00:00:00 IGIHE NETWORK KN KINYARWANDA EN ENGLISH FR FRANCAIS

Covid-19: Pfizer-BioNTech ishaka uburenganzira bwo gutanga urukingo rwa Gatatu

Yanditswe na Muhonzire Sylvine
Kuya 9 Nyakanga 2021 saa 09:00
Yasuwe :
0 0

Pfizer-BioNTech yakoze urukingo rwa Covid-19 rufite ubushobozi bwo kurinda Coronavirus isanzwe ku rugero rwa 94%, ishaka gusaba uburenganzira bwo gutanga urukingo rwa Gatatu rwa Coronavirus ruzafasha umubiri guhangana na virus zihinduranyije.

Pfizer-BioNTech yavuze ko igeragezwa ryakorewe muri Israël ryagaragaje ko urukingo rwa Gatatu rwa Coronavirus rutanzwe nyuma y’amezi atandatu cyangwa 12 umuntu ahawe inkingo zombi za Covid-19, rwongerera umubiri abasirikare inshuro eshanu kugeza ku 10, bityo ukagira ubushobozi bwo kurwanya virus zihinduranyije cyane nk’iyitwa Beta yagaragaye bwa mbere muri Afurika y’Epfo.

Ibi bigo kandi byatangaje ko uru rukingo rwa Gatatu ruzabasha guhangana na virus ya Delta yagaragaye bwa mbere mu Buhinde iri kwibasira abatuye Isi, ifite ubukana kurusha izindi virus zose ziriho kugeza ubu.

Pfizer-BioNTech yavuze ko ariko iteganya no gukora urukingo rwihariye rugenewe kurwanya virus ya Delta kuko imaze kuzahaza abatuye Isi cyane muri Afurika no muri Aziya ndetse yatangiye no kugera i Burayi no muri Leta Zunze Ubumwe za Amerika.

Ibi bigo byombi Pfizer na BioNTech bifite gahunda yo gusaba uburenganzira ibigo bishinzwe ubuvuzi, birimo Ikigo gishinzwe Ibiribwa n’Imiti cyo muri Leta Zunze Ubumwe za Amerika, FDA n’Ikigo gishinzwe Ubuvuzi cy’i Burayi, EMA, bwo gutanga urukingo rwa Gatatu ku baturage nyuma yo kurugerageza bagasanga rufite ubushobozi bwo kurinda Covid-19 yihinduranyije.

FDA ndetse n’ibigo bishinzwe kugenzura indwara no kuzirinda byo muri Amerika byo byahise byerekana uruhande bihagazeho, bivuga ko ababishinzwe bazabanza kugenzura ngo barebe niba koko abantu bakeneye urukingo rwa Gatatu.

Bongeyeho bati “Abanyamerika biteje inkingo ebyiri za Covid-19, ubu ntabwo bakeneye urukingo rwa Gatatu rwo kubongerera ubudahangarwa. Tuzategura gutanga urukingo rwa Gatatu igihe siyansi izaba yerekana ko rukenewe koko.”

Kugeza ubu inkingo za Coronavirus zimaze gukorwa zikanemezwa n’Ishami ry’Umuryango w’Abibumbye ryita ku buzima, OMS, ni Pfizer-BioNTech ndetse na AstraZeneca, ariko izi nkingo zagaragaje ko zidafite ubushobozi buhagije bwo kurinda Coronavirus zihinduranyije ziri kwibasira Isi mu nkubiri ya Gatatu.

Pfizer-BioNTech irashaka gusaba uburenganzira bwo gutanga urukingo rwa Gatatu rwa Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .