00:00:00 IGIHE NETWORK KN KINYARWANDA EN ENGLISH FR FRANCAIS

Minisante yatanze integuza yo gutanga doze ya gatatu y’urukingo rwa COVID-19

Yanditswe na Dufitumukiza Salathiel
Kuya 5 Ugushyingo 2021 saa 09:45
Yasuwe :
0 0

Minisitiri w’Ububuzima, Dr Ngamije Daniel, yatangaje ko hari gukorwa ubushakashatsi bugamije kureba niba ubudahangarwa bw’abahawe doze ebyiri z’urukingo rwa COVID-19 bugabanuka, bakaba bahabwa iya gatatu ibwongera mu gihe bibaye ngombwa.

Mu kiganiro na Radio Rwanda, Dr Ngamije yatangaje ko abashobora guherwaho mu gihe iyo gahunda yaba ishyizwe mu bikorwa ari abafite ibyago byinshi byo kuzahazwa na Covid-19.

Dr Ngamije yavuze ko isuzuma nirigaragaza ko hari benshi ubuduhangarwa bw’umubiri bwagabanutse, doze ya gatatu izatangwa.

Yagize ati “Uko iminsi itambuka ni ko tugenda dusuzuma ubudahangarwa mu mu mubiri kugira ngo turebe uko bumeze. Nibigaragara ko hari benshi bugenda bugabanuka wenda nyuma y’amezi nk’atandatu; nibiba ngombwa ko hari abo twongera guha urukingo rwa gatatu cyane cyane mu bakuze, abafite indwara z’akarande, nk’uko dusanzwe tubitangaza, ayo makuru azamenyekana tubashakishe kuko tubafite muri ‘system’ ku buryo twabatumaho urwo rukingo rwa gatatu bakarubona.”

Inzobere mu by’ubuzima zisobanura ko uko umuntu akura ari ko ubudahangarwa bugenda bugabanuka, naho abarwaye indwara nka SIDA, kanseri n’izindi zigatuma buhungabana.

Ni ibintu bashingiraho bemeza ko kubaha doze ya gatatu bayihabwa byafasha umubiri guhangana na COVID-19 by’igihe kirekire.

Ibihugu byinshi byo mu Muryango w’Ubumwe bw’Uburayi, Leta Zunze Ubumwe za Amerika, ibyo mu Burasirazuba bwo Hagati, ibyo muri Afurika (Maroc na Tunisie) byatangiye gutanga doze ya gatatu ya Pfizer na Moderna ku barengeje imyaka 65 n’abandi bafite ibyago byinshi byo kuzahazwa n’icyorezo.

Magingo aya Abaturarwanda barenga miliyobi 4 ni bo bamaze guhabwa doze ya mbere y’urukingo rwa COVID-19, naho abarenga miliyoni ebyiri bahawe doze ebyiri.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .