Abantu babiri bishwe na Coronavirus mu Rwanda, abayikize biyongeraho 289

Yanditswe na Akayezu Jean de Dieu
Kuya 11 Gashyantare 2021 saa 11:09
Yasuwe :
0 0

Abantu babiri mu Rwanda bahitanywe na COVID-19, bituma umubare w’abamaze kwicwa n’iki cyorezo ugera kuri 231, mu gihe abakirembye ari 15 naho abakize uyu munsi biyongereyeho 289.

Itangazo rya Minisiteri y’Ubuzima ryo kuri uyu wa Kane, tariki 11 Gashyantare 2021, rigaragaza ko mu masaha 24 ashize hafashwe ibipimo 3522 bya COVID-19, hakabonekamo abantu 127 banduye.

Abantu babiri bapfuye ni abagabo b’imyaka 87 na 85 bose bo mu Mujyi wa Kigali ndetse no mu barwayi bashya babonetse mu masaha 24 ashize abenshi ni abo muri uyu mujyi umaze iminsi mike uvuye muri gahunda ya guma mu rugo.

Abarwayi 36 babonetse i Kigali, Nyamagabe haboneka 19 mu gihe kandi uturere two mu Burasirazuba nka Kayonza, Nyagatare na Kirehe natwo twagize abarwayi naho uturimo Rutsiro na Nyabihu turi mu dukomeje kutagaragaramo umubare w’abandura iki cyorezo.

Kuva COVID-19 iterwa n’agakoko ka Coronavirus igaragaye mu Rwanda hamaze gufatwa ibipimo 934 672, abamaze kwandura ni 17 068. Abamaze gukira ni 13 678, abakirwaye ni 3159 naho abarembye ni 15 mu gihe abamaze guhitanwa n’iki cyorezo ari 231.

Minisiteri y’Ubuzima igaragaza ko mu gihugu hose, kuri ubu ijanisha ku bakira rigeze kuri 81.1%, naho abandura bakaba bari kuri 3.6% mu gihe abapfa bo bageze kuri 1.3%.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .