Umuryango END Fund ugiye gufasha kurwanya indwara ziterwa n’inzoka zo mu nda mu Rwanda, Kenya na Ethiopia

Yanditswe na Dufitumukiza Salathiel
Kuya 8 Gashyantare 2021 saa 11:41
Yasuwe :
0 0

Umuryango w’Abanyamerika uharanira kurwanya indwara zititabwaho cyane zugarije Afurika yo munsi y’Ubutayu bwa Sahara, END Fund, watangaje ko ugiye gufasha mu kuvura inzoka zo mu nda ku bana b’abanyeshuri n’abandi bafite ibyago byinshi byo kuzandura, mu bihugu bya Ethiopia, Kenya n’u Rwanda.

Sosiyete y’Abanyamerika iteza imbere serivisi z’ubuvuzi,Johnson&Johnson, yiyemeje kuzatanga dose miliyoni 50 z’ibinini bya mebendazole bivura inzoka zo mu nda mu Ishami ry’Umuryango w’Abibumbye ryita ku Buzima,OMS.

Ibyo binini bizaba bigenewe kugoboka abafite ibyago byinshi byo kwandura inzoka zo mu nda, barimo abana n’abagore bakiri mu myaka y’uburumbuke.

END Fund yavuze ko ibinyujije mu ishami ryayo rishinzwe gukumira indwara z’inzoka zandura ziturutse ku itaka (DIF), izafasha kugura iyo miti yatanzwe ndetse ikorane n’ibyo bihugu n’abafatanyabikorwa mu kwihutisha iyo gahunda.

Biteganyijwe ko amafaranga azasaguka mu igurwa ry’iyo miti azifashishwa mu kuyikwirakwiza igezwa ku bayigenewe.

Ni gahunda yitezweho guhindura imibereho myiza y’ababarirwa mu mamiliyoni mu myaka itanu iri imbere, cyane ko habarurwa abarenga miliyari 1.7 mu Isi bugarijwe n’indwara ziterwa n’inzoka zo mu nda, aho 40% babarizwa ku mugabane wa Afurika.

Ibihugu birimo Ethiopia, Kenya, u Rwanda na Zimbabwe bibarurwamo miliyoni 40 z’abugarijwe n’inzoka zo mu nda, END Fund ikaba iteganya ko kugeza mu 2025 izaba yarabahaye ubuvuzi.

Kuva hasinywa amasezerano y’i Londres yo gukumira indwara ziterwa n’inzoka mu 2012, imiryango itandukanye yagiye itanga inkunga yo gufasha muri iyo gahunda. By’umwihariko Johnson&Johnson imaze gutanga dose miliyari 1.7 z’ibinini by’inzoka kuva mu 2006, mbere y’uko ayo masezerano ashyirwaho umukono.

Ni mu gihe kuva mu 2012, END Fund imaze gutanga ubufasha bw’ibikorwa byo kuvura abarwaye izo ndwara bisaga miliyoni 920, bifite agaciro ka miliyari y’amadolari y’Amanyamerika. Yatanze ubufasha mu kubaga abagera ku 17,000 ndetse ihugura abagera kuri miliyoni 2.7 bazafasha mu kurwanya izo ndwara.

Muri Nyakanga 2020, OMS yashyizeho amabwiriza y’uko imiryango ikwiye gukomeza gukora igabanya ibyago byo kuzahazwa n’izo ndwara ku bakozi bo nzego z’ubuzima n’abaturage. OMS kandi ifite gahunda yo kurandura izo ndwara burundu bitarenze mu 2030.

Inzoka zo mu nda zigira ingaruka zikomeye ku bazirwaye zirimo kugwingira mu gihagararo no mu mitekerereze, kugira amaraso make mu mubiri, kugaragaraho imirire mibi, ndetse no gukomereka bya hato na hato.

Indwara z'inzoka ni zimwe mu zihangayikishije muri Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .