00:00:00 IGIHE NETWORK KN KINYARWANDA EN ENGLISH FR FRANCAIS

Covid-19: U Rwanda rwashyizwe mu bihugu abaturage babyo bemerewe kwinjira mu Bufaransa

Yanditswe na Ferdinand Maniraguha
Kuya 11 Ukwakira 2021 saa 09:52
Yasuwe :
0 0

U Rwanda rwashyizwe ku rutonde rw’icyatsi ruriho ibihugu abaturage babyo bemerewe gukorera ingendo mu Bufaransa ndetse n’Abafaransa bemerewe kubikoreramo ingendo kubera ko nta bukana bukabije bw’icyorezo cya Covid-19.

Uru rutonde rwashyizwe hanze nyuma y’amezi ane u Bufaransa butangiye gufungurira amarembo abanyamahanga hagendewe ku buryo icyorezo cya Covid-19 gihagaze mu bihugu byabo.

Mbere u Rwanda rwari ruri mu bihugu by’umutuku, ni ukuvuga ko abaturage babyo batari bemerewe gukorera ingendo mu Bufaransa cyangwa Abafaransa baruzemo, bitewe n’ubukana bwa Covid-19.

Ibihugu biri mu ibara ry’icyatsi ni ibitagaragaramo ubwandu bukabije bwa Covid-19 kandi hakaba nta bwoko bushya bwa Covid-19 yihinduranya buheruka kuhagaragara.

Ibyo bihugu biri kuri uru rutonde rushya ni ibiri mu Muryango w’Ubumwe bw’u Burayi, Australia, Arabie Saoudite, Bahreïn, Brunei, Canada, Chili, Koreya y’Amajyepfo, Leta Zunze Ubumwe z’Abarabu, Hong-Kong, u Buyapani, Jordanie, Koweït, Liban, Nouvelle-Zélande, Qatar, u Rwanda, Sénégal, Singapour, Taïwan, Ibirwa bya Comores, Uruguay na Vanuatu.

U Rwanda na Sénégal ni byo bihugu byo ku Mugabane wa Afurika biri mu ibara ry’icyatsi.

Kugira ngo umuntu yemererwe kwinjira mu Bufaransa avuye muri ibi bihugu biri mu ibara ry’icyatsi, iyo yikingije Covid-19 agaragaza icyemezo ubundi akemererwa kwinjira nta yindi nkomyi.

Ku muntu utarikingije, asabwa kugaragaza ko yipimishije Covid-19 mu masaha 72 mbere yo gufata urugendo.

Inkingo icyo gihugu cyemera ni izemewe n’Ikigo cy’Umuryango w’Ubumwe bw’u Burayi gishinzwe ubuzima, zirimo Pfizer, Moderna, AstraZeneca na Johnson & Johnson.

Iki gihugu kandi cyaburiye abaturage bacyo kudakorera ingendo mu bihugu byashyizwe mu ibara ry’umutuku kubera ubukana bw’icyorezo cya Covid-19. Mu bihugu biri mu ibara rya Orange, naho Umufaransa ushaka kujyayo abanza kugaragaza ubwihutirwe bw’icyo agiye kuhakora.

U Rwanda ruje kuri uru rutonde rw’icyatsi nyuma y’ingamba zidasanzwe zo guhashya covid-19 zafashwe zirimo no gukingira abaturage benshi bashoboka, aho kuri ubu abasaga miliyoni ebyiri bamaze guhabwa dose ya mbere y’urukingo, mu gihe abasaga miliyoni 1.6 bahawe dose zombi z’urukingo.

Kugeza ku Cyumweru, tariki 10 Ukwakira 2021, abantu 98.697 ni bo bari bamaze kwandura Covid-19 kuva yagera mu Rwanda barimo 94.953 bakize na 1.308 bapfuye.

U Rwanda ruri mu bihugu mbarwa biri mu ibara ry'icyatsi
Kuri ubu Abafaransa bemerewe gukorera ingendo mu Rwanda nta nkomyi mu gihe n'Abanyarwanda bemerewe kujya mu Bufaransa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .