Kuri uyu wa Gatatu ni bwo u Rwanda rwakiriye inkingo za mbere zanyujijwe muri Covax, igamije kugeza inkingo kuri bose. U Rwanda rwakiriye inkingo 342.960 zirimo 102.960 za Pfizer n’izigera ku 240.000 za AstraZeneca.

Kuri uyu wa Kane hatangiye ibikorwa byo gukwirakwiza izo nkingo mu bitaro bitandukanye mu gihugu aho zizatangirwa guhera ku wa Gatanu, tariki ya 5 Werurwe 2021.

Mu gukwirakwiza izo nkingo, hifashishijwe uburyo butandukanye burimo gukoresha imodoka ndetse na kajugujugu za gisirikare mu bice bya kure.

Ku gicamunsi cyo kuri uyu wa Kane, RBA yatangaje ko kajugujugu za mbere zagejeje inkingo mu Karere ka Huye, izindi zizigeza mu ka Burera mu Ntara y’Amajyaruguru. Biteganyijwe ko kuri uyu wa Kane, izi ndege zikomeza kugeza inkingo mu tundi duce dutandukanye turi kure ya Kigali.

Biteganyijwe ko abazakingirwa ku ikubitiro ari abantu bakuze guhera ku myaka 65 kuzamura, abafite ubumuga, abarwaye indwara zikomeye nka Diabete, iz’umutima ndetse n’iz’ubuhumekero. Abantu bazakingirwa muri iki cyiciro bangana na 171.480.

Indege z'Igisirikare cy'u Rwanda ziri kwifashishwa mu kugeza inkingo za Covid-19 mu bice bya kure mu gihugu

Kajugujugu z'Igisirikare cy'u Rwanda biteganyijwe ko zikomeza gutanga umusanzu mu kugeza inkingo za Covid-19 aho zikenewe

Indege zamaze kugeza inkingo za Covid-19 mu Turere twa Burera na Huye

Kajugujugu ya RDF itwaye inkingo za COVID-19 ubwo yagwaga i Gatsibo

Mu Karere ka Nyaruguru na ho hagejejwe inkingo

Abatuye mu Karere ka Huye, inkingo zamaze kubageraho

Imodoka y'Ibitaro bya Gakoma ubwo yari itegereje guhabwa inkingo za COVID-19

Inkingo ziri gutwarwa mu buryo bwizewe

Abakora mu nzego z'ubuzima bapakira inkingo ngo zigezwe hirya no hino mu gihugu

Inkingo u Rwanda rwakiriye ni izakozwe na Pfizer na AstraZeneca

Imodoka z'ibitaro bitandukanye mu gihugu kuri uyu wa Kane zazindutse zitwara inkingo za Covid-19

Amafoto: RBA & RBC