00:00:00 IGIHE NETWORK KN KINYARWANDA EN ENGLISH FR FRANCAIS

Abantu 2.773 banduye COVID-19 mu Rwanda, abayikize ni 1.855

Yanditswe na IGIHE
Kuya 19 Nyakanga 2021 saa 12:18
Yasuwe :
0 0

Raporo ngarukamunsi ya Minisiteri y’Ubuzima yerekana uko COVID-19 ihagaze mu Rwanda yagaragaje ko abantu 2.773 bayanduye, 1.855 barayikira mu gihe abarwayi 11 bahitanywe na yo kuri iki Cyumweru.

Minisante yatangaje ko abarwayi bashya 2.773 bagaragaye mu bipimo 73.608 byafashwe mu bice bitandukanye by’igihugu. By’umwihariko mu tugari tugize Umujyi wa Kigali uri muri Guma mu rugo hongerewe ibikorwa byo gupima abantu benshi harebwa imiterere y’icyorezo cya COVID-19 mu baturage.

Mu basanganywe COVID-19, abenshi biganje muri Kigali ahasanzwe 2.225. Muri Musanze habonetse 47, Burera ni 44, Kamonyi ni 42 mu gihe mu Turere twa Gisagara, Nyaruguru na Bugesera nta bwandu bushya bwahabonetse.

Minisiteri y’Ubuzima kandi yafashe mu mugongo imiryango yabuze abayo kubera COVID-19 mu masaha 24 yashize.

Yakomeje iti “Twihanganishije imiryango y’abagore batanu b’imyaka 75 (Rulindo), 71, 66 (Kigali), 69 (Rubavu) & 69 (Rusizi) n’abagabo batandatu b’imyaka 71 (Rulindo), 69, 60, 57 (Kigali) 62 (Huye) & 50 (Karongi) bitabye Imana.’’

Kuva umurwayi wa mbere wa COVID-19 agaragaye mu Rwanda, hamaze gufatwa ibipimo 1.887.262 basanzwemo abanduye 57.322. Abamaze gukira bose ni 40.041 mu gihe 16.632 barwaye na ho 72 bakaba barembye. Abitabye Imana ni 649.

Ni ku nshuro ya mbere mu Rwanda hagaragaye ubwandu bw’abantu benshi [2.773] n’abakize benshi mu munsi umwe [1.855]. Imibare iri hejuru yaherukaga kugaragara ku wa 17 Nyakanga 2021 ubwo abantu 1.997 basanganwaga COVID-19 mu gihe 976 bayikize.

Kuva u Rwanda rutangiye ibikorwa byo gukingira mu buryo bwa rusange ku wa 5 Werurwe 2021, rumaze gutanga inkingo ku baturage 406.004.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .