00:00:00 IGIHE NETWORK KN KINYARWANDA EN ENGLISH FR FRANCAIS

Abantu 9 bishwe na Covid-19 mu Rwanda, abayanduye ni 522

Yanditswe na IGIHE
Kuya 27 Kanama 2021 saa 11:57
Yasuwe :
0 0

Minisiteri y’Ubuzima yatangaje ko abantu icyenda bishwe na Covid-19 mu Rwanda mu gihe mu masaha 24 yashize, umubare w’abanduye iki cyorezo wiyongereyeho 522.

Raporo ngarukamunsi ya Minisiteri y’Ubuzima mu Rwanda igaragaza uko icyorezo cya Covid-19 gihagaze mu buryo bw’imibare, yerekanye ko kuri uyu wa 27 Kanama 2021, abitabye Imana bazize iki cyorezo ari abagore bane n’abagabo batanu.

Kuva iki cyorezo cyagera mu Rwanda, abahitanywe nacyo ni 1.065 barimo n’icyenda batangajwe uyu munsi.

Kuri uyu wa Gatanu hafashwe ibipimo 18.193, habonekamo abantu 522 banduye Covid-19, bituma abamaze kucyandura mu minsi irindwi baba 3.508.

U Rwanda kandi rukomeje ibikorwa byo gukingira COVID-19, aho uyu munsi abahawe dose ya mbere ari 87.401 mu gihe muri rusange bangana na 1.425.407. abamaze gukingirwa mu buryo bwuzuye ni 577.450.

Mu itangazo Minisiteri y’Ubuzima yashyize hanze yamenyesheje abaturage b’Umujyi wa Kigali ko guhera ku wa Gatandatu, tariki ya 28 Kanama 2021, hazakomeza gukingirwa abafata urukingo rwa kabiri gusa, mu gihe hategerejwe izindi nkingo ngo hasubukurwe ikingira ku batarabona urukingo na rumwe.

Iryo tangazo rikomeza riti “lyi mpinduka ikaba itewe n’uko ibyiciro by’abaturage b’Umujyi wa Kigali byari biteganijwe gukingirwa mu gihe cy’ibyumweru bibiri bitabiriye cyane, ku buryo imibare yateganywaga gukingirwa buri munsi yikubye inshuro zirenze ebyiri.’’

Abafata urukingo rwa kabiri bibukijwe ko bazakomeza kujya ku bigo nderabuzima, uretse abasheshe akanguhe n’abafite impamvu zigaragara zituma batabasha kugera aho bakingirirwa, bazajya basangwa aho bari.

Abaturarwanda bakomeje gusabwa kubahiriza amabwiriza yashyizweho n’inzego zishinzwe ubuzima arimo kwirinda gukora ingendo zitari ngombwa, aho bavuye mu ngo zabo bakibuka kwambara neza agapfukamunwa, gukaraba intoki kenshi n’amazi n’isabune ndetse no guhana intera.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .