00:00:00 IGIHE NETWORK KN KINYARWANDA EN ENGLISH FR FRANCAIS

Abantu 14 bishwe na COVID-19 mu Rwanda, abayikize ni 984

Yanditswe na IGIHE
Kuya 9 Nyakanga 2021 saa 12:14
Yasuwe :
0 0

Minisiteri y’Ubuzima yatangaje ko abantu 14 bishwe na COVID-19 bituma umubare w’abamaze guhitanwa n’iki cyorezo ugera kuri 521 mu gihe abagikize ari 984.

Minisante yatangaje ko abitabye Imana bazize COVID-19 kuri uyu wa Kane barimo abagabo batandatu n’abagore umunani.

Yakomeje iti “Twihanganishije imiryango y’abagore umunani b’imyaka 89 (Rulindo), 82 (Musanze), 74 (Rubavu), 74 (Rutsiro), 63 (Musanze), 58 (Nyamasheke), 43 (Karongi), 37 (Kigali) n’abagabo batandatu b’imyaka 95, 65 (Nyagatare), 58 (Musanze), 55, 49 (Kigali) 27 (Rubavu) bitabye Imana.’’

Abarwayi bashya babonetse uyu munsi ni 911 basanzwe mu bipimo 8.350. Kuva muri Werurwe 2020 hamaze gufatwa ibipimo 1.700.200, byasanzwemo abarwayi 45.950.

Itangazo rya Minisante ryerekanye ko abarwayi bashya biganje mu Mujyi wa Kigali wabonetsemo 326, Rubavu [70], Nyamagabe [63] mu gihe Uturere twa Gisagara, Ruhango, Bugesera, Gatsibo na Nyabihu nta murwayi wahabonetse.

Abarwayi bakize mu masaha 24 bo biyongereyeho 984 bituma abamaze gukira baba 30.191. Abakiri kwitabwaho ni 15.238 barimo 71 barembye.

Abagera ku 392.077 ni bo bahawe urukingo. Abantu 252.580 bamaze guhabwa doze ya kabiri y’urukingo rwa COVID-19 rwa AstraZeneca barimo 572 bayihawe uyu munsi.

Nubwo umubare w’abarwayi bakira uri kuzamuka, abaturage basabwe gukomeza kwirinda ikwirakwira ryacyo cyane ko mu Rwanda habonetse ubwoko bushya bw’iki cyorezo.

Minisitiri w’Ubuzima, Dr Ngamije Daniel, yatangarije RBA ko hari ibimenyetso bifatika by’uko ubwoko bushya bwa Coronavirus buzwi nka Delta bwageze mu Rwanda, bikaba bifite aho bihuriye n’ubwiyongere bukabije bw’ubwandu n’impfu by’icyo cyorezo biri kuboneka mu gihugu.

Magingo aya Ishami ry’Umuryango w’Abibumbye ryita ku Buzima, OMS, rivuga ko Delta yagaragaye bwa mbere mu Buhinde ari bwo bwoko “buhanganyikishije” ugereranyije na Alpha yabonetse bwa mbere mu Bwongereza, Beta yagaragaye bwa mbere muri Afurika y’Epfo na Gamma yabonetse muri Brésil.

Abaturarwanda barasabwa gukomeza kubahiriza amabwiriza atangwa n’inzego z’ubuzima mu gukumira ikwirakwira ry’icyorezo, arimo kwambara agapfukamunwa neza, guhana intera, gukaraba intoki kenshi cyangwa gukoresha umuti wica udukoko igihe cyose wakoze aho abandi bakoze. Barasabwa kwirinda kwikorakora mu maso, ku zuru no ku munwa ndetse bakishyurana bakoresheje ikoranabuhanga aho bishoboka hose.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .