00:00:00 IGIHE NETWORK KN KINYARWANDA EN ENGLISH FR FRANCAIS

Covid-19: Amerika iri kwitegura gukingira abana bari hagati y’imyaka 5 na 11

Yanditswe na Muhonzire Sylvine
Kuya 20 Ukwakira 2021 saa 05:59
Yasuwe :
0 0

Leta Zunze Ubumwe za Amerika ziri kwitegura gutanga urukingo rwa Covid-19 ku bana bari hagati y’imyaka itanu na 11 nyuma y’uko ubuziranenge bwarwo ku bana b’iyi myaka bwemejwe n’Ikigo gishinzwe Ubugenzuzi bw’Ibiribwa n’Imiti, FDA n’Ikigo gishinzwe kurinda no kurwanya Indwara z’Ibyorezo (CDC).

Inzego z’ubuyobozi muri Amerika zabitangaje ku wa 20 Ukwakira 2021, zivuga ko ifite inkingo zihagije zo guha abana miliyoni 28 bari mu kigero cy’imyaka itanu na 11.

Leta ya Amerika yanavuze ko aho abo bana bazakingirirwa hamaze gutegurwa yaba ku bigo nderabuzima no ku mavuriro yabagenewe.

Iki gihugu kandi kiri gutegura uburyo inkingo za Covid-19 zajya zitangirwa ku bigo by’amashuri aba bana bigaho ku bufatanye n’Ikigo gishinzwe Imibereho myiza y’Abaturage ba Amerika, FEMA.

Biteganyijwe ko mu cyumweru gitaha aribwo abajyanama ba FDA mu by’inkingo bazahura maze bakemeza niba urukingo rwa Pfizer ruhabwa abana bari hagati y’imyaka itanu na 11.

Uru rukingo ruramutse rwemejwe kuri aba bana rwaba ari rwo rwa mbere mu nkingo zose za Covid-19 rwemerewe guterwa abakiri bato. Kugeza ubu urukingo rwa Pfizer/BioNTech rwemerewe guterwa abana bafite imyaka 16 kuzamura.

Muri Nzeri 2021, Pfizer yatangaje ko icyiciro kibanziriza icya nyuma cy’igeragezwa ry’uru rukingo ku bana bari hagati y’imyaka itanu na 11, cyerekanye ko uru rukingo rufite imbaraga zo guhangana na Covid-19 kandi rutekanye nta kibazo rwatera uwaruhawe.

Iri geragezwa ryakorewe ku bana 2.268, aho bahawe dose ebyiri za Covid-19, hagati ya dose imwe n’indi harimo iminsi 21 ariko dose imwe yari igizwe na microgram 10 aho kuba 30 zakoreshejwe ku bana bari hejuru y’imyaka 12.

Kugeza ubu muri Amerika 56.7% by’abaturage ba Amerika [abagera kuri miliyoni 188] bakingiwe byuzuye Covid-19 mu gihe 23.2% [abagera kuri miliyoni] ntibararuhabwa.

Leta Zunze Ubumwe za Amerika ziri kwitegura gutanga urukingo rwa Covid-19 ku bana bari hagati y’imyaka itanu na 11

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .