yatangajwe mu gihe Abanyafurika bari munsi ya 5% aribo bamaze gukingirwa COVID-19 byuzuye.

Afeyan yavuze ko intego yo kubaka uruganda muri Afurika ari ukongera umubare w’inkingo ku buryo mu gihe kizaza haramutse hadutse ikindi cyorezo byakoroha gukora inkingo zihagije ku mugabane.

Politico yanditse ko Amerika yasabye Moderna kongera ingano y’umubare w’inkingo ikora mu gufasha ibihugu bimwe na bimwe kuzibona ariko iki kigo cyagenze biguru ntege, gishidikanya ku kuba gishobora kwishyurwa amafaranga make.

Iki kigo cy’Abanyamerika cyiyemeje gutanga nibura dose miliyari y’inkingo za COVID-19 mu bihugu bikennye mu 2022, nk’inyongera ku zo yemeye gutanga ku rwego rw’Isi binyuze muri gahunda ya COVAX.

Moderna ifite intego yo gukora nibura dose z’inkingo za COVID-19 ziri hagati ya miliyari ebyiri n’eshatu mu mwaka utaha, izabigeraho binyuze mu ruganda iteganya gutangiza muri Afurika.

Moderna irifuza kubaka inganda zikora inkingo muri Afurika kandi u Rwanda ruri mu bihugu bihabwa amahirwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .