Minisitiri Ngamije yaciye amarenga ku tundi duce dushobora kujya muri Guma mu rugo

Yanditswe na Akayezu Jean de Dieu
Kuya 25 Mutarama 2021 saa 04:55
Yasuwe :
0 0

Abatuye Umujyi wa Kigali bahanze amaso itariki ya 1 Gashyantare 2021, kuko nibwo ibyumweru bibiri bizaba byuzuye bashyizwe muri gahunda ya #GumaMuRugo, kuri bo yari inshuro ya kabiri kuva icyorezo cya COVID-19 cyagera mu Rwanda muri Werurwe umwaka ushize.

Inama y’Abaminisitiri yateranye ku wa 18 Mutarama hifashishijwe ikoranabuhanga, iyobowe na Perezida wa Repubulika niyo yafatiwemo ibyemezo birimo icyo gushyira Umujyi wa Kigali muri gahunda ya Guma mu Rugo (Lockdown).

Ni icyemezo cyaje abanshi bakiteguye kuko kuva mu mpera za 2020, ubwiyongere budasanzwe bw’abandura COVID-19 n’ubw’abahitanwa na yo, bwakomeje gutumbagira ndetse n’uyu munsi niko bikimeze.

Minisitiri w’Ubuzima, Dr Ngamije Daniel wari mu kiganiro kuri RBA, kuri iki Cyumweru yavuze ko kugeza uyu munsi imibare igaragaza ko abantu 200 aribo bari kwandura mu gihugu hose.

Yakomeje agira ati “Gahunda rero ya guma mu rugo nko muri Kigali, muzi ko Kigali yarushaga utundi turere twose uduteranyije, ikintu turi kubona ni uko mu minsi itatu cyangwa ine ishize, ni uko utundi turere twose turi kurusha Kigali.”

Imibare igaragaza ko kuva tariki 18 Mutarama, ubwo hashyirwagaho guma mu rugo ku batuye Umujyi wa Kigali, kugeza ku wa 24 Mutarama 2021, mu gihugu hose hamaze kwandura abantu 1943.

Umujyi wa Kigali wihariye abantu 958, mu gihe Intara y’Uburasirazuba ifite ubwandu 422 barimo 159 bo mu Karere ka Gatsibo.

Minisitiri Dr Ngamije avuga ko bikomeje kugaragara ko guma mu rugo itanze umusaruro muri Kigali, byaba ngombwa ko hari n’utundi turere twashyirwa muri Guma mu rugo cyangwa hagafatwa n’izindi ngamba zihariye.

Ati “Iki gipimo gikomeje gutya, tukagenda tubona imibare igabanyuka muri Kigali, ariwo musaruro mwiza wa guma mu rugo, hari aho tuza kugera mu isesengura tuvuge duti abantu basobanukiwe hari izindi ngamba dushobora gufata. Ariko ntabwo turagera aho hantu.”

Kigali ifite umwihariko...

Kuva ku wa Gatandatu tariki 23 Mutarama, Ikigo cy’igihugu Gishinzwe Ubuzima (RBC) ku bufatanye n’Umujyi wa Kigali, batangije gahunda yo gupima abaturage icyorezo cya COVID19, hagendewe kuri buri Kagari.

Ni igikorwa kigomba kurangira abaturage basaga ibihumbi 20 bamaze gupimwa aho hazapimwa nibura abantu 125 muri buri kagali mu 161 tugize Umujyi wa Kigali.

Minisitiri w’Ubuzima, Dr Ngamije Daniel yavuze ko iki gikorwa kigamije kureba ahari ubwandu bwinshi kugira ngo hafatirwe ingamba zihariye no kuba ahatari ubwandu hashobora koroherezwa.

Ati “Aho bitandukaniye n’andi masuzuma twagiye dukora mu minsi yashize, mbere twapimanaga abantu kuri za gare, mu masoko n’ahandi ariko ntabwo byatumaga duhuza imibare y’abo twabonye banduye n’aho batuye. Ubu rero turaza kubihuza.”

“Turaza gukora ishusho yerekana abagaragayemo uburwayi baraboneka mu kahe kagari, biduhe ishusho y’Umujyi wa Kigali ku buryo twavuga duti muri aka kagari cyangwa umudugudu uburwayi bwiganje aha n’aha noneho dufate izindi ngamba.”

Muri iyi gahunda hari gupimwa abantu bose bafite imyaka 70 kuzamura, abafite indwara zidakira (nka diyabete, umuvuduko w’amaraso, indwara z’umwijima n’impyiko n’izindi, abafite ubwandu bwa Virusi itera SIDA); abahuye n’uwanduye COVID19 n’ufite ibimenyetso bya COVID19 ariko akaba ataripimisha.

Minisitiri Dr Ngamije avuga ko “Turagira ngo tumenye ibiri kubera mu ngo, hatagira abantu baza kuturembana batabizi cyangwa twebwe tutabizi, tumenye ngo abakuze twabagezeho nta kibazo bafite, abafite izindi ndwara zidakira.”

Yavuze kandi ko ku munsi wa mbere w’iki gikorwa hafashwe ibipimo 4500 habonekamo abantu 220 bafite ubwandu bwa COVID-19, harimo abenshi bafite imyaka iri hejuru ya 70.

Mu gihe ubwiyongere bw’abandura n’abahitanwa na Coronavirus buzamuka, ubu amaso ahanzwe urukingo ndetse hari icyizere ko rushobora kuboneka vuba.

Ikigo cy’Igihugu gishinzwe Ubuzima (RBC) giherutse gutangaza ko u Rwanda rwiteguye kwakira inkingo no kuzitanga.

U Rwanda rwasabye inkingo mu bigo bitandukanye kuko rwiteguye kwakira nyinshi zemejwe n’Ishami ry’Umuryango w’Abibumbye ryita ku Buzima (OMS) nk’izishobora kwifashishwa. Ku ikubitiro rwatangaje ko ruzakira inkingo miliyoni.

Abanya-Kigali bamaze icyumweru bari muri gahunda ya Guma mu rugo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .