00:00:00 IGIHE NETWORK KN KINYARWANDA EN ENGLISH FR FRANCAIS

Abantu 11 bishwe na Coronavirus mu Rwanda, abayanduye biyongeraho 1309

Yanditswe na IGIHE
Kuya 23 Nyakanga 2021 saa 01:12
Yasuwe :
0 0

Raporo ngarukamunsi ku ishusho ya Coronavirus mu Rwanda yerekanye ko abantu 11 bishwe nayo bituma umubare w’abamaze guhitanwa n’iki cyorezo mu gihugu uba 704.

Itangazo rya Minisiteri y’Ubuzima ryo kuri uyu wa 22 Nyakanga 2021 ryafashe mu mugongo imiryango yabuze ababo.

Rikomeza riti “Twihanganishije imiryango y’abagore batanu b’imyaka 79, 72, 52 (Kigali), 65 (Karongi) & 24 (Huye) n’abagabo batandatu b’imyaka 77 (Ruhango), 67 (Kamonyi), 63 (Karongi), 61, 58 & 30 (Kigali) bitabye Imana.’’

Abanduye Coronavirus biyongereyeho 1309 mu masaha 24 ashize, bakuwe mu bipimo 22.818 byafashwe. Umujyi wa Kigali ni wo wihariye abarwayi benshi kuko wasanzwemo 189.

Uyu mujyi wahawe umwihariko kubera ubwiyongere bw’abarwayi byanatumye ushyirwa muri Guma mu rugo.

Ikigo cy’Igihugu cy’Ubuzima, RBC, cyatangaje ko mu bantu 107.106 bo hirya no hino muri Kigali bapimwe Covid-19 abagera kuri 3965 bangana na 3,7 % bayisanganywe. Ibi bipimo rusange byafashwe kuva ku wa 17-18 Nyakanga 2021, bigaragaza ko Akarere ka Kicukiro kihariye 4,4% by’abasanganywe ubwandu, Gasabo ikagira 3,8% mu gihe Nyarugenge ifite 2,5%.

Imibare y’abarwayi bashya yatumye umubare w’abamaze gusanganwa Coronavirus kuva yagera mu Rwanda muri Werurwe 2020 uba 61.375 mu bipimo 1.939.765. Imibare yerekana ko ijanisha ku bandura riri kuri 5.7%.

Minisante kandi yatangaje ko uyu munsi hakize abarwayi 869, bituma umubare w’abamaze gukira ugera kuri 43.924. Abarwayi bakiri kwitabwaho byihariye baba abarwariye mu bitaro n’abari mu ngo zabo ni 16.747 barimo 78 barembye.

Abantu 418.773 ni bo bamaze guhabwa doze ya kabiri y’urukingo rwa COVID-19 kuva ibikorwa byo gukingira byatangira ku wa 5 Werurwe 2021.

Abaturarwanda barasabwa gukomeza kubahiriza amabwiriza atangwa n’inzego z’ubuzima mu gukumira ikwirakwira ry’icyorezo, arimo kwambara agapfukamunwa neza, guhana intera, gukaraba intoki kenshi cyangwa gukoresha umuti wica udukoko igihe cyose wakoze aho abandi bakoze. Barasabwa kwirinda kwikorakora mu maso, ku izuru no ku munwa, ndetse bakishyurana bakoresheje ikoranabuhanga aho bishoboka hose.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .