Udupaki tw’amaraso turenga 5000 twagejejwe ku bitaro hifashishijwe ‘drones’

Yanditswe na Evariste Nsengimana
Kuya 8 Mutarama 2018 saa 01:16
Yasuwe :
0 0

Minisiteri y’ubuzima(Minisante) yatangaje ko kwifashisha indege nto zitagira abapilote (drones) mu kugeza amaraso ku bitaro hirya no hino mu gihugu, bimaze gutanga umusaruro mwiza kuko zagejejeyo udupaki turenga 5000.

Mu Ukwakira 2016, nibwo u Rwanda rwatangije kwifashisha drones mu bikorwa byo kugeza amaraso ku bitaro. Ikibuga cy’izo drones kiri mu Karere ka Muhanga.

Perezida Kagame atangiza ubwo buryo bushya, yavuze ko izo ndege zifatiye runini u Rwanda kuko zizoroshya ubutabazi ku barwayi bakeneye amaraso byihutirwa batuye mu misozi, aho byagoranaga kuyageza vuba.

Ubwo kuri uyu wa 8 Mutarama 2018, Minisiteri y’Ubuzima yakiraga itsinda ry’abakozi 19 bo mu bigo byo gutanga amaraso muri Tanzania no mu Muryango nyafurika wo kuyatanga “Africa Society for Blood Transfusion” , Umunyamabanga Uhoraho muri Minisiteri y’Ubuzima , Dr. Jean Pierre Nyemazi, yavuze ko drones zimaze kugeza udupaki turenga ibihumbi bitanu ku bitaro 12.

Yagize ati “Muzi ko i Muhanga ariho zihagurukira zigiye mu bikorwa byo kujyana amaraso, ubu bamaze kugera ku bitaro 12, hashize hafi umwaka batangiye gutwara amaraso, hakaba hamaze gutarwa amapaki arenga ibihumbi bitanu kandi ukabona ko hari ikintu kigaragara byagiye bimara, cyane cyane kugabanya igihe.”

Izo drones z’ikigo cyo muri Leta Zunze Ubumwe za Amerika, Zipline, ku bufatanye n’ikigo gikora ibijyanye no gutwara imizigo, UPS, zijya mu bitaro 12 birimo Muhororo, Kabgayi, Nyanza, Gitwe, Gakoma, Gikonko, Kaduha, Kabaya, Shyira, Ruhango, Kirinda na Ruli.

Dr. Nyemazi asobanura ko ubusanzwe, kugeza amaraso ku bitaro biri mu byaro byatwaraga amasaha agera kuri atatu ariko kubera drones bisigaye bitwara igihe kiri munsi y’isaha.

Uretse kugabanya igihe, byanagabanyije amafaranga yakoreshwaga mu bikorwa byo kuyohereza hifashishijwe imodoka no kuyabika, cyane cyane ku bitaro bidafite ubushobozi bwo kuyabika neza.

Itsinda ry’abantu 19 baturutse muri Tanzania, Cameroun, Afurika y’Epf0, Misiri, Zimbabwe, Malawi na Ghana, bazamara icyumweru mu Rwanda, bungurana ibitekerezo ku byo buri gihugu cyagezeho no gushakira hamwe icyakorwa kugira ngo indembe zibashe kubona amaraso yujuje ubuziranenge kandi ku gihe.

Umuyobozi uhagarariye Minisiteri y’ubuzima, iterambere ry’abaturage, uburinganire, abakuze n’abana muri Tanzania, Prof. Muhammad Bakari Kambi, wari uhagarariye itinda, yavuze u Rwanda ari kimwe mu bihugu byujuje ibisabwa mu gutanga amaraso afasha indembe.

Yagize ati “U Rwanda ni kimwe mu bihugu bike muri Afurika, byujuje ibisabwa n’Umuryango nyafurika wo gutanga amaraso, rwageze ku ntera ikomeye cyane[…] Ibyo hari byinshi bisobanuye, uretse kuba amaraso atangwa aba yujuje ubuziranenge, binavuze ko amaraso menshi akenerwa ruyabona atanzwe n’abaturage ku bushake bwabo.”

Mu bindi bihugu nkaTanzania usanga amaraso yo gufasha indembe atangwa gusa n’abo mu muryango w’umurwayi.

Ubwo Perezida Kagame yatangizaga ikoreshwa rya Drones mu gutwara amaraso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza