Zipline yatangiye gukora amasaha yose mu kugeza amaraso n’imiti ku bitaro mu Rwanda

Yanditswe na Ntabareshya Jean de Dieu
Kuya 17 Gashyantare 2021 saa 08:18
Yasuwe :
0 0

Ikigo Zipline gitanga serivisi zo kugeza amaraso n’imiti mu bitaro bitandukanye mu Rwanda, cyatangaje ko cyatangiye gukora amasaha 24 kandi iminsi irindwi kuri irindwi mu rwego rwo kunoza serivisi batanga.

Iki kigo Gisanzwe kigeza amaraso n’imiti ku bitaro n’ibigo nderabuzima binyuranye biri mu bice bya kure cyifashishije ikoranabuhanga ryacyo ryo gukoresha utudege duto tutagira abapilote [drones].

Ubusanzwe Zipline yakoraga iminsi yose kuva saa moya z’igitondo kugeza saa moya z’umugoroba buri munsi, ubu ikaba yamaze kwagura imikorere yayo aho izajya ikora amasaha yose iminsi yose.

Umuyobozi mukuru wa Zipline Rwanda, Joseph Ndagijimana, yabwiye IGIHE ko kongera amasaha bakoraga ari mu buryo bwo kunoza serivisi batanga.

Ati “Twagiye tubisabwa n’abantu duha iyi serivisi ko twakongera amasaha, tukabigeza na n’ijoro. Ubu twatangiye gukora amasaha yose y’umunsi kandi muri iri joro ryo ku wa Mbere nibwo twatangiye. Hari n’ibitaro byahise bitumiza amaraso, hari ibitaro hafi nka bitanu byahise byungukira mu kuba twatangiye gukora muri ubu buryo.”

Ndagijimana yavuze ko ubu buryo bwo gukora amasaha yose y’umunsi bizarokora ubuzima bwa benshi ndetse bigabanye n’umubare w’abarwayi boherezwaga mu bindi bitaro mu masaha y’ijoro kubera bakeneye kongererwa amaraso.

Ati “Hari ibintu bitatu bigiye guhinduka. Habonetse umurwayi mu ijoro ku bitaro, Zipline yahita imwoherereza umuti cyangwa amaraso yari akeneye. Bizagabanya kandi abarwayi boherezwaga mu bitaro bindi kubera bakeneye amaraso mu gihe cy’ijoro. Abakora mu mirimo y’ubuvuzi nabo bizatuma batekana kuko hari nk’imiti batabasha kubika ariko bazajya bumva ko kuba Zipline iri gukora bashobora gutumiza umuti, igihe icyo ari cyo cyose, birumvikana ko ari nko gutura hafi n’isoko nta bwo bazahangayika.”

Zipline nk’ikigo cyiri kwibanda mu buvuzi cyane kirateganya ko mu mezi abiri ari imbere cyatagira kugeza imiti mu ngo z’abaturage batuye ahantu bibagora kujya kwa muganga gufata imiti, by’umwihariko abarwaye indwara za karande basanzwe bazi neza imiti bafata, nka diabétè, umwijima, kanseri, umuvuduko w’amaraso n’abandi bafata imiti ya buri kwezi kandi bibagora kugera ku bitaro.

Zipline kandi iherutse gutangaza ko iri mu myiteguro yo kuzageza inkingo za Coronavirus aho zizaba zikenewe mu gihe zizaba zatangiye gukwirakwiza hirya no hino mu gihugu, ikavuga kandi ko bari kwitegura hubakwa ibikorwaremezo bizabafasha muri iyi gahunda.

Magingo aya, iki kigo cyatangiye gukorera mu Rwanda mu 2016 ari na ho ha mbere ku Isi cyahereye, gifite ibyicaro bibiri i Kayonza n’i Muhanga, ndetse kikaba gitanga serivise zacyo mu bigo nderabuzima 260, mu gihe intego ari ukugera ku bigo nderabuzima 700 mu gihe kiri imbere

Indege za Zipline zigiye kujya zikora amasaha yose mu kugeza amaraso n'imiti ku bitaro bibikeneye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .