00:00:00 IGIHE NETWORK KN KINYARWANDA EN ENGLISH FR FRANCAIS

Hagiye kwitabazwa Ibitaro by’Intara kubera ubwinshi bw’abandura n’abazahazwa na Covid-19 i Rubavu

Yanditswe na Akayezu Jean de Dieu
Kuya 28 Kamena 2021 saa 01:33
Yasuwe :
0 0

Guverineri w’Intara y’Iburengerazuba, Habitegeko François yatangaje ko bitewe n’ubwiyongere bw’abandura Covid-19, abarembye baboneka mu Karere ka Rubavu bagiye kujya boherezwa ku Bitaro bya Kibuye biri ku rwego rw’Intara.

Kuva muri Werurwe, abasaga 1700 ni bo bamaze kwandura COVID19 muri Rubavu, aho abasaga 60% banduye mu kwezi kumwe gusa kwa Kamena 2021.

Mu kiganiro yagiranye na RBA, Guverineri Habitegeko yavuze ko kugeza ubu abarwayi ba Covid-19 barembye baboneka i Rubavu bagiye kujya boherezwa kuvurirwa ku bitaro bya Kibuye.

Avuga ko kuri ubu i Rubavu hakomeje kugaragara ubwiyongere bukabije bw’abandura Covid-19, ndetse ikabazahaza bakaba bari hafi kurenga ubushobozi bw’Ibitaro bya Gisenyi byabakiraga.

Akarere ka Rubavu kari mu twugarijwe bikomeye n’ubwandu bwa Covid-19 bushya aho nko mu Cyumweru gishize hagaragaye abantu bashya banduye iki cyorezo barenga 400.

Muri rusange imibare ya Minisiteri y’Ubuzima yo ku wa 27 Kamena 2021, igaragaza ko kuva muri Werurwe 2020, abantu 36.627 ari bo bamaze kwandura Covid-19 mu bipimo 1.614.429 bimaze gufatwa hirya no hino mu gihugu.

Inzego zirimo Minisiteri y’Ubuzima zikomeje gusaba Abaturarwanda gukomeza kwirinda icyorezo bubahiriza amabwiriza arimo kwirinda kwihuriza ahantu hafunganye ari benshi kuko byorohereza Coronavirus gukwirakwira.

Abarwayi ba Covid-19 b'i Rubavu bagiye kujya bajyanwa ku Bitaro bya Kibuye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .