00:00:00 IGIHE NETWORK KN KINYARWANDA EN ENGLISH FR FRANCAIS

Kigali: Ibikorwa byo gukingira COVID-19 abafite imyaka 18 bigiye gusubukurwa

Yanditswe na Muhonzire Sylvine
Kuya 31 Kanama 2021 saa 09:06
Yasuwe :
0 0

Minisiteri y’Ubuzima yatangaje ko igiye gusubukura igikorwa cyo guha urukingo rwa mbere abafite imyaka 18 kuzamura batuye mu Mujyi wa Kigali nyuma y’uko byari bimaze iminsi bihagaritswe kuko inkingo zari zateganyijwe zari zashize.

Igikorwa cyo gukingira kizatangira ku wa Gatatu, tariki ya 1 Nzeri 2021, ku masite yose yakoreshwaga mbere mu mirenge itandukanye, yaba ku bahabwa urukingo rwa mbere ndetse n’abahabwa urwa Kabiri.

Mu kiganiro na RBA, Umunyamabanga wa Leta muri Minisiteri y’Ubuzima ushinzwe Ubuvuzi bw’Ibanze, Dr Mpunga Tharcisse, yavuze ko haje izindi nkingo ibihumbi 150 zizakoreshwa mu guha urukingo rwa mbere abafite imyaka 18 kuzamura, ndetse ko buri cyumweru hazajya hakirwa inkingo.

Yagize ati “Twagira ngo rero tubakangurire ko guhera ejo mu gitondo saa Mbiri, bagana amasite bari basanzwe bikingirizaho mu Mujyi wa Kigali kugira ngo abacikanywe na bo babone inkingo.”

“Dufite amasite 37 muri Kigali mu mirenge itandukanye, ayo twakoreshaga mu cyumweru cyashize dukingira icyiciro cya mbere n’icya kabiri icyarimwe turacyayakoresha dukingira icyiciro cya kabiri cy’ababona urukingo rwa Kabiri. Ni nayo tuzakomeza gukoresha dukingira abantu basigaye batabonye urukingo rwa mbere ku bafite imyaka 18 kuzamura.”

Yakomeje avuga ko kandi n’amasite manini yo muri Gikondo na Camp Kigali nayo azakomeza gukora nk’ibisanzwe.

Ati “Abo dukingira urukingo rwa mbere ni abafite imyaka 18 kuzamura, nta kindi bisaba uretse kuba uri mu Mujyi wa Kigali.”

Muri raporo ya buri munsi itangwa na Minisante igaragaza ko kugeza ku wa 30 Kanama 2021 mu Rwanda abamaze guhabwa urukingo rwa mbere ari miliyoni 1.5 mu gihe abamaze guhabwa urwa kabiri ari 631.522.

Minisiteri y’Ubuzima igiye gusubukura igikorwa cyo guha urukingo rwa mbere abafite imyaka 18 kuzamura batuye mu Mujyi wa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .