00:00:00 IGIHE NETWORK KN KINYARWANDA EN ENGLISH FR FRANCAIS

Unicef yagaragaje ko umwana umwe muri barindwi aba afite ibibazo by’ubuzima bwo mu mutwe

Yanditswe na Dufitumukiza Salathiel
Kuya 7 Ukwakira 2021 saa 07:36
Yasuwe :
0 0

Ishami ry’Umuryango w’Abibumbye ryita ku Bana (Unicef) ryatangaje ko umwana umwe muri barindwi bafite imyaka iri hagati ya 10 na 19 agaragaza ibimenyetso by’ibibazo ku buzima bwo mu mutwe.

Bikubiye muri Raporo Unicef yamuritse ku wa Kabiri, tariki 5 Ukwakira 2021, igaruka ku buzima bwo mu mutwe ku bana, ingimbi n’ababitaho.

Hagaragazwamo ko muri iyi myaka hafi ibiri Coronavirus imaze yadutse ku Isi, yagize ingaruka cyane ku buzima bwo mu mutwe. Icyakora igaragaza ko atari bwo zije ahubwo zarushije gufata indi ntera bitewe n’ingamba zitandukanye zashyizweho mu guhangana na yo zigatuma by’umwihariko abana batabasha gusabana n’imiryangon n’inshuti ntibagere no ku mashuri.

Ikibazo cy’ubuzima bwo mu mutwe butitabwaho, Unicef yavuze ko kimaze igihe kinini ku buryo izo ngaruka zatewe na Coronavirus ari “akavungukira”.

Umuyobozi Mukuru wa Unicef, Henrietta Fore, yagize ati “Bimaze igihe kirekire, amezi 18 yose kuri twese by’umwihariko abana. Ingaruka [za COVID-19] zirigaragaza kandi ni akavungukira gato kuri iki kibazo kimaze igihe kirekire kitagaragazwa.”

Yahamije ko abana bamaze igihe kitari gito bahura n’ibibazo by’ubuzima bwo mu mutwe bitagaragazwa kuva na mbere y’umwaduko wa Coronavirus. Ngo nta n’ubufasha bukwiye bahabwa.

Ati “Ishoramari za guverinoma zishyira mu kugaragaza ibi bibazo biteye impungenge riri hasi cyane. Ntihanitabwa bihagije ku guhuza ubuzima bwo mu mutwe n’ibyakwitegwa ku buzima bw’ahazaza.”

Raporo yagaragagaje ko ingaruka z’ibibazo ku buzima bwo mu mutwe zihungabanya uburezi bw’abato, uko bibona mu mibereho yabo ndetse n’ubushobozi bwo gushaka amikoro.

Yasobanuye ko nibura umwe mu bana barindwi bari hagati y’imyaka 10 na 19 afite ibimenyetso by’ibibazo by’ubuzima bwo mu mutwe.

Ibyo bituma kwiyahura biza mu mpamvu eshanu za mbere zituma abari muri icyo kigero babura ubuzima kuko mu mwaka hapfa abagera ku 46.000 ari byo bibahitanye.

Yifashishije ubusesenguzi bwakozwe na Kaminuza yigisha iby’ubukungu i Londres, Unicef yerekanye ko igihombo ku musanzu wubaka ubukungu giterwa n’ibibazo by’ubuzima bwo mu mutwe kigera hafi kuri miliyari 390$ ku mwaka.

Unicef yahamije ko ibikizitira abana kubona ubufasha bukwiye ngo bagire ubuzima bwo mu mutwe bwiza birimo kubura amikoro n’uko bafatwa mu muryango mugari.

Yasabye ko hakongerwa ubushishozi mu kwita ku buzima bwo mu mutwe bw’abana n’ababitaho. Ibyo bizajyana no kugenzura ko ibigo by’amashuri bifite ibikoresho biboneye byabafasha.

Fore yagize ati “Ubuzima bwo mu mutwe ni igice cy’umubiri, ntitwabasha gukomeza kukibona bitagenze bityo. Hashize igihe kinini tubona ko haba mu bihugu bikennye n’ibikize imyumvire kuri ibi ikiri hasi ndetse n’ishoramari rishyirwa mu kubaka ubushobozi bwa buri mwana bwazamurwa riri hasi.”

Yasabye ko ibyo bigomba guhinduka.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .