Uko Abanyarwanda bagiye boroherezwa kubona imiti igabanya ubukana bwa virusi itera Sida

Yanditswe na Mukaneza M.Ange
Kuya 6 Nyakanga 2018 saa 10:11
Yasuwe :
0 0

Mu myaka 20 ishize ntibyari byoroshye kuba Umunyarwanda yamenya ko yanduye Virusi itera Sida, ndetse n’ubashije kubimenya ntagire ubundi bufasha ahabwa uretse gutegereza kwitaba Imana, ntanahabwe agahenge n’abamuhaga akato.

Muri iki gihe ariko abanduye ndetse n’ababana n’agakoko ka Sida bishimira ko batakibaho bafite ubwoba bw’uko ejo bizamera, kuko uretse kuba ntawe ugihabwa akato, kubona imiti igabanya ubukana ituma babasha kuramba bisigaye byoroshye kubera imbaraga Guverinoma y’u Rwanda ibishyiramo.

Nk’uko Assoumpta (irindi zina ryagizwe ibanga), yabitangarije The New Times, mu 2002 nibwo yamenye ko yanduye Virusi itera Sida, aho yahise atangira kwiyumvisha ko ubuzima bwe bugiye kurangira, kuko icyo gihe bitari byoroshye kubona imiti, ndetse uwanduye akaba yarahabwaga akato. Kwipimisha ntibyari byoroshye, kuko wasangaga hapimwa abantu batarenze 20 bazindutse kurusha abandi.

Ati “Iyo abantu bamenyaga ko ufite Virusi itera Sida nta n’umwe wongeraga kukwegera, ndetse n’abo mu muryango wawe baragutereranaga. Imiti igabanya ubukana (ARVs) yari nk’inzozi kuri twe, ntabwo twatekerezaga ko hari igihe tuzabasha kuyifata.”

Gahunda yo gutanga imiti igabanya ubukana yatangiye mu 2003, icyo gihe ariko ikaba itaragera ku bantu bose banduye, Assoumpta ku bw’amahirwe yaje mu bahise batangira kuyihabwa.

Ati “Byari bigoye ku buryo hari abantu bagiye bitaba Imana, ntihagire umuntu n’umwe wo mu muryango wabo ubashyingura. Twebwe abanduye twarisuganyaga, akaba ari twe dutegura imihango yo gushyingura.”

Assoumpta uhamya ko nyuma y’igihe afata imiti yongeye kugira ubuzima bwiza, agashyingiranwa n’umugabo muzima bakanabyara abana bazima, avuga ko ababazwa no kubona abatayifata uko bikwiye kandi nyamara guverinoma iba yayitakajeho amafaranga menshi ngo ibafashe kuramba.

Mu Rwanda, 94% by’abanduye bafite hagati y’imyaka 15-49, bafata imiti igabanya ubukana. Bitandukanye n’uko byari bimeze mbere, ikindi iyo umuntu basanze yaranduye ahita atangira gukurikiranwa no kuyihabwa iyo biri ngombwa.

Ngendahimana Charles ushinzwe serivisi yo gutanga imiti igabanya ubukana mu bitaro bya Nyamata mu Karere ka Bugesera, avuga ko hari abo bahita batangira mu gihe cy’ukwezi kose, abandi bakayihabwa rimwe mu mezi atatu bitewe n’abasirikare umubiri wabo ufite.

Yakomeje avuga ko nko ku bitaro bya Nyamata, 62% by’abanduye Virusi itera Sida bafata imiti rimwe mu mezi atatu, gusa abiganjemo urubyiruko n’abanywa inzoga cyane bakaba bakurikiranwa by’umwihariko.

Umuyobozi w’Ishami rishinzwe ubufasha mu guhindura imyumvire n’itumanaho mu Kigo cy’igihugu gishinzwe Ubuzima, RBC, Ernest Aimée Nyirinkindi, yavuze ko kuri ubu icyo u Rwanda rushyize imbere ari ugukumira ubwandu bushya, akato ndetse no kugabanya ijanisha ry’abanduye.

Yakomeje avuga Rwanda rutanga amafaranga menshi mu kwita no gukomeza gukurikirana abanduye Virusi itera Sida, aho mu myaka yashize wasangaga hari ibizamini bimwe na bimwe boherezaga ku mugabane w’u Burayi kuko nta bushobozi bwo kubipima bwari buhari.

Ati “Ubu mu Rwanda dufite umuti ukomeye uriho ku Isi, aho ari ibinini bitatu bifatwa inshuro imwe ku munsi. Umuti umwe ugura amafaranga ibihumbi 180 Frw. Birumvikana ko u Rwanda rufite umusanzu rutanga mu kwishyura uyu muti, ndetse n’abaterankunga bakagira icyo bafasha.”

Yakomeje avuga ko imbaraga ziri gushyirwa mu kureba uko u Rwanda rwajya rwiyishyurira iyi miti, ndetse abantu bakajya boroherezwa kuyigurira bakoresheje ubwishingizi butandukanye.

Imibare itangwa na RBC igaragaza ko buri mwaka abantu ibihumbi 10 bandura Virusi itera Sida, n’aho abagera ku 5000 banduye bapfa. Ni mu gihe mu 2005 yazaga ku mwanya wa mbere mu guhitana abantu benshi, imibare iherutse gushyirwa ahagaragara n’Ikigo gikora ubushakashatsi ku bijyane n’ubuzima kiri i Washington muri Amerika yerekana ko mu 2016 yari ku mwanya wa kane n’igabanuka rya 77.6%.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza