Abantu batatu bishwe na Coronavirus mu Rwanda, abayanduye biyongereyeho 198

Yanditswe na Ishimwe Israel
Kuya 5 Gashyantare 2021 saa 09:56
Yasuwe :
0 0

Minisiteri y’Ubuzima yatangaje ko abantu 198 banduye Coronavirus mu bipimo 4842 byafashwe mu gihe abo yahitanye biyongereyeho batatu bituma umubare w’abamaze kwicwa n’iki cyorezo mu Rwanda uba 213.

Abantu batatu bitabye Imana ni abagabo batatu barimo babiri b’imyaka 80 na 52 bo mu Mujyi wa Kigali n’undi ufite imyaka 45 wo mu Karere ka Nyagatare.

Kuri uyu wa Gatanu, kandi abarwayi 265 bakize Coronavirus mu masaha 24 yashize, bituma umubare w’abamaze gukira bose uba 11 617.

Mu bantu bapimwe habonetsemo 198 banduye Coronavirus; aba biganjemo abo mu Mujyi wa Kigali wakuwemo 66, mu gihe mu Karere ka Nyamagabe hakuwe 20, mu Bugesera havanwa 19. Uturere turimo Nyanza, Kayonza, Ngoma, Rwamagana, Nyabihu na Nyamasheke nta murwayi wahabonetse.

Kuva umurwayi wa mbere wa Coronavirus abonetse mu Rwanda muri Werurwe 2020, hamaze gufatwa ibipimo 908 224, hasanzwemo abantu 16 186 banduye. Muri bo 11 617 basezerewe nyuma yo gupimwa bagasangwa nta bwandu bagifite mu gihe 4356 bakiri kwitabwaho naho 213 bitabye Imana.

Minisante itangaza ko kuri ubu abarwayi 24 barembye mu gihe ijanisha ku bandura rihagaze kuri 4% , abakira ni 71% na ho abapfa ni 1.3%.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .