00:00:00 IGIHE NETWORK KN KINYARWANDA EN ENGLISH FR FRANCAIS

Dr Nsanzimana yakomoje ku ifungwa ry’amavuriro ya COVID-19 n’ibyo gufata urukingo rwa gatatu

Yanditswe na Ishimwe Israel
Kuya 1 Ugushyingo 2021 saa 04:58
Yasuwe :
0 0

Ugereranyije no mu mezi nk’atanu ashize, kuri ubu hari icyizere ko imbaraga zashyizwe mu guhangana na COVID-19 zigenda zitanga umusaruro nubwo ingamba z’inzego z’ubuzima zigikeneye kubahirizwa.

Igabanuka ry’ubukana bwa COVID-19 rigaragarira muri raporo ngarukamunsi ya Minisiteri y’Ubuzima y’abandura COVID-19 ndetse n’abo ihitana.

Nko ku wa 31 Ukwakira 2021, mu Rwanda habonetse abanduye bashya 17 mu bipimo 16.893; batatu bahitanywe na COVID-19 mu Rwanda mu gihe umwe yasezerewe mu bitaro, undi abyinjizwamo. Batatu ni bo barembye.

Umuyobozi Mukuru w’Ikigo cy’Igihugu cy’Ubuzima (RBC), Dr Nsanzimana Sabin, mu kiganiro Ishusho y’Icyumweru kinyura kuri Televiziyo Rwanda, yavuze ko aho igihugu kigeze gihangana na COVID-19 hatanga icyizere ariko hadakwiye kubaho kwirara.

Yagize ati “Ni byo mu bitaramo, utubari n’ahantu hahurira abantu benshi turi kugenda dufata ibipimo. Ikiri kugaragara cyane mu Mujyi wa Kigali ni uko COVID-19 ikiri munsi ya 0,5%, ku bantu dupima.’’

“Icyo tubona kindi ni uko abaturuka mu ntara binjira mu Mujyi wa Kigali na bo bari kuzamo umubare w’abafite ubwo burwayi. Dushishikariza ufite ibimenyetso cyangwa uwahuye n’ufite ubwo burwayi ko akwiye kwitwararika cyangwa kwipimisha ngo atanduza abandi.’’

Kugeza ubu mu gihugu hose imibare y’abanduye COVID-19 yerekana ko ubwandu buri munsi ya 1%.

Dr Nsanzimana “Ni ibintu byiza tutaherukaga, hari hashize nk’amezi atanu. Ariko nta wavuga ko bizikora, bikomeze uko bimeze. Mu kwihangana abantu bagize, dukwiye gufatanyiriza hamwe kurushaho kubigira byiza.’’

Mu mpera za 2020, igihugu nabwo cyari mu murongo mwiza wo guhashya COVID-19 ariko imyitwarire y’abaturarwanda mu gihe cy’iminsi mikuru yatumye mu ntangiriro z’uyu mwaka uduce tumwe na tumwe dushyirirwaho ingamba zikaze zirimo na Guma mu rugo kubera icyorezo cyari cyongeye gukaza umurego.

Dr Nsanzimana avuga ko muri ibi bihe usanga abenshi bategura ibirori n’ibindi bikorwa bishobora kuvamo ibibazo.

Ati “Turegera iminsi mikuru, igihe abantu baba bashaka gukora ibirori, ibyo ni byo akenshi usanga biturukamo ibibazo dushingiye no ku byo mu bindi bihugu bagiye banyuramo.’’

Yasobanuye ko isomo bakuye ku bindi bihugu ryerekana ko nubwo abenshi bakingiwe ariko urukingo rwonyine rutafashije kurinda byuzuye abaturage babyo.

Ati “Hari n’igihe byazaba ngombwa ko urukingo rudahagije, turi kwiga uko abamaze amezi atandatu bakingiwe bazahabwa urundi rukingo. Turi gupima ubudahangarwa umubiri wakoze ko bubarinda kwandura bundi bushya.’’

Uyu muyobozi akomeza avuga ko igabanuka rya COVID-19 rihingiye ku ngufu z’urukingo n’ibikorwa abantu bakoze.

Yakomeje ati “Ni byiza ariko ntitugire ngo byarangiye. Urukingo rwagabanyije uburwayi, rugabanya impfu, rufungura ubukungu, ishoramari ryongeye gukorwa. Ntiduse nk’abarura ibitarashya ngo tuvuge ngo COVID-19 yarangiye kuko ishobora kugaruka Virus yihinduranyije, birasaba kuba maso.’’

Umuyobozi Mukuru w’Ikigo cy’Igihugu cy’Ubuzima (RBC), Dr Nsanzimana Sabin, yavuze ko icyorezo cya COVID-19 kiri kugabanuka ariko hadakwiye kubaho kwirara

-  Ibitaro bya COVID-19 bigiye gufungwa, bitangirwemo izindi serivisi

Kugeza kuri ubu, umurwayi umwe ni we uri kuvurirwa mu Bitaro by’Akarere ka Nyarugenge bivura COVID-19 ndetse ni ko binameze mu bya Kibuye mu Burengerazuba.

Mu buvuzi bw’ibyorezo, iyo abarwayi bashize mu bitaro birafungwa, bigatangirwamo ubundi buvuzi bw’indwara zisanzwe.

Dr Nsanzimana yavuze ko imibare ihari isa neza kuko nta barwayi benshi bari mu bitaro.

Ati “Nyarugenge hasigayemo umuntu umwe gusa, ni ikintu kitaherukaga hari hashize amezi atatu. No mu ntara hari umurwayi umwe mu Bitaro bya Kibuye, ahavurirwa abo mu Burengerazuba.’’

Yavuze ko mu Bitaro bya Nyarugenge ari ho hari hasigaye hakira abarwayi honyine ariko hagiye kurebwa uko “hasubira mu mirimo yo kuvura abarwayi bose.’

Ati “Twifuza ko twese dufatanya Nyarugenge ntizongere kuba ibitaro bivura abarwayi ba COVID-19. Iyo abarwayi bavuye mu bitaro, bisubirana ibyo abantu bakoraga. Iyo abarwayi bababye benshi byongera kwifashishwa.’’

Kuri ubu, Ibitaro bya Kanyinya guhera ku wa 1 Ugushyingo 2021 ni byo byatangiye gukora nk’ibitaro ku rwego rw’igihugu bitanga ubuvuzi bwihariye bwa Covid-19.

Ibitaro bya Nyarugenge byo birasubukura gutanga ubuvuzi busanzwe ku baturage nko kubyaza, kuvura abana, abakuru, indembe n’inkomere.

U Rwanda rukomeje gahunda yo gukingira abaturage babyo ndetse haratekerezwa no ku bari munsi y’imyaka 18; icyiciro ubusanzwe kitigeze kigerwaho.

Dr Nsanzimana yavuze ko hari ubushakashatsi buri gukorwa hareba niba abato bakingirwa. Ati “Byose biri mu byo turi kwigaho muri iyi minsi.’’

Kugeza ubu mu Rwanda hamaze gukingirwa mu buryo bwuzuye abantu 1.990.105 kuva ibi bikorwa byatangira ku wa 5 Werurwe 2021 mu gihe abamaze guhabwa dose ya mbere y’urukingo ari 3.809.747.

Ibitaro bya Nyarugenge byavurirwagamo abarwayi ba COVID-19 bigiye gutangira gutangirwamo ubuvuzi bw'izindi ndwara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .