00:00:00 IGIHE NETWORK KN KINYARWANDA EN ENGLISH FR FRANCAIS

Intore yishakira inzira: Uko ibyari amarira ya Covid-19 babihinduyemo amahirwe mashya y’imibereho

Yanditswe na Muhonzire Sylvine
Kuya 29 Ukwakira 2021 saa 08:07
Yasuwe :
0 0

Abari bafite akabari, abagakoragamo, abatozaga muri siporo, abateguraga inama, ba nyir’amahoteli na za restaurants ni bamwe mu bakubwira umujinya bafitiye Covid-19 yabacucuye bagasigara bimyiza imoso, gusa siyo ndoro ku bakora cyangwa abacuruza udupfukamunwa kimwe n’abakora amasabune.

Covid-19 ikigera mu Rwanda muri Werurwe 2020, buri wese yabonaga ko ari icyago cyigwiriye igihugu n’Isi ariko nta wiyumvishaga ko kizamara imyaka ibiri nk’iyo kimaze kugeza n’ubu. Nta we kandi uzi iherezo ryacyo nubwo inkingo zisa n’izitanga icyizere cyo kugihagarika.

Iki cyorezo cyabereye ikigeragezo benshi, imishinga imwe y’ubucuruzi iradindira, indi irahomba, indi ikomeza kurwazarwaza, gusa kibyara n’indi kuko cyabaye isoko y’amafaranga ku bafatiranye ihene igihebeba bagakora imishinga y’ubucuruzi itanga igisubizo cy’ibibazo Covid-19 yari izanye.

Muri Mata 2020 ubwo hari hashize ukwezi Covid-19 igeze mu Rwanda, inganda zarihuje zitangira gukora udupfukamunwa kuko kutwambara byari bimaze kuba itegeko ku bantu bose.

Umwe mu badukoraga waganiriye na RBA yavuze ko uruganda akorera ku munsi rwakoraga udupfukamunwa ibihumbi 25 kandi kamwe kagura 500 Frw.

Uretse n’abadukora, hari n’abaducuruza n’ubu bakibikora, bahamya ko twatumye ubuzima bwabo buhinduka.

Akingeneye Claudine ni umwe mu bacuruza udupfukamunwa mu Mujyi wa Kigali. Yabwiye IGIHE ko mbere ya Covid-19 yari abayeho nabi ariko ikimara kuza yinjiye mu bucuruzi bw’udupfukamunwa none ubu aritunze.

Ati “Mbere nabonaga icyo kurya bingoye ariko Covid-19 itangiye, nahisemo gukora ibi (gucuruza udupfukamunwa), bimfasha kubaho nubwo atari cyane ariko bindinda gusabiriza.”

Umuraza Charlotte na we ni umwe mu bungukiye mu gucuruza umuti wica udukoko. Ati “Mbere ya Coronavirus nakoraga mu ruganda rw’amasabune, ije batangira kudufata nabi nkavamo. Nyuma ni bwo natekereje mfata udufaranga nshora mu gucuruza izi hand sanitizers ureba hano […] ubu zirantunze n’umwana wanjye.”

Yaba umuti wica udukoko cyangwa udupfukamunwa, nta na kimwe cyagurwaga n’abantu benshi mbere ya Covid-19, ndetse hari batekerezaga ko ari ibikoresho byifashishwa kwa muganga. Gusa nyuma y’icyorezo byabaye imari ishyushye kuko bikenerwa hafi na buri wese.

Kandangira Ukarabe, amasabune y’amazi, imwe mu mishinga yazutse muri Covid-19

Gukora no gucuruza kandagira ukarabe cyangwa amasabune y’amazi (savon liquide) ni bimwe mu byungukiye abahisemo kubikoramo ubucuruzi by’umwihariko mu gihe cya Covid-19 ubwo isuku yahindukaga isoko y’ubuzima ku nabi no ku neza.

Tuyizere Gerald ubwo muri Mata 2020, yari ahagarariye imwe muri sosiyete zo mu Rwanda zikora ubucuruzi butanga ibisubizo ku bibazo Covid-19 yari izanye. Mu bya mbere batekereje harimo ’Kandagira Ukarabe’ zitari zimenyerewe, zifite indobo hejuru, n’akabase hasi ariko gatoboye karimo n’itiyo ku buryo umuntu akaraba amazi akamanuka hasi.

Yagize ati “Nyuma y’uko iki cyorezo cya Covid-19 kimaze gutera Isi, ubwo twumvaga ko cyageze mu gihugu cyacu cy’u Rwanda, twakereje icyo twakora. Hari Kandagira ukarabe zari zavuye mu Bushinwa ariko zitangiye gushira, abakiliya bacu bavuga ko nta buryo bafite bwo gusukura intoki, dutekereza kuba twakora iyi kandagira ukarabe.”

Uretse Tuyizere, hari n’abandi bagize ibitekerezo by’imishinga babikesheje Covid-19, nka Rugwizangoga Eric, Umuyobozi wa Sosiyete icururiza kuri Murandasi ya Migro wabwiye IGIHE ko iki cyorezo cyatumye ashyira mu bikorwa umushinga yari amaranye imyaka itanu mu bitekerezo.

Rugwizangoga yavuze ko mu 2015 ari bwo bwa mbere yagize igitekerezo cyo gucururiza kuri murandasi, gusa ntabishyiremo ingufu kugeza ubwo Covid-19 ije akabona ko ari ngombwa.

Ati “Bigeze 2020 ni bwo Covid-19 yototeye u Burayi, twebwe iwacu byari bitaraza, twirinda ariko bitaraza. Aho hantu rero ni bwo navuganye n’abantu bari hariya (mu mahanga) bari batangiye kujya muri guma mu rugo.”

“Nabajije uburyo barimo kubaho barambwira bati noneho bya bintu waganiraga byo kuba umuntu yagurira kuri murandasi bakamuzanira ibicuruzwa ubu ni byo biri gukora i Burayi na Amerika.”

Rugwizangoga yahise aba umwe mu batangiye umushinga we kubera icyorezo kivumirwa ku gahera na benshi.

Hari n’indi mishinga myinshi yaje mu gihe cya Covid-19, nko kwishyura kuri telefone hakoreshejwe kode, gukora udupfukamunwa two kwa muganga tutari dusanzwe dukorerwa mu Rwanda, abakora software zo gukora inama cyangwa indi mihuro hifashishijwe ikoranabuhanga ndetse n’ibindi.

Nubwo abo icyorezo cyangirije ari bo benshi ariko ubu hari abishimira iterambere bagezeho babikesheje inyungu bakuye mu bucuruzi bwavutse kubera Covid-19, bifasha ubukungu bw’igihugu kuzamuka nubwo Isi yari mu bihe bitoroshye.

Abakora bakanacuruza Hand Sanitizer bari mu bo Covid-19 yatumye ubuzima buhinduka
Akingeneye avuga ko gucuruza udupfukamunwa byamurinze gusabiriza
JPEG - 163.7 kb
Gucuruza udupfukamunwa hari benshi byahinduriye ubuzima
Inganda zimwe zatangiye gukora udupfukamunwa
Kubera gukenera Hand Sanitizer benshi bazicuruje ku bwinshi
Nyuma y'uko gukaraba intoki bibaye umuco, Abacuruza Kandagira ukarabe babonye isoko kuruta mbere ya Covid 19
Za kandagira ukarabe ni bimwe mu bikoresho byihagazeho cyane mu gihe cya COVID-19
Za Thermomètre zipima umuriro ziri mu byacurujwe cyane
Inganda zarihuje zitangira gukora udupfukamunwa/Ifoto RBA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .