00:00:00 IGIHE NETWORK KN KINYARWANDA EN ENGLISH FR FRANCAIS

Zigize ashwi! Indwara icumi zitsinda Abanyarwanda mu bitaro ku bwinshi

Yanditswe na Ferdinand Maniraguha
Kuya 20 Gicurasi 2021 saa 10:25
Yasuwe :
0 0

Uwavutse wese urupfu si inkuru nshya kuko ni cyo aba ategereje, icyo twese tutazi ni ikizatuvana ku Isi. Ubusanzwe gupfa si ikibazo kuko ku bize ubumenyi bw’Isi, gupfa no kuvuka ni bimwe mu byangombwa nkenerwa ngo ubuzima bukomeze.

Ikibazo gikomera iyo gupfa bije bitunguranye cyangwa se bikaba mu buryo bukabije. Indwara ni bimwe mu bishobora gutuma habaho impfu z’imburagihe.

Umwaka ushize wa 2020, Ikigo cy’Igihugu cy’Ibarurishamibare cyashyize hanze igitabo ngarukamwaka kigaragaza ubuzima bw’igihugu mu mibare (Statistical Yearbook 2020). Muri iki gitabo, hari igice kivugwamo ibijyanye n’ubuzima bw’Abanyarwanda n’impfu zagiye zibera mu bitaro bitandukanye hirya no hino mu gihugu.

Ibarura rusange ryabaye mu 2012, ryagaragaje ko mu mwaka wari wabanje nibura mu Rwanda hapfuye abantu 79.465. Abagabo ni bo bari benshi bangana na 39.863 mu gihe abagore bari 39.607. Nibura, byavugwaga ko ku munsi mu Rwanda hapfa abantu 218. Igipimo cy’urupfu mu Rwanda cyari 7.7%.

Ugendeye ku gipimo cy’impfu zavuzwe mu ibarura rusange, n’iyatangajwe muri Statistical Yearbook harimo itandukaniro cyane, kuko umubare w’abantu benshi bapfa mu Rwanda bagwa mu ngo ku buryo bigorana kubandikisha, abagwa mu bitaro ni bake cyane ari nabo biba byoroshye kumenya.

Kuva mu 2015 kugeza 2017 nkuko Statistical Yearbook 2020 ibigaragaza, kwa muganga haguye abantu 37.854. Ugendeye ku bwoko bw’amavuriro baguyemo, mu bigo nderabuzima haguye abantu 3040, mu bitaro by’uturere n’iby’intara haguye abantu 28.050 naho mu bitaro bikuru haguye 6764.

Mu mwaka wa 2015 honyine, mu mavuriro yo mu Rwanda haguye abantu 12.467, mu 2016 hagwa abantu 12.904 naho mu 2017 hapfira abantu 12.483.

Mu bitaro by’uturere n’iby’intara ni ho hagiye hagwa benshi ugereranyije no mu bitaro bikuru cyangwa mu bigo nderabuzima. Mu 2015 haguye abantu 8237, mu 2016 hagwa abantu 10.140 naho mu 2017 hagwa abantu 9673.

Kubera ko gutanga raporo y’icyahitanye abantu kwa muganga bikozwe n’amavuriro cyane cyane ibigo nderabuzima bije vuba, umwaka wa 2016 ni wo wagaragajwemo indwara ziza ku isonga mu zahitanye abantu kwa muganga. Ni nazo twashingiyeho muri iyi nkuru nk’izihitana benshi, nubwo bishoboka ko mu myaka mike ishize haba harajemo izindi.

Ikigo cy’Igihugu cy’Ibarurishamibare gishingiye ku mibare ya Minisiteri y’Ubuzima, kigaragaza ko indwara zishe abantu benshi kwa muganga mu mwaka wa 2016 ku isonga haza indwara z’abana bakivuka zahitanye 3735, indwara z’ubuhumekero zahitanye abantu 2583, indwara z’umutima zahitanye abantu 921, malaria yisasiye abantu 718, ubumuga buvukanwa (Congenital anomalies) bwahitanye 588, indwara z’ibihaha zahitanye 560.

Impanuka n’imvune zahitanye 491, indwara zifata imyanya myibarukiro y’abagore zahitanye 471, Asthma yahitanye 366 naho SIDA n’indwara z’ibyuririzi yahitanye 359 mu gihe izindi ndwara zahitanye 2.112.

Indwara zaje ku isonga mu guhitana Abanyarwanda benshi babaga bagiye kwivuza mu bitaro mu mwaka wa 2016 (ari nazo twashingiyeho)

Kuba indwara z’abana bakivuka zaraje ku isonga mu guhitana benshi, umwe mu basesenguzi mu by’Ubuzima wavuganye na IGIHE, yavuze ko ahanini biterwa n’uko abana baba bafite ubwirinzi bw’umubiri buke. Kuba bavukana indwara zigakubitana n’ubwirinzi buke, bituma baba mu byiciro bifite ibyago byinshi byo gupfa.

Nubwo impfu z’abana ziza ku isonga, u Rwanda ruza mu bihugu byo munsi y’Ubutayu bwa Sahara bwakoze byinshi mu kuzigabanya. Mu 1995, abana bapfa bari munsi y’imyaka itanu bari 196 ku 1000, impfu z’abana ari 107 ku 1000.

Mu 2018 impfu z’abana bari munsi y’imyaka itanu bari 50/1000 mu gihe mu 2014 zari 60/1000. Guverinoma ifite intego y’uko mu 2024 igipimo cy’umubare w’abana bapfa batarageza ku myaka itanu kizagera kuri 35/1.000.

Kuba mu bitaro by’uturere n’intara ariho haguye abantu benshi cyane, umusesenguzi yavuze ko ariho hoherezwa indembe nyinshi kandi ari zo ziba zifite ibyago byinshi byo gupfa kurusha abandi.

Ati “Abageze ku kigo nderabuzima barembye bahita boherezwa ku bitaro by’akarere cyangwa intara. Mu barwariye ku kigo nderabuzima, hashobora no gushira umwaka ntawe urahapfira.”

Kubera ko Abanyarwanda batarakangukira kwandikisha ababo bapfuye, biragoye ko imibare yatangajwe na Minisiteri y’Ubuzima ariyo yonyine yashingirwaho mu kumenya neza ishusho y’abantu bapfa ku mwaka mu Rwanda.

Nko mu mwaka wa 2019, Raporo y’imikorere y’Urwego rw’Ubuzima mu Rwanda 2019-2020 (Rwanda Health Sector Performance Report) yerekanye ko mu bitaro haguye abantu 12.512. Ni mu gihe Ikigo cy’Igihugu cy’Ibarurishamibare kigaragaza ko impfu zamenyekanishijwe muri uwo mwaka zari 23.791 (habariwemo n’abataraguye kwa muganga).

Rwanda Health Sector Performance Report yo yerekana ko indwara zandura ziza ku isonga mu guhitana Abanyarwanda ku kigero cya 70 % mu gihe indwara zitandura ziri ku kigero cya 27.9 %.

Kuva mu 2015 kugeza 2017 kwa muganga haguye abantu 37854
Ibarura rusange ryo mu 2012 ryagaragaje ko mu 2011 nibura mu Rwanda hapfuye abantu 79.465

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .