00:00:00 IGIHE NETWORK KN KINYARWANDA EN ENGLISH FR FRANCAIS

Amerika igiye guha u Rwanda dose zisaga ibihumbi 750 z’urukingo rwa Covid-19

Yanditswe na IGIHE
Kuya 30 Nzeri 2021 saa 05:22
Yasuwe :
0 0

Leta Zunze Ubumwe za Amerika zigiye guha u Rwanda dose z’inkingo za Covid-19 zo mu bwoko bwa Pfizer 751.140 zizagera mu gihugu mu mpera z’iki Cyumweru.

Itangazo rya Ambasade ya Amerika mu Rwanda rivuga ko izi nkingo zizatuma umubare w’izo Amerika imaze guha u Rwanda ugera ku 1.239.830.

Ambasaderi wa Leta Zunze Ubumwe za Amerika mu Rwanda, Peter H. Vrooman, yavuze ko izi nkingo zigamije gutabara ubuzima bw’abaturage zibarinda Covid-19, no gufasha mu rugamba Isi irimo rwo guhashya iki cyorezo.

Yavuze kandi ko ari mu buryo bwo gufasha igihugu kuzahura ubukungu nyuma yo gushegeshwa na Covid-19.

Muri Kamena uyu mwaka ni bwo Perezida Joe Biden yatangaje ko Amerika yiyemeje gutanga dose miliyoni 500 za Pfizer ku bihugu 100 hirya no hino ku Isi by’umwihariko ibiri muri gahunda ya COVAX igamije kugeza inkingo kuri bose.

Tariki ya 22 Nzeri uyu mwaka Biden yatangaje ko igihugu cye kizatanga izindi nkingo miliyoni 500, intego akaba ari ugutanga inkingo miliyari 1.1 bitarenze 2022.

U Rwanda rumaze kwakira inkingo za COVID-19 zigera ku 3.658.310. Minisiteri y’Ubuzima iherutse gutangaza ko kugeza ubu, miliyoni 7,8 ziteganyijwe gukingirwa mu Rwanda (ni ukuvuga 60% by’Abanyarwanda), 21 % ni bo bamaze guhabwa urukingo rwa Covid-19 ku buryo bwuzuye. Ni ukuvuga ko hamaze gukingirwa 12,6% muri miliyoni 13 z’abaturage bose.

Inkingo Amerika yemereye u Rwanda zizahagera mu mpera z'iki Cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .