Babiri bishwe na Coronavirus mu Rwanda, abayikize biyongereyeho 389

Yanditswe na Ishimwe Israel
Kuya 4 Gashyantare 2021 saa 10:50
Yasuwe :
0 0

Minisiteri y’Ubuzima yatangaje ko kuri uyu wa Kane abantu babiri bishwe na Coronavirus mu gihe umubare w’abayikize wiyongereyeho 389 mu munsi umwe.

Abantu babiri bitabye Imana barimo umugore w’imyaka 69 wo mu Mujyi wa Kigali n’umugabo w’imyaka 56 wo mu Karere ka Muhanga.

Minisante yatangaje ko abakize Coronavirus biyongereyeho 389, biba ku nshuro ya mbere abantu benshi bakize mu munsi umwe kuko umubare munini w’abasezerewe icyarimwe wari 232, wabonetse ku wa 20 Mutarama 2021.

Kuri uyu munsi kandi mu Rwanda habonetse abantu 154 banduye Coronavirus mu bipimo 4135. Aba barwayi biganje mu Mujyi wa Kigali ahabonetse 28, Nyamagabe hakuwe 19, Kayonza havanwa 17 mu gihe Gicumbi na Kamonyi hasanzwe 12 muri buri karere, hakiyongeraho n’abo mu tundi turere.

Kuva COVID-19 iterwa n’agakoko ka Coronavirus igaragaye mu Rwanda hamaze gufatwa ibipimo 903 382, byasanzwemo 15 988 bamaze kwandura; 11 352 barakize. Abagera ku 4426 ni bo bari gukurikiranirwa mu ngo zabo mu gihe abandi bari kwitabwaho kwa muganga. Abantu bamaze guhitanwa n’iki cyorezo ni 210.

Minisiteri y’Ubuzima yerekana ko ijanisha ku bandura Coronavirus riri kuri 3.7%, iry’abakira ni 71% mu gihe abapfa bari kuri 1.3%.

Ibimenyetso by’iyi ndwara birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .